Read Quechua Cuzco Bible 1988 GÁLATAS 2 Bible Online

GÁLATAS 2 - Quechua Cuzco Bible 1988 bible

GÁLATAS 2

¹Chaymantataq chunka tawayoq watamantaña wakmanta Jerusalén llaqtata Bernabepiwan rirqani, Titