Read Quechua Cuzco Bible 1988 2 CORINTIOS 7 Bible Online

2 CORINTIOS 7 - Quechua Cuzco Bible 1988 bible

2 CORINTIOS 7

¹Munasqa wawqe-panaykuna, chaykunatan Diosqa prometewanchis. Chayrayku tukuy qhelli kaqmanta ch'uyanchakusun aycha cuerponchispipas espiritunchispipas, Diosta manchakuspataq aswan-aswan ch'uyata kawsasun.

²Ñoqaykupaq sonqoykichis kachun, manan pitapas mana allinta ruwarqaykuchu, manan pitapas waqllichirqaykuchu, manan pitapas q'oturqaykuchu.

³Chaytaqa manan qankunata huchachanaypaqchu nini. Aswanpas ñawpaqtañan nirqaykichis: Qankunaqa sonqoykupin kashankichis, wañuspapas kawsaspapas kuskallan kanchis, nispa.

⁴Anchatan qankunapi confiakuni, anchatan qankunamanta alabakuni, tukuy imaymanata muchushaspaykupas anchatapunin q'ochukunipas kallpachakunipas.

⁵Macedoniaman chayasqaykumantapachaqa manan chhikallantapas samarirqaykuchu, aswanmi tukuyneqpi sasachakuykunapi karqayku, muyuriqniykupi churanakuykuna, sonqoykupitaq llakikuykuna.

⁶Ichaqa pisipaqkunata sonqochaq Diosmi Titoq chayamusqanwan sonqochawarqanku.

⁷Manataqmi paypa chayamusqallanwanchu sonqochakurqayku, aswanpas Titota sumaqta sonqochasqaykichista yachaspan sonqochakurqayku. Paymi willawarqanku anchata munawasqaykichista, mayta llakikusqaykichista, ñoqa sonqo kasqaykichistapas, chaymi astawanraq kusikurqani.

⁸Qelqamusqay cartaña llakichirqasunkichis chaypas, manan kunanqa ñakapakunichu. Arí, ñawpaqtaqa ñakapakurqanin chay qelqamusqay carta pisi tiempollapaq llakichisqasuykichis hawa.

⁹Kunantaq anchata kusikuni, manan llakikusqaykichismantachu, aswanpas chay llakikuy hawa Diosman kutirikusqaykichismantan. Diospa munayninman hinan llakikurqankichis, chay hinaqa, manan ima mana allintapas ruwarqaykikuchu.

¹⁰Diospa munayninman hina llakikuyqa qespikunapaqmi huchata saqepuspa Diosman kutirichin, chaymi chaymantaqa mana pipas llakipakunchu. Kay pachaq llakikuyninmi ichaqa wañuchin.

¹¹¡Qhawariychis Diospa munayninman hina chay llakikusqaykichista! Chay llakikuyqa k'uchi kaytan yachachirqasunkichis, mana huchayoq kasqaykichis rikhuriytan rikch'arichirqasunkichis, mana allin contran phiñachirqasunkichis, imachus kananmantan manchapachirqasunkichis. Chaymantataq ñoqawan tupaykuytapuni munarqankichis, wañuyta atiwarqankichis, mana chanin ruwaqtapas wanachiyta yuyaykurqankichis. Tukuy chaykunawanmi sut'incharqankichis chay sasachakuypi mana huchayoq kasqaykichista.

¹²Chay hinaqa, cartata qelqamuspayqa manan chay huchallikuq runapi anchata yuyaspaychu qelqamurqaykichis, manallataq llakichisqa runapi yuyaspapaschu, aswanpas Diospa ñawpaqenpi ñoqaykupaq k'uchi kasqaykichista reparanaykichispaqmi.

¹³Chaymi sonqochakusqaykichismanta kusikurqayku. Astawanraqqa kusikuyku Titota ancha kusisqata rikuspaykun, paytaqa qankunan llapaykichis allintapuni sonqonta llanllarichimusqankichis.

¹⁴Ñawpaqta qankunamanta Titoman willaspaymi alabakurqani, kunantaqmi chaymanta mana p'enqaypichu rikukuni, aswanqa qankunaman tukuy ima nisqaykupas cheqaqmi karqan, hinallataq Titoman nisqaykupas cheqaqllataq karqan.

¹⁵Chaymi Titoqa astawanraq qankunata munakusunkichis, llapaykichispa kasukusqaykichista yuyarispa, hinallataq huch'uyyaykukuywan manchakuywan ima payta chaskisqaykichista yuyarispa.

¹⁶Tukuy imapi qankunamanta mana iskayrayaspaymi kusikuni.