Read Quechua Cuzco Bible 1988 1 CORINTIOS 6 Bible Online

1 CORINTIOS 6 - Quechua Cuzco Bible 1988 bible

1 CORINTIOS 6

¹Mayqenniykichispas huk iñiqmasinwan ima hawapas churanakuspaqa, ¿imanaqtintaq Diospi mana iñiq juezkunaman quejakuq phawarinkichis? ¿Manachu Diospi iñiq t'aqaman willakunaykichis?

²Icha, ¿manachu yachankichis Diospi iñiqkuna kay pachata juzgananta? Qankunataq kay pachata juzgankichis chayqa, ¿manachu atinkichis chay huch'uy kaqkuna juzgayta?

³¿Manachu yachankichis angelkunatawanpas juzgananchista? ¿Chaychu mana atisunman kay pachapi kaqkuna juzgaytaqa?

⁴Kay pacha kaqkunamanta churanakushaspaykichisqa, ¿imanaqtintaq Diospi mana iñiq juezkunamanqa rinkichis?

⁵Chaytaqa nini qankunaq p'enqakunaykichispaqmi. ¿Manachu qankuna ukhupi hukllapas yuyayniyoq kan, iñiq pura ch'aqwayniykichista juzgay atiq?

⁶Qankunataq ichaqa ch'aqwaspaykichis juezkunaman phawarinkichis Diospi mana iñiqkuna juzgananpaq.

⁷Chay hinaqa, qankuna pura quejanakuspaykichisqa iñiyniykichispin atipasqa rikukunkichis. Aswan allinmi mana chanin-kayta muchukuy, aswan allinmi qechupakuqkunaman qopuypas.

⁸Qankunataq ichaqa kikin wawqe-panaykichista mana chaninta ruwankichis, paykunamantataq qechunkichispas.

⁹¿Manachu yachankichis mana chanin runakunaqa Diospa kamachikushasqanman mana haykunankuta? Ama pantaychischu. Qhellipi puriqkunapas, ídolo yupaychaqkunapas, wasanchaqkunapas, qhari-pura t'inkikuqkunapas,

¹⁰suwakunapas, payllapaq kananta munaqkunapas, machaqkunapas, millay k'amiqkunapas, ch'achukunapas, Diospa kamachikushasqanmanqa manan haykunqakuchu.

¹¹Chay hinan qankunapas wakinniykichisqa karqankichis, chaywanpas ñan Señor Jesuspa sutinpi, Diosninchispa Espiritunpa atiyninpiwan huchamanta mayllisqaña, Diospaq t'aqasqaña, chaninpaq qhawarisqaña kankichis.

¹²Runaqa ninmi: Tukuy imatapas munaspayqa ruwallaymanmi, nispa. Arí, ichaqa manan llapanchu allinninchispaq kanman. Tukuy ima munasqaytapas ruwallaymanmi, ichaqa manan mayqenwanpas atipachikuymanchu.

¹³Runaqa ninmi: Wiksaqa mikhuypaqmi, mikhuypas wiksapaqtaqmi, nispa. Arí, hinapunin chayqa, ichaqa Diosmi iskayninta ismuchipunqa. Cuerpoqa manan qhellipi purinapaqchu, aswanpas Señorta servinapaqmi, Señortaq cuerpota uywan.

¹⁴Señor Jesusta kawsarichimpuq Diosmi ñoqanchistapas atiyninwan kawsarichimpullawasuntaq.

¹⁵¿Manachu yachankichis cuerpoykichisqa Cristowan hukllachasqa kasqanta? Chay hinaqa, ¿Cristoq cuerponmanta t'aqaspaychu rabona warmiman hukllachasaq? ¡Manapunin imaynamantapas!

¹⁶Icha, ¿manachu yachankichis pipas rabona warmiwan puñuqqa iskayninku ch'ulla cuerpolla kasqankuta? Diospa Simin Qelqan nin: Iskayninkun huk cuerpollaña kanqaku, nispa.

¹⁷Pipas Señorwan hukllachakuqmi ichaqa, espiritupi paywan hukllachasqa kapun.

¹⁸Qhellipi puriymanta ayqeychis. Ima huchatapas huk runa ruwan chayqa, manan cuerpon contrachu ruwan, qhellipi puriqmi ichaqa kikin cuerpon contra huchallikun.

¹⁹Icha, ¿manachu yachankichis cuerpoykichisqa Diosmanta chaskisqaykichis Santo Espirituq wasin kasqanta? ¿Manachu yachankichis Santo Espiritupas qankunapi tiyasqanta? Qankunaqa manan cuerpoykichispa dueñonchu kankichis.

²⁰Diosmi preciowan rantirqasunkichis. Chayrayku Diosta yupaychaychis cuerpoykichiswan.