Read Quechua Cuzco Bible 1988 2 CORINTIOS 9 Bible Online

2 CORINTIOS 9 - Quechua Cuzco Bible 1988 bible

2 CORINTIOS 9

¹Iñiypi wawqe-panakunapaq yanapay huñunamantaqa manañan qankunaman qelqamunaypunichu,

²yachaniñan yanapakuy munasqaykichista, qankunamantan Macedonia provinciapi kaqkunaman alabakurqani: Acaya hap'iypi kaqkunaqa qayna watamantañan yanapanankupaq listo kashanku, nispa. Chay munasqaykichismi Macedonia provinciapi kaq wawqe-panakunataqa tanqarirqan.

³Chaywanpas kay wawqekunata kachamuni, qankunamanta allin nisqayku ama yanqalla kananpaq, aswanpas nisqayman hinapuni wakichisqa kashanaykichispaq.

⁴Paqtan Macedoniamanta kaqkuna ñoqaykuwan hamuspa, mana wakichisqata tarisunkichisman, hinan ñoqayku qankunamanta kusikuywan willasqaykumanta p'enqaypi rikukuykuman, hinallataq qankunapas p'enqaypi rikukuwaqchis.

⁵Chaymi allinpaqpuni qhawarirqani manaraq hamushaspay kay wawqekunata valekuspay ñawpaqta qankunaman kachamuyta, ahinapi ñawpaqmantaña prometekusqaykichis ofrendaykichista wakichishanankupaq. Chay hinapin ofrendaykichisqa sumaq sonqo qokuy hina kanqa, amataq sik'isqa hinachu.

⁶Kayta yuyariychis: Pisillata tarpuqqa pisillatan hoqarinqa, askhata tarpuqmi ichaqa askhallatataq hoqarinqa.

⁷Sapanka imaynatachus sonqonpi yuyaykusqanman hina qochun, ama llakisqachu, amataq kamachisqa hinapaschu. Diosqa munakun kusisqa qoqtan.

⁸Diosqa atiyniyoqmi tukuy saminchayninta llimp'arishaqta qonasuykichispaq, ahinapi tukuy imapipas tukuy tiempopas mana pisichikuspa llapa allin ruwaykunapi anchata yanapakunaykichispaq.

⁹Diospa Simin Qelqan nin: Mana mich'akuspan wakchakunaman qon, sumaq sonqo-kayninqa wiñaypaqmi qhepan, nispa.

¹⁰Tarpuqman muhuta qon, runamanpas mikhunanpaq t'antata qon, paymi qankunamanpas qollasunkichistaq tarpunaykichispaq tukuy necesitasqaykichista, hinaspa wiñachinqa, sumaq sonqo kasqaykichis rurutapas askhayachinqa.

¹¹Chay hinapin tukuy imapipas tukuy tiempopas allin qhapaq kankichis, mana mich'akuspa qoykukuq kanaykichispaq. Hinan sumaq sonqo ofrendaykichista rakinaykupaq apachiwasqaykichismanta askha wawqe-panakuna Diosman graciasta qonqaku.

¹²Kay yanapayta qospaqa manan pisichikuq wawqe-panakunallamanchu qonkichis aswanpas chay hawan paykunaqa anchatapuni Diosman graciasta qonku.

¹³Kay yanapay qosqaykichisqa imaynatachus Cristomanta allin willakuykunata kasukusqaykichistan sut'inchan, kaqllataq paykunamanpas hukkunamanpas qoykukuq sonqo kasqaykichistawan, chaymi paykunaqa Diosta hatunchanqaku.

¹⁴Hinallataq paykunaqa qankunapaq Diosmanta mañapusunkichis, paykunaqa anchatapunin munakusunkichis, sumaqtapuni Diosqa qankunata qhawarisqasuykichisrayku.

¹⁵¡Diosman gracias kachun Churinta qomuwasqanchismanta, chay qokuyqa mana niy atinapunin!