Read Quechua Cuzco Bible 1988 GÁLATAS 1 Bible Online

GÁLATAS 1 - Quechua Cuzco Bible 1988 bible

GÁLATAS 1

¹Ñoqa Pablon apóstol*f** kani, chaypaqqa manan runakunachu kachawarqanpas akllawarqanpas, aswanpas kikin Jesucriston wañusqanmanta kawsarichimpuqnin Dios Yayapiwanmi churawarqan.

²Ñoqawan kashaq llapa wawqe-panakunapiwan Galacia provinciapi kashaq iñiq t'aqakunaman qelqamuykiku:

³Dios Yayanchis Señor Jesucristopiwan sumaqta qhawarisunkichis, thak-kaytapas qosunkichis.

⁴Jesucriston huchanchiskuna hawa wañurqan kay mana chanin pachamanta qespichiwananchispaq, Dios Yayanchispa munayninman hina.

⁵¡Diosqa yupaychasqa kachun wiñay-wiñaypaq! Ahinapuni kachun.

⁶Sinchitapunin musphashani, Cristoq munakuyninwan waqyaqniykichis Diosta manaraq unaypi saqerparispaykichis, wak “Allin willakuykunata” qatikushasqaykichismanta.

⁷Manan Cristomanta wak allin willakuykunaqa kanchu, aswanpas wakin runakunan musphachishasunkichis, Cristomanta allin willakuykunata waqllichiyta munaspanku.

⁸Chayrayku, ñoqaykupas hanaq pachamanta hamuq angelpas qankunaman willarqaykichisña chay allin willakuykunamanta huk hinata willasunkichis chayqa, ¡wiñaypaq ñakasqa kachun!

⁹Imaynan ñawpaqtaña nirqaykichis, chay hinallataqmi kunanpas nini: Pipas chaskisqaykichis allin willakuykunamanta huk hina willakuyta willasunkichis chayqa, ¡wiñaypaq ñakasqa kachun!

¹⁰Chayta nispaqa, ¿runakunaq allinpaq hap'iwanantachu munashani? Icha, ¿Diospa allinpaq hap'iwanantachu munashani? Manan runakuna kusichiytachu munashani, runakunataraq kusichiyta munaspayqa, manachá Cristoq kamachinchu kayman.

¹¹Wawqe-panaykuna, sut'itan yachanaykichista munani, ñoqaq willasqay allin willakuykunaqa manan runaq yachachikuyninchu.

¹²Chay allin willakuykunataqa manan runamantachu chaskirqani, manataq pipas yachachiwarqanchu, aswanpas kikin Jesucriston rikhuriwaspa yachachiwarqan.

¹³Qankunaqa uyarirqankichismi Judío runakunaq yachachisqan kaspay imaynatachus purisqayta. Yacharqankichismi sinchitapuni Diospa llapan iñiq t'aqanta ñak'arichispa qatiykachasqaytapas, ch'usaqyachiyta munasqaytapas.

¹⁴Judío runakunaq ruwayninman hina Dios yupaychaq kaspaymi, llapa wiñaymasiy kaq llaqta-masiykunata llallirqani, hinallataq ñawpa machulaykunaq ruwayninkunata makillapuni hunt'aq karqani.

¹⁵Ichaqa Diosmi manaraq naceshaqtiy akllawarqan, hinaspa sumaqta qhawariwaspa waqyawarqan.

¹⁶Paymi yuyaykukuspa Churinta ñoqaman reqsichiwarqan, mana Judío runakunaman Jesucristomanta allin willakuykunata willamunaypaq. Chaymantaqa manan pitapas tapukurqanichu,

¹⁷manan Jerusalén llaqtatapas rirqanichu ñoqamanta ñawpaqña apóstol*f** kaqkunawan tupaqpas, aswanmi kaq rato Arabia suyuta rirqani, hinaspataq Damasco llaqtaman kutimurqani.

¹⁸Kinsa watamantañan Jerusalén llaqtata rirqani, chaypin Pedrota reqsirqani, chunka phisqayoq p'unchaytaq paywan qhepakurqani.

¹⁹Ichaqa manan wakin apostolkunataqa*f** rikurqanichu, aswanpas Señorpa wawqen Jacobollatan.

²⁰Kay qankunaman qelqamusqayqa cheqaqmi, Diosmi yachan mana llullakusqayta.

²¹Chay qhepatañan Siria provinciata Cilicia provinciatawan rirqani.

²²Judea provinciapi Cristopi iñiq t'aqakunaqa manaraqmi reqsiwarqankuchu.

²³Ichaqa uyarirqankun: Ñawpaq qatiykachawaqninchis runan kunanqa Jesucristomanta allin willakuykunata willaspa purishan, chaytan ñawpaqqa ch'inyachiyta munarqan, nispa niqta.

²⁴Chaymi ñoqa hawa Diosta hatuncharqanku.