Read Quechua Cuzco Bible 1988 1 CORINTIOS 8 Bible Online

1 CORINTIOS 8 - Quechua Cuzco Bible 1988 bible

1 CORINTIOS 8

¹Idolokunaman mikhuna haywasqamantan tapukamuwarqankichis. Runaqa ninmi: Llapanchismi yachayniyoq kanchis, nispa. Arí, hinapunin. Ichaqa chay yachayqa umatan hoqarichin, munakuymi ichaqa iñiypi wiñachin.

²Pipas yachaqman tukun chayqa, manaraqmi yachananta hinapunichu imatapas yachan.

³Pichus Diosta munakun chaytaqa Diospas reqsinmi.

⁴Chay hinaqa, rimasun idolokunaman mikhuna haywasqamanta. Yachanchismi idolokunaqa mana imapaschu kay pachapi kasqanta, aswanpas huk sapallan Diosqa kasqanta.

⁵Hanaq pachapiña kay pachapiña dios nisqakuna kanman chaypas, hinallataq askha dios nisqakunaña askha señor nisqakunaña kanman chaypas,

⁶ñoqanchispaqqa sapan Dios Yayallan kan. Paymi lliw imaymanata kamarqan, chaymi ñoqanchispas paypaq kanchis. Kallantaqmi sapallan Señorpas, paymi Jesucristo, paywanmi Diosqa kamarqan lliw imaymanata, paymi ñoqanchistapas kawsachiwanchis.

⁷Ichaqa manan llapachu chaytaqa yachanku, wakinqa kunankaman ídolo yupaychayman yachasqa kaspa, idolokunaman sacrificio haywasqatapas mikhushankuman hina yuyanku, chay hinapin conciencianku pisi kallpa kaqtin qhelli kasqankuta yuyakunku.

⁸Manan mikhusqanchisraykuchu Diosqa chaskiwasunchis, manan mikhuspachu aswan allinqa kasun, manataq mana mikhuspapaschu aswan mana allinqa kasun.

⁹Qankunaqa libren kankichis ima ruwanaykichispaqpas, ichaqa allinta cuidakuychis, paqtan iñiypi pisi kallpa kaqkunata ruwasqaykichiswan misk'achiwaqchis.

¹⁰Qanchus chaykunata yachashaspa ídolo yupaychana cheqaspi mikhunaykipaq tiyaykuwaq, hinataq chaypi tiyashaqta rikusunkiman iñiypi pisi kallpa kaq mayqen iñiqpas chayqa, ¿manachu chay pisi kallpa iñiqqa qanta rikuspa idolokunaman sacrificio haywasqata mikhullanqataq?

¹¹Qanqa chaykunata yachashaspa ruwasqaykiwanmi iñiypi pisi kallpa kaqta waqllichipunki. Payraykun Cristoqa wañurqan.

¹²Chay hinatan, iñiypi pisi kallpa kaqkunaq conciencianta k'irispa, kikin Cristo contra huchallikushankichis.

¹³Chay hinaqa, mikhuna mikhusqaychus iñiqmasiyta misk'achin chayqa, manan hayk'aqpas aychata mikhusaqchu, ama iñiqmasiyta huchallichinaypaq.