Read Quechua Cuzco Bible 1988 1 CORINTIOS 7 Bible Online

1 CORINTIOS 7 - Quechua Cuzco Bible 1988 bible

1 CORINTIOS 7

¹Cartapi tapukamuwasqaykichistan kutichimuykichis: Arí, allinmi kanman huk qhari mana casarakunmanchu chayqa.

²Ichaqa qhellipi puriy kasqan hawa, sapanka qharipas casarakuchun, sapanka warmipas casarakuchun.

³Qosaqa warminpaq qosa kasqanta hunt'achun, hinallataq warmipas qosanpaq hunt'achun.

⁴Warmiqa manan kikin cuerponmantaqa sapallanchu munayniyoq, aswanpas qosanpiwanmi, hinallataq qosapas manan kikin cuerponmantaqa sapallanchu munayniyoq, aswanpas warminpiwanmi.

⁵Warmi-qhari puñukuyniykichista ama hark'anakuychischu, aswanpas iskayniykichis rimanakuspalla huk pisi tiempo puñukuyniykichista saqenkichis, Diosmanta mañakunapaq tiempoykichis kananpaq. Chaymantaqa kaqlla puñukapunkichis, paqtan saqra huchallichisunkichisman, cuerpoykichista mana sujetayta atiqtiykichis.

⁶Chayta nispayqa yuyaychallaykichismi, manan kamachiykichischu.

⁷Ñoqaqa munaymanmi llapa qharikuna ñoqa hina kananta, ichaqa Diosmi sapankamanpas atiyta qon, wakinman huk-niraqta, wakinmantaq huk-niraqtañataq.

⁸Solterokunatawan viudakunatawanmi nini sapallanku ñoqa hina kanankuta.

⁹Cuerponkuta mana sujetayta atispa ichaqa casarakuchunku, aswan allinmi casarakuy qharimantapas warmimantapas yanqallaña kashanamantaqa.

¹⁰Casarasqakunatan ichaqa mana ñoqachu kamachini, aswanpas Señormi kamachin: Warmiqa ama qosanmanta t'aqakuchunchu,

¹¹t'aqakunmanchus chayqa, ama hukwanqa casarakuchunñachu, qosayoq kayta munaspaqa qosanwan kutinakapuchun, qosapas amataq warminta wikch'upuchunchu, nispa.

¹²Wakinmantaq ichaqa ñoqa nini, manan Señorchu, mayqen wawqepas Diospi mana iñiq warmiyoq kanman chayqa, ama t'aqakuchunchu chay warmin paywan tiyayta munashaqtinqa.

¹³Kaqllataq mayqen panapas Diospi mana iñiq qosayoq kanman chayqa, ama t'aqakuchunchu chay qosan paywan tiyayta munashaqtinqa.

¹⁴Diospi mana iñiq qosaqa iñiyniyoq warminwan hukllachakuspanmi ch'uyanchakapun, hinallataq Diospi mana iñiq warmipas iñiyniyoq qosanwan hukllachakuspan ch'uyanchakapun. Mana chayqa, wawaykichiskunan Diospi mana iñiqkunaq wawankuna hina kanman, kunanqa Diospaq t'aqasqañan kapunku.

¹⁵Ichaqa Diospi mana iñiq kaq qosapas otaq warmipas t'aqakuytapuni munan chayqa, hina t'aqakapuchun. Chay hinapin wawqepas panapas libre kapunqa, Diosqa thak-kaypi kawsananchispaqmi waqyawarqanchis.

¹⁶Qan warmi, ¿qosayki qespichinaykita yachawaqchu? Qanpas qosa, ¿warmiyki qespichinaykita yachawaqchu?

¹⁷Imaynaña kaspapas, sapankaykichis Señorpa qosqasuykichisman hina kawsaychis, imaynachus Dios waqyashaqtin kasharqankichis chayman hinallapuni. Ahinatan kamachini llapan iñiq t'aqakunatapas.

¹⁸Pitapas qhari-kaynin señalasqa kashaqtin Dios waqyarqan chayqa, señalasqa-kayninta ama pakachunchu, otaq pitapas qhari-kaynin mana señalasqata Dios waqyarqan chayqa, ama qhari-kayninta señalakuchunchu.

¹⁹Qhari-kaynin señalasqa kaqpas mana señalasqa kaqpas manan imapaschu, aswanpas Diospa kamachikuyninta kasukuymi ancha chaniyoqqa.

²⁰Chay hinaqa, sapanka runapas imayna kashaqtachus Dios waqyarqan chay kikillanpi qhepakuchun.

