Read Quechua Cuzco Bible 1988 2 CORINTIOS 2 Bible Online

2 CORINTIOS 2 - Quechua Cuzco Bible 1988 bible

2 CORINTIOS 2

¹Chaymi yuyaykurqani qankunaman huktawan watukuq hamuspa ama llakichiyta.

²Ñoqachus llakichiykichisman chayqa, ¿pitaq ñoqata kusichiwanman? Qankunallapunin, llakichisqay kaqkuna kusichiwankichisman.

³Chayllatataqmi qelqamurqaykichispas, chayamuqtiy ama llakichiwanaykichispaq, aswanpas kusichiwanaykichispaq. Ñoqaqa allintapunin yuyaykurqani, kusikuqtiyqa llapaykichispas kusisqallataq kanaykichista.

⁴Chay cartataqa sinchi llakisqan sonqoypi mayta waqaspan qelqamurqaykichis, ichaqa manan llakichinaypaqchu, aswanpas anchatapuni qankunata munakusqayta yachanaykichispaqmi.

⁵Pipas llakichirqan chayqa, manan ñoqatachu llakichiwarqan, aswanpas llapaykichistan imapipas llakichisunkichis, chaytaqa nini manan yapaykuspachu.

⁶Qankunaqa huñukuspan yaqa llapa chay runata wanachirqankichisña, chayllaña kachun.

⁷Kunanqa payta pampachapuychis, hinaspa sonqochaychis, paqtan sinchi llakiq ñit'isqan kanman.

⁸Chayrayku valekuykichis wakmanta payta munaykakapunaykichista.

⁹Qelqamurqaykichisqa qankunata probanaypaqmi, kasukunkichischus manachus chayta yachanaypaq.

¹⁰Pitapas qankuna pampachankichis chayqa, ñoqapas pampachallanitaqmi, imatapas ñoqa pampachanay kaqtinqa, qankunaraykun Cristoq qayllanpi pampachani,

¹¹ahinapi Satanasqa ama imapipas atipawananchispaq. Ñoqanchisqa allintan yachanchis imaynatachus yuyaykusqankunataqa.

¹²Troas llaqtaman Cristomanta allin willakuykunata willanaypaq chayaqtiymi, Señorpaq kusa llank'ana tupawarqan.

¹³Ichaqa sonqoymi mana tiyaykuwarqanchu, wawqenchis Titowan mana tupasqay hawa. Chaymi iñiq-masikuna kacharpariwaqtinku Macedonia provinciaman puririrqani.

¹⁴Diosman gracias kachun, paymi atipaq Jesucristowan ñoqanchista pusaspa atipachillawanchispuni, ñoqanchiswantaq Jesucristomanta willakuytapas reqsichin huk sumaq q'apayta hina hinantinman ch'eqerichispa.

¹⁵Ñoqanchisqa Cristoq Diosman haywasqan incienso q'apay hinan kanchis hanaq pachaman rishaqkuna ukhupipas chinkayman rishaqkuna ukhupipas.

¹⁶Chinkayman rishaqkunapaqqa chay incienso q'apayqa wañuchiq asnaymi, hanaq pachaman rishaqkunapaqmi ichaqa kawsachiq sumaq q'apay. ¿Pitaq chaykunata willananpaq hinari kanman?

¹⁷Ñoqaykuqa manan Diospa siminta waqllichispa negociaqchu kayku, imaynan askha runakuna ruwanku hinachu, aswanpas Cristowan hukllachasqa kaspan Diospa kachasqankuna hina paypa qayllanpi ch'uya sonqowan rimayku.