Read Quechua Cuzco Bible 1988 2 CORINTIOS 3 Bible Online

2 CORINTIOS 3 - Quechua Cuzco Bible 1988 bible

2 CORINTIOS 3

¹Chaykunata nispaykuqa, ¿wakmantachu alabakushayku? Manan. Icha, ¿hukkuna hinachu reqsichikuy cartataraq qankunaman haywanayku? Icha, ¿qankunamantachu reqsichikuy cartata mañakunayku? Manan,

²aswanpas qankuna kikiykichismi reqsichikuy cartaykuqa kankichis, sonqoykupi qelqasqa llapa runakunaq reqsisqan leesqan ima.

³Qankunaqa Cristoq sut'i cartanmi kankichis, ñoqaykuq qosqayku, manan tintawan qelqasqachu, aswanpas kawsaq Diospa Espiritunwanmi, manan p'alta rumipi qelqasqachu, aswanpas runaq sonqonpi qelqasqan.

⁴Chaykunataqa niyku Cristoq ruwasqanrayku Diospi confiakuspaykun.

⁵Manan ñoqayku kikiykumanta imatapas ruwayta atiq kasqaykuraykuchu, aswanpas atiq kasqaykuqa Diosmantan hamun.

⁶Payllataqmi mosoq rimanakuypi servinaykupaq atiyta qowarqanku, manan qelqasqa kamachikuypichu, aswanpas Santo Espiritupin. Qelqasqa kamachikuyqa wañuchinmi, Santo Espiritutaq ichaqa kawsachin.

⁷Moisespa qelqasqan kamachikuy simiqa p'alta rumipi seq'esqan karqan. Moisespa uyanqa anchatapunin k'ancharirqan, chaymi Israel runakunaqa paypa uyanta mana qhawayta atirqankuchu sinchita lliphllikisqanrayku, chaywanpas chay lliphllikiyqa pisiyapusharqanmi. Wañuchiq kamachikuy simi ancha atiywan k'ancharirqan chayqa,

⁸¡aswantaraqmi k'ancharin Santo Espirituq apamuwasqanchis mosoq rimanakuymanta willakuyqa!

⁹Huchachaq kamachikuy simichus anchata k'ancharirqan chayqa, ¡aswantaraqmi k'ancharin mosoq rimanakuyqa! Chay hawan Diosqa chaninpaq qhawariwanchis.

¹⁰Kamachikuy simiqa atiyniyoqmi ñawpaq karqan, kunantaq aswan atiyniyoq mosoq rimanakuywan tupanachisqa mana imapaschu kapun.

¹¹Chay pisi tiempollapaq kamachikuy atiyniyoq karqan chayqa, aswan atiyniyoqraqmi wiñaypaq mosoq rimanakuyqa.

¹²Chaymi chay hina suyakuyniyoq kaspa mana mancharispa willayku.

¹³Manan Moisés hinachu ruwayku, payqa huk qatawanmi uyanta qatakurqan, Israel runakuna chay chinkashaq lliphlli-kaypa tukukapusqanta ama rikunankupaq.

¹⁴Ichaqa paykunaq yuyayninkun tutayaykurqan, chaymi kunan p'unchaykama ñawpa rimanakuy qelqata leespa mana entiendenkuchu qatawan hina pakasqalla kashasqanrayku. Chay qataqa Cristollawanpunin qataray atikun.

¹⁵Chaymi kunan p'unchaykamapas Moisespa qelqankunata leespaqa manapuni sut'itachu entiendenku, chay qata pakashasqanrayku.

¹⁶Pipas Señorman kutirikuqtinmi ichaqa, chay qataqa qatarasqa kanqa.

¹⁷Señorqa Espiritun. Maypichus Señorpa Espiritun kashan chaypin runakunaqa kacharisqa kanku.

¹⁸Chay hinaqa, llapanchismi mana qatasqa uyayoq kaspanchis espejo hina Señorpa lliphlli-kayninwan k'ancharinchis. Señorqa Espiritun, paymantan lliphlli-kayqa k'anchamun, chay lliphlli-kaymi ñoqanchistaqa t'ikrashawanchis Señorman rikch'akuq kananchispaq, ahinapin ñoqanchisqa aswan-aswanta lliphlli-kayninwan k'ancharinchis.