²¹Kamachi kashaqtachus Dios waqyarqasunki chayqa, ama chaymantaqa llakikuychu. Kacharisqa kayta atinki chayqa, kacharichikuy.

²²Pipas kamachi kashaspa Señorpi iñinanpaq waqyasqa karqan chayqa, Señorpa kacharichisqanmi kapun. Chay hinallataq pipas libre kashaspa Señorpi iñinanpaq waqyasqa karqan chayqa, Cristoq kamachinmi kunanqa kapun.

²³Diosqa preciowanmi rantirqasunkichis, ama runakunaq kamachinqa kaychischu.

²⁴Chay hinaqa, wawqe-panaykuna, imayna kashaspachus waqyasqa karqankichis, chay hinallapi Dioswan kakuychis.

²⁵Wayna-sipas doncellakunamantan tapukamuwarqankichis. Paykunapaqqa manan Señorqa imatapas kamachiwanchu. Chaywanpas, Señorpa khuyapayakuyninrayku atenekunapaq hina kaspaymi khaynata yuyaychaykichis:

²⁶Sasa tiempokunapitaq kawsashanchis chayqa, allinmi kanman runapaqqa amaña casarakuspa sapallanña qhepakapuynin.

²⁷Ichaqa, ¿warmiyoqchu kanki? Ama t'aqanakuytaqa yuyaychu. ¿Mana warmiyoqchu kanki? Amaña casarakuytaqa yuyaychu.

²⁸Casarakunki chayqa manan huchallikunkichu, doncella sipaspas casarakuspaqa manan huchallikunchu. Casarakuqkunaqa sasakunapin rikukunqaku, ñoqaqa manan chay hinapi rikukunaykichista munaymanchu.

²⁹Wawqe-panaykuna, kaytan niyta munaykichis: Pisi tiempollañan kashan. Chay hinaqa, warmiyoq qharikunaqa mana warmiyoqpas kankuman hina kawsachunku,

³⁰wañuqmanta waqaqkunaqa manapas waqankumanchu hina kawsachunku, kusikuqkunaqa manapas kusisqachu kankuman hina kawsachunku, rantikuqkunaqa manapas paykunaqchu kanman hinata rantisqankuta qhawachunku.

³¹Kay pachapi kaqkunata usachiqkunaqa, manapas usachinkumanchu hina kawsachunku. Kay pachaq imaynachus kasqan rikusqanchisqa tukukapuqllan.

³²Manan llakisqa kanaykichistaqa munanichu. Mana warmiyoq qhariqa, Señorpa kaqninkunapin makilla yuyan, imaynatachus Señorta kusichinantawan.

³³Warmiyoq qharin ichaqa, kay pacha kaqkunapi yuyan, imaynatachus warmita kusichinantawan,

³⁴chaymi payqa iskayninpi yuyan. Mana casarasqa warmipas doncella sipaspas Señorpa kaqninkunapin yuyan, cuerponpipas espiritunpipas Diosllapaqña t'aqasqa kananpaq. Qosayoq warmitaq ichaqa kay pacha kaqkunapi yuyan, imaynatachus qosanta kusichinantawan.

³⁵Chaykunataqa qankunaq allinniykichispaqmi niykichis, manan hark'ayta munaspachu, aswanpas allin chanin-kayman hina kawsanaykichispaqmi, ahinapi mana imaq hark'asqallan Señorta servinaykichispaq.

³⁶Pipas novianta[1] unayña suyarayachikushasqanta reparaspa, manaraq payayashaqtin casarakuyta yuyan chayqa, imachus allin yuyaykusqanta ruwachun. Casarakapuchun, chayqa manan huchachu.

³⁷Ichaqa pipas sonqonpi allinta yuyaykukuspa novianwan mana casarakuyta yuyanchu, manataq imapas tanqanchu, sonqonpitaq yuyaykun novianta doncellata waqaychayta chayqa, allintan ruwan.

³⁸Chay hinaqa, pipas novianwan casarakun chayqa, allintan ruwan, pipas mana casarakuqmi ichaqa aswan allintaraq ruwan.

³⁹Casarasqa warmiqa kamachikuy simiman hinan qosanwan hukllachasqa kashan qosan kawsashanankamaqa, qosan wañukapuqtinmi ichaqa libre kapun piwan casarakunanpaqpas, ichaqa Señorpi iñiqwanpuni.

⁴⁰Ñoqaq yuyaykusqayman hinaqa aswan allinmi kanman chay viuda warmiq mana casarakapuyninqa. Ñoqaqa iñinin Diospa Espiritun kaykunapi yuyaychashawasqanta.