Read Quechua Cuzco Bible 1988 1 CORINTIOS 5 Bible Online

1 CORINTIOS 5 - Quechua Cuzco Bible 1988 bible

1 CORINTIOS 5

¹Hukniykichissi madrastranwan puñukun, chay hina mana chanin ruwayqa manan uyarikunchu Diospi mana iñiq runakuna ukhupipas. Sinchi millaymi chay huchaqa.

²¡Qankunaqa hatunchakushankichisraqtaq! Sinchi llakisqan kashanaykichis, chay mana chanin ruwaqtaqa qankuna ukhumanta wikch'unaykichismi.

³Ñoqaqa manaña kikiypunichu chaypi kashani chaypas, yuyayniypiqa chaypin kashani, chay mana chanin ruwaq runataqa Señor Jesuspa sutinpin huchachaniña chaypipas kashayman hina. Huñuykukuqtiykichismi ñoqaqa yuyayniypi qankunawan hukllachasqa kashasaq, hinan Señor Jesuspa atiyninwan

⁵chay runata Satanasman hap'ichinkichis, aycha cuerpon muchuchisqa kananpaq, espirituntaq Señor Jesús kutimuqtin qespichisqa kananpaq.

⁶Manan allinchu chay ruwasqaykichismanta hatunchakuyniykichisqa. ¿Manachu yachankichis huk chhikan qonchulla llapan masata poqochisqanta?

⁷Qankunaqa mana qonchuyoq t'anta hinan kankichis, chayrayku ñawpa qonchuta wikch'uychis, ahinapin qankunaqa mana qonchuyoq mosoq masa hina kankichis. Criston ñoqanchisrayku sacrificasqa karqan, Diospa Alqaspa Pasarparisqan borrego hina.

⁸Chay hinaqa, Diospa Alqaspa Pasarparisqan Yuyarina Fiestata ruwasun ch'uya sonqowan cheqaq-kaywan, chaykunan mana qonchuyoq t'anta hina. Ama ruwasunchu mana allin-kaywan millay ruwaywan, chaykunan qonchuyoq t'anta hina.

⁹Hukkaq cartapin qelqamurqaykichis qhellipi puriqkunawan ama huñukunaykichispaq.

¹⁰Chaywanpas manan nirqanichu: Kay pachapi tukuy qhellipi puriqkunamanta, payllapaq kananta munaqkunamanta, suwakunamanta, ídolo yupaychaqkunamantawan t'aqakuychis, nispachu. Chay hina kanman chayqa, kay pachamanta lloqsinaykichischá kanman.

¹¹Aswanpas qelqamurqaykichisqa: Mayqenpas “Diospi iñiqmi kani” nishaspa qhellipi purishanman, otaq payllapaq kananta munaqpas kanman, ídolo yupaychaqpas kanman, millay k'amiqpas kanman, machaqpas kanman, suwapas kanman chayqa, ama chay hina runawanqa huñukuychischu, amapuni chay hina millaywanqa kuskapas mikhuychischu, nispa.

¹²Ñoqaqa manan mana iñiq runakunataqa juzgaymanchu, Diosmi paykunataqa juzganqa. Qankunaqa iñiq t'aqa runakunatan juzganaykichis. Diospa Simin Qelqan nin: Huchallikuq runataqa qankuna ukhumanta wikch'uychis, nispa.