Read Quechua Cuzco Bible 1988 2 CORINTIOS 10 Bible Online

2 CORINTIOS 10 - Quechua Cuzco Bible 1988 bible

2 CORINTIOS 10

¹Ñoqas qankunawan kashaspa huch'uyyaykukuni, qankunamanta karupi kashaspataqsi mana manchaspa rimani, chaymi ñoqa Pablo Cristoq llamp'u sonqo munakuq sonqo kasqanrayku

²valekuykichis, qankunaman watukuq hamuqtiyqa amayá k'arakta rimachiwankichischu. Pikunachus runa yuyayman hina purisqaykuta huchachawaqniykunataqa k'araktapunin nisaq.

³Runalla kayku chaypas, manan mana iñiyniyoq runa hinachu maqanakuyku.

⁴Maqanakunayku armakunaqa manan kay pachaq arman hinachu, aswanpas chaykunaqa Diospa qowasqanku atiyniyoq armakunan, allin pukarakunata thuninapaq.

⁵Ahinatan pantasqa yuyaykuykunatapas Diospa yachayninta hark'aq tukuy hatunchakuykunatapas thuniyku. Hinallataq runakunaq tukuy yuyaynintapas atipaspa Cristoman kasuchiyku.

⁶Qankuna hunt'asqata kasukuqtiykichismi, llapa mana kasukuqkunata muchuchinaykupaq listo kashayku.

⁷Qankunaqa rikch'aynillantan imatapas qhawankichis. Pipas sut'ita yachan payqa Cristoq kasqanta chayqa, yachanallantaqmi imaynan paypas Cristoq, chay hinallataq ñoqaykupas Cristoq kasqaykuta.

⁸Atiyniykumanta aswantapuniraq hatunchakuni chaypas, manan imamantapas p'enqakunichu. Señorqa chay atiyta qowarqanku qankunata iñiypi wiñachinaykupaqmi, manan qankunata urmachinaykupaqchu.

⁹Manan munanichu: Pabloqa cartankunawanmi manchachikun, nispa niwanankutaqa.

¹⁰Hukkunan ninku: Cartankunapi kamachikuspanqa sinchi k'araktan riman, pay kikinwan tupasqataq mana kasuylla, rimayninpas mana kasunapaq hinan, nispanku.

¹¹Chay hina rimaq runaqa allinta yachachun, imaynan cartakunata qelqamuspa nimurqayku, chay hinallataqmi qankunaman chayamuspayku ruwasaqku.

¹²Paykuna kikinkuta hatunchakuq wakin runakunawanqa manan kuskachakuytapas paykunawan yupasqa kaytapas munaykuchu. Paykunaqa kikinku tupukuspanku, paykuna pura kuskachakuspanku ima, mana yuyayniyoq kanku.

¹³Ñoqaykuqa iman kaqllamantan hatunchakusaqku, may cheqastachus Diosqa rikuchiwarqanku llank'anaykupaq chayllamantan hatunchakusaqku, qankunapas chay llank'anayku ukhupin kashankichis.

¹⁴Chayrayku, qankunaman Cristomanta allin willakuykunata willanaykupaq hamuspaykuqa, Diospa rikuchiwasqanku cheqasllapin llank'arqayku.

¹⁵Manan hukkunaq llank'asqanwanchu hatunchakuyku, aswanpas suyashaykun iñiyniykichis wiñaqtin qankuna ukhupi aswanta llank'anaykuta, ichaqa llank'anayku cheqaskunallapi.

¹⁶Chaymantataq qankunamanta aswan haqayneqkunakamaraq Cristomanta allin willakuykunata willamusaqku, manan hukpa llank'asqanman haykuspachu, manataq hukpa ruwasqanpi hatunchakuspachu.

¹⁷Diospa Simin Qelqan nin: Hatunchakuyta munaqqa Señor Diospa ruwasqanwan hatunchakuchun, nispa.

¹⁸Pay kikinta hatunchakuq runaqa manan allinpaq qhawasqachu, aswanpas Señorpa hatunchasqan runan allinpaq qhawasqaqa.