Read Quechua Cuzco Bible 1988 1 CORINTIOS 9 Bible Online

1 CORINTIOS 9 - Quechua Cuzco Bible 1988 bible

1 CORINTIOS 9

¹¿Manachu ñoqaqa libre kani? ¿Manachu Jesucristoq apostolnin*f** kani? ¿Manachu ñoqaqa Señorninchis Jesustaqa rikurqanipuni? ¿Manachu qankunaqa Señorpaq llank'aqtiy iñirqankichis?

²Hukkunapaq mana apostolchu*f** kani chaypas, qankunapaqqa apostolpunin*f** kani, qankunaq Señorpi iñisqaykichismi sut'inchan apostolpuni*f** kasqayta.

³Ñoqa contra rimaqkunamanmi kay hinata nini:

⁴Llank'ashaspaykuqa, ¿manachu mikhuytapas ukyaytapas atiyku?

⁵¿Manachu atiyku iñiq warmiykuta pusakuyta, imaynan wakin apostolkunapas*f**, Señorpa wawqenkunapas, Pedropas pusakunku hinata?

⁶Icha, ¿ñoqawan Bernabellawanchu makiykuwan llank'apakuspa Diosmanta allin willakuykunata willanayku?

⁷¿Mayqen soldadotaq pay kikinpaq qolqenta pagaspa cuartelpi servin? ¿Pitaq uvasta plantaspa rurunta mana mikhunchu? ¿Pitaq ovejata michispa lechenta mana ukyanchu?

⁸Chayta nispaqa, ¿runaq yuyaykusqallantachu rimani? ¿Manachu Diospa kamachikuy simin chay hinata nin?

⁹Moisespa qelqasqan kamachikuy simin kay hinata nin: Aman erapi saruq torotaqa senq'apankichu, nispa. ¿Diosqa torokunamanta llakipakuspachu chayta nirqan?

¹⁰¿Manachu ñoqanchispaq chaytaqa nirqan? Arí, chay kamachikuyqa allinninchispaqmi qelqasqa karqan. Chakra llank'aqpas era saruchiqpas ruruta hoqariyta suyakuspan llank'an.

¹¹Chay hinaqa, ñoqayku qankuna ukhupi muhu t'akaq hina allin willakuykunata t'akayku chayqa, ¿manachu atiyku qankunamanta kawsanaykupaq imallatapas chaskiyta?

¹²Hukkunachus qankunamanta chaskinku chayqa, ¿manachu ñoqaykuqa aswantaraq chaskinayku? Chaywanpas manan ñoqaykuqa chay chaskinaykuta mañakurqaykikuchu, aswanmi tukuy imaymanata muchuyku, Cristomanta allin willakuykuna ama hark'asqa kananpaq.

¹³Qankunaqa yachankichispunin Dios yupaychana wasipi llank'aqkunaqa chay wasipi kaqkunamanta mikhusqankuta, altarpi llank'aqkunapas altarpi haywasqa sacrificiomanta chaskisqankuta.

¹⁴Chay hinallataqmi Señorpas kamachikurqan allin willakuykunata willaqkunapas chaypi llank'asqankumanta kawsanankupaq.

¹⁵Chaypas manan ñoqaqa imatapas qankunamantaqa mañakurqaykichischu, manataqmi kay qelqatapas imallatapas qowanaykichista munaspachu qelqamuykichis. Allin willakuykunata yanqallan willasqaymanta alabakuyniyta pipas qechuwanman chayqa, aswan allinmi wañuyniyqa kanman.

¹⁶Ñoqapaqqa manan hatunchakunaypaqchu Cristomanta allin willakuykunata willayqa, aswanpas willanaypaq churasqapunin kani. ¡Ay ñoqamanta, manachus allin willakuykunata willayman chayqa!

¹⁷Chay hinaqa, kikiypuni yuyaykukuspachus ruwasaq chayqa, chaskisaqmi premiota, manaña kikiypuni yuyaykukuspachu ruwasaq chaypas allin willakuykunata willanaypaq Diospa kamachisqanpunin kani.

¹⁸¿Imataq chay premioyri? Premioyqa Cristomanta allin willakuykunata mana pagasqalla willanaymi. Cristomanta allin willakuykunata willasqaymantaqa chaskinaymi pagoyta, ichaqa manan chayta qhawarayarqanichu.

¹⁹Chayraykun mana piqpa kamachin kashaspaypas, llapaq kamachin kapuni, aswan askha runata Cristoman pusanaypaq.

²⁰Judío runakunawan kashaspayqa Judío runa hinan ñoqapas kani, paykunata Diospaq tarinayrayku. Ñoqaqa kamachikuy simipi kaqkunawan kashaspayqa, kamachikuy simipipas kashayman hinan kawsani paykunata Diosman pusanayrayku, manaña kamachikuy simipi ñoqa kashani chaypas.

²¹Mana kamachikuy simipi kaqkunawan kashaspayqa paykuna hinan kawsani, paykunata Diosman pusanayrayku. Chaywanpas manan Diospa kamachikuynintaqa wikch'unichu, aswanpas Cristoq kamachikuyninpin ñoqaqa kashani.

²²Iñiypi pisi kallpakunawan kashaspayqa, ñoqapas pisi kallpa hinallataqmi kani, paykunatapas Diosman pusanayrayku. Lliw runapaqmi paykuna hina kani, imaynallamantapas wakinta Cristopi iñichinaypaq.

²³Tukuy chaykunataqa Cristomanta allin willakuykunaraykun ruwani, chay willakuypa saminchanwan saminchasqa kanaypaq.

²⁴Qankunaqa yachankichismi estadiopi llallinakuspa phawaqkunaqa llapallanku phawasqankuta, ichaqa hukllan premiota chaskin. Qankunapas phawashaq hina kawsaychis premiota chaskinaykichispaq.

²⁵Pipas llallinakuypi phawaqqa tukuy imaymanamantan t'aqakun. Paykunaqa ch'akipuq pilluta chaskinankupaqmi chayta ruwanku, ñoqanchismi ichaqa mana ch'akipuq pilluta chaskinanchispaq t'aqakunchis.

²⁶Ñoqapas chay hinatan phawani, ichaqa manan ñawsa hinachu. Chay hinatan maqanakuni, ichaqa manan ch'usaqman saqmaq hinachu,

²⁷aswanmi cuerpoyta maqani, hinaspa kasuchikuni, paqtan hukkunaman yachachishaspayña ñoqa kikiy wikch'usqa kayman.