Read Quechua Cuzco Bible 1988 2 CORINTIOS 1 Bible Online

2 CORINTIOS 1 - Quechua Cuzco Bible 1988 bible

2 CORINTIOS 1

¹Diospa munayninrayku Jesucristoq apostolnin*f** Pablo, wawqe Timoteopiwan qelqamuni Corinto llaqtapi kashaq Diospa iñiq t'aqanman, Acaya hap'iynintinpi kashaq Diospi iñiq llapallan wawqe-panakunamanwan:

²Dios Yayanchis, Señor Jesucristopiwan sumaqta qhawarisunkichis thak-kaynintapas qosunkichis.

³Yupaychasun Señorninchis Jesucristoq Yayan Diosta, payqa khuyapayakuq Yayan, tukuy imapi sonqochakuq Diostaq.

⁴Diosmi tukuy llakikuyniykupi sonqochawanku, ñoqaykupas ima llakipiña kaqkunatapas Diospa sonqochawasqanku sonqochaywan sonqochanaykupaq.

⁵Imaynan Cristowan hukllachasqa kaspa sinchita ñak'ariyku, chay hinallataqmi Cristorayku Diosqa anchata sonqochawanku.

⁶Ñoqayku ñak'ariyku chayqa, qankunaq sonqochasqa qespichisqa kanaykichispaqmi, hinallataq sonqochasqa kayku chayqa, qankunaq sonqochasqa kanaykichispaqmi, ahinapi ñak'arisqaykuta hina ñak'arispaykichis pacienciakuspa allinta sayanaykichispaq.

⁷Qankunapiqa anchatapunin confiakushayku, yachaykun imaynan ñak'ariq-masiyku kankichis, chay hinallataq sonqochasqa-masiyku kanaykichista.

⁸Wawqe-panaykuna, Asia provinciapi sinchi llakipi kasqaykumantaqa yachanaykichistapunin munayku. Ahinaqa sinchi llakiq nit'isqanmi karqayku, chaymi kawsanaykutapas manaña yuyarqaykuñachu.

⁹Ñoqayku kikiykun wañuchinapaq huchachasqa kasqaykuta hinaña yuyasharqayku, ichaqa chaymi yachachiwarqanku ama ñoqayku kikiykuman hap'ipakunaykupaq, aswanpas wañusqakunata kawsarichimpuq Diosllaman hap'ipakunaykupaq.

¹⁰Diosmi chay hina manchay wañuymanta qespichiwarqanku, hinaspa qhepamanpas qespichiwanqaku. chaymi suyakushayku Diosllapuni qespichiwanankuta,

¹¹qankunapas ñoqaykupaq Diosmanta mañapuwaqtiykikuqa. Askha runan ñoqaykupaq Diosmanta mañakunqa, hinan Diosqa saminchawanqaku, chaymi askha runa Diospa saminchawasqankumanta graciasta qonqaku.

¹²Ñoqaykuq kusikuyniykuqa kaymi: Concienciaykun willawanku ch'uya sonqo-kaywan cheqaq sonqo-kaywan ima kay pachapi allin purisqaykuta, astawanqa qankunawan imaynatachus purisqaykuta, ichaqa manan runaq yachayninwanchu, aswanpas Diosmi khuyapayakuyninpi yanapawarqanku allinta purinaykupaq.

¹³Qankunaman qelqamusqaykuqa leenaykichispaq entiendenaykichispaq hinallan. Kunanqa wakillantaraqmi entiendewankiku, ichaqa munanin hunt'asqatapuni entiendewanaykichista. Ahinapin Señor Jesús kutimunan p'unchaypi qankunaqa ñoqaykumanta alabakunkichis, imaynan ñoqaykupas qankunamanta alabakusaqku hinata.

¹⁵Chay hinata yuyaykuspaymi, ñawpaqta qankuna waturikuq hamuyta munarqani, iskay kutipitaq qankunata yanapaykunaypaq.

¹⁶Ñoqaqa yuyaykurqanin Macedoniata riq hina qankunata watukuyta, kaqllataq Macedoniamanta kutimuspaypas qankunata watukuyta. Chaymantataq Judeaman riqtiy yanapaykuwanaykichista.

¹⁷Ñoqari, ¿hawan-ukhunta yuyaykuspachu chayta ruwarqani? Icha, ¿qankuna creenkichischu mana iñiq runa hina yuyaykuq kasqayta? Mana iñiqkunan ninku: Arí, nispa, chaymantaqa: Manan, nispañataq.

¹⁸Diosqa hunt'aqmi, paymi yachan qankunaman: Arí, nispaykuqa, manataqmi: Manan, niykumanchu.

¹⁹Ñoqaqpas Silvanoqpas Timoteoqpas qankunaman willasqayku Diospa Churin Jesucristoqa manapunin “Arí” nishaspa, “Manan”, niqchu. Aswanpas Diosqa Cristowanmi: Arí, nillanpuni.

²⁰Diospa llapa prometesqankunaqa Jesucristopin hunt'akun, chayraykun Diosta yupaychaspaqa Jesucristoq sutinpi: Ahinapuni kachun, ninchis.

²¹Diosmi qankunatapas ñoqaykutapas Cristowan hukllachaspa allinta takyachiwanchis, payta servinanchispaqmi akllawarqanchispas.

²²Hinaspa paypa runan kasqanchista rikuchinanpaq sellowarqanchis, Santo Espiritutataq chaskinanchis señal kananpaq sonqonchispi churawarqanchis.

²³Almay hawan Diospa ñawpaqenpi sut'ita rimarini, paymi yachan, qankunata mana llakichinayrayku Corinto llaqtata manaraq hamusqayta.

²⁴Iñiyniykichispiqa allin takyasqañan kashankichis, chaymi iñiyniykichispi mana kamachikuytachu munayku, aswanpas kusikunaykichispaqmi yanapaykuyta munayku.