Read Quechua Cuzco Bible 1988 2 CORINTIOS 8 Bible Online

2 CORINTIOS 8 - Quechua Cuzco Bible 1988 bible

2 CORINTIOS 8

¹Ahinallataq, wawqe-panaykuna, yachanaykichista munayku Macedonia provinciapi kaq iñiq t'aqakunaman Diospa khuyapayakuynin mast'arikusqanta.

²Paykunaqa sinchitapuni ñak'arishaspankupas anchatan kusikurqanku, khuyay wakcha kashaspankupas qoykukuq kayninkupiqa qhapaqkuna hinan llimp'arishaqta qorqanku.

³Ñoqan allinta yachani, paykunaqa atisqankuman hina qosqankuta, hinallataq atisqankumantapas astawanraq qosqankuta.

⁴Paykuna kikinkun anchatapuni valekuwarqanku: Ñoqaykupas iñiqkunata yanapaykuytapunin munayku, nispa.

⁵Manan yuyaykusqaykuman hinallachu qorqanku, aswanpas Señormanmi ñawpaqtaqa paykuna kikinkuta qokurqanku, hinaspañan ñoqaykumanqa Diospa munayninman hina qowarqanku.

⁶Chaymi Titota tanqarqayku qankuna ukhupipas kay yanapay qokuy huñuyta hunt'ananpaq, imaynan ñawpaqta pay qallarirqan hinata.

⁷Qankunaqa tukuy imapipas allinpunin kankichis: iñiypi, rimaypi, yachaypi, tukuy k'uchi-kaypi, ñoqaykuta munakuypipas, chay hinallataq yanapayta qoypipas allinpuni kaychis.

⁸Chaytaqa manan kamachikuyta hinachu nini, aswanpas hukkunaq k'uchi kasqallantan willamuykichis, chaywan qankunaq munakuyniykichis cheqaqpunichus kasqanta yachanaypaq.

⁹Yachankichisñan Señorninchis Jesucristoq munakuq sonqo kasqanta, paymi qhapaq kashaspa, qankunarayku wakchayarqan, wakcha-kayninwan qankuna qhapaqyachisqa kanaykichispaq.

¹⁰Kunanmi yuyaychaykichis imatachus ruwanaykichista: Aswan allinmi qayna wata qallarisqaykichista hunt'anaykichis. Qankunan ñawpaqtaqa qoyta munarqankichis, hinaspa qorqankichis.

¹¹Chay hinaqa, chay ruwayta hunt'aychis, imaynan usqhaylla munarqankichis, chay hinallataq ruwanaykichispaqpas kaychis, kasqanman hina qospaykichis.

¹²Pipas Diosman qoytapuni munan chayqa, kasqanman hina qoqtan Diosqa chaskinqa, Diosqa manan mañanchu mana kaqtinqa.

¹³Chaytaqa nini manan hukkunata yanapaspa qankuna kikiykichis pisichikuypi kanaykichispaqchu, aswanpas kuska waki kananpaqmi.

¹⁴Kunan tiempo qankunaq askha kapusqasuykichismi paykunaq pisichikusqanta yanapaykunqa, huk tiempopitaq paykunaq askha kapuqnin qankunaq pisichikuyniykichista yanapaykusunkichis, ahinapi kuska waki kananpaq.

¹⁵Diospa Simin Qelqan nin: Askhata pallaqpaqqa manan puchurqanchu, pisillata pallaqpaqpas manan pisirqanchu, nispa.

¹⁶Diosman gracias kachun, paymi Titota sonqonpi yuyaykachirqan, ñoqa hinallataq qankunamanta sienteq kananpaq.

¹⁷Titoqa valekusqaykuta hap'irqanmi, pay kikinpunitaq qankunamanta wañuyta atisunkichis, chaymi kunan payllamanta watukuq hamushasunkichis.

¹⁸Titowanmi huk wawqeta kachamuyku, payqa Cristomanta allin willakuykuna ch'eqerinanpaqmi kusata llank'arqan, chaymi paymantaqa allin rimay iñiq t'aqakunapi uyarikun.

¹⁹Manataqmi chayllachu, aswanpas iñiq t'aqakunan chay wawqeta akllarqanku, ñoqaykuwan kuska purispa yanapaykunata huñuspa apaysiwanankupaq, chaytan ñoqayku ruwashayku Señorta hatunchanaykupaq, hinallataq kusikuywan ruwasqanchista yachanankupaq.

²⁰Ahinapin cuidakuyku kay askha yanapaykunata rakisqaykumanta ama pipas rimakuwanankupaq.

²¹Chaykunataqa ancha manchakuywanpunin ruwayta munashayku, manan Señorpa qayllallanpichu, aswanpas runakunaq qayllanpiwanmi.

²²Paykunawan kuskatataq huk wawqetawan kachamuyku, paytan askha kutiña probaspa tukuy imaymanapi k'uchi kasqanta reparayku, kunanqa astawanraqmi yanapayta munan qankunapi anchata confiakusqanrayku.

²³Yachanaykichismi, Titoqa puriqmasiymi, qankunata serviypi llank'aqmasiymi, chay iskay wawqekunataq iñiq t'aqakunaq kachamusqankuna, paykunaqa llank'anku Cristota hatunchanankupaqmi.

²⁴Chayrayku, cheqaqtapuni munakusqaykichista paykunaman rikuchiychis, iñiq t'aqakunaq yachananpaq, qankunamanta alabakusqaykupas cheqaqpuni kananpaq.