Read Quechua Cuzco Bible 1988 2 CORINTIOS 12 Bible Online

2 CORINTIOS 12 - Quechua Cuzco Bible 1988 bible

2 CORINTIOS 12

¹Alabakullasaqpunin hinaña mana allinniypaqchu chaypas. Kunanqa rimasaq Señorpa rikuchiwasqankunamanta sut'inchawasqankunamantawan.

²Cristopi iñiq huk runatan reqsini, paymi chunka tawayoq wataña kinsakaq hanaq pachakama hoqarisqa karqan. Cuerpontinchus mana cuerpontinchus hoqarisqa karqan chaytaqa manan yachanichu, Diosmi yachan.

³Cuerpontinña mana cuerpontinña hoqarisqa karqan chaypas, chaytaqa Diosllan yachan,

⁴ichaqa yachanin sami pachaman apasqa kasqanta, chaypin mana rimay atina simikunata uyarirqan, chaykunataqa manan runaqa rimarinanchu.

⁵Chay runamantan hatunchakusaq, ama ñoqa kikiymantaqa hatunchakusaqchu, aswanpas pisi kallpayoq kasqallaymantan hatunchakusaq.

⁶Hatunchakuytaña munayman chaypas, manan loqhe kaychu rimayman, aswanpas cheqaq kasqallantan rimayman. Ichaqa upallakullasaq, paqtan pipas rikuwasqanmanta otaq uyariwasqanmanta aswanpaqraq hap'iwanman.

⁷Ama Diospa musphana rikuchiwasqankunamanta hatunchakunaypaqtaq khiska t'ipasqa hina nanayta cuerpoypi churawarqan, Satanaspa kamachin saqmaykachawaqtin ama sinchita hatunchakunaypaq.

⁸Chaymi kinsa kutitaña Señorta rogakurqani chay nanayta ñoqamanta qechuwananpaq.

⁹Señormi ichaqa niwarqan: Munakuynillaymi tukuy hayk'a necesitasqaykipaqpas. Pisi kallpayoq kaqtiykin atiyniyqa aswanta rikuchikun, nispa. Chayraykun anchata kusikuni pisi kallpayoq kasqaymanta, Cristoq atiynin ñoqata p'istuykuwananpaq.

¹⁰Chaymi kusikuni pisi kallpayoq kaspay, k'amisqa kaspay, pisichikuspay, qatiykachasqa kaspay, Cristorayku sinchi sasachakuypi kaspaypas. Pisi kallpayoq kaspaymi aswan atiyniyoqqa kani.

¹¹Hatunchakuspaymi mana yuyayniyoq hina kani, qankunan mana yuyayniyoqman tukuchiwankichis. Ñoqaqa qankunaq hatunchasqaykichismi kanay karqan, ñoqaqa chay allinnin apostolniykichiskunamantaqa*f** manan imapipas pisichu kani, mana imapaq serviq kashaspaypas.

¹²Ancha pacienciawan qankuna ukhupi llank'asqaymi cheqaq apóstol*f** kasqaytaqa sut'inchan señalkunawan, milagrokunawan, musphana ruwaykunawan ima.

¹³¿Imaynapitaq wakin iñiq t'aqakunamantaqa pisicharqaykichis? Icha, ¿qankunata mana gastachispaychu pisicharqaykichis? ¡Chay mana allin ruwasqaytaqa pampachaykuwaychisyá!

¹⁴Kunanqa, wakichikuniñan kinsa kutipi qankunata watukunaypaq, manataqmi gastachisqaykichischu. Manan kaqniykichistachu maskhani, aswanpas qankuna kikiykichistan munani, manan wawakunachu tayta-mamanpaqqa qolqeta huñunan, aswanpas tayta-mamankunan wawankupaqqa huñunan.

¹⁵Qankunaq allinniykichispaqmi ñoqaqa ancha kusisqa imachus kapuwaqniyta gastakusaq, hinaspa kallpaytapas tukukusaq. Qankunata anchata munakushaqtiyqa, ¿pisitachu qankuna munakuwankichisman?

¹⁶Yachankichismi qankunata mana gastachisqayta, chaywanpas wakinkunan ninku: Yuyaysapa kaspanmi llullallawan q'otuwanchis, nispanku.

¹⁷¿Mayqen kachamusqay runawantaq qankunata imapipas q'otuchirqaykichis?

¹⁸Titotan valekurqani qankuna watukuq hamunanpaq, paytaqa huk wawqetawanmi kachamurqani. Icha, ¿Titochu qankunata imapipas q'oturqasunkichis? Iskayniykupas huk yuyaynillayoqmi kaq sonqollayoqmi llank'arqayku.

¹⁹Icha qankunaqa yuyankichispaschá qankunaman qelqamuspa tupapakushasqaykuta. Manan hinachu, aswanpas Diospa qayllanpin Cristoq kamachin kaspa rimayku. Ancha munasqa wawqe-panaykuna, tukuy imatapas ruwayku iñiypi wiñanaykichispaqmi.

²⁰Manchakushanin, paqtan chayamuspay mana munasqayta hinachu tariykichisman, kaqllataq qankunapas mana munasqaykichista hinachu tariwankichisman. Paqtan qankuna ukhupi kanman churanakuykuna, envidiakuykuna, phiñachinakuykuna, t'aqanakuykuna, hukpa contranpi rimaykuna, simi apa-kaykuna, hatunchakuykuna, ch'aqwaykuna ima.

²¹Manchakushallanitaqmi, paqtan chayamuqtiy qankuna ukhupi Diosniy huk kutitawan k'umuykachiwanman, hinaspa waqayman qankuna ukhupi askha wawqe-panakuna ñawpaq hina huchallikushallasqankumanta. Paykunan millay-kaymanta, qhellipi puriymanta, viciokunapi puriymantawan Diosman mana kutirikunkuchu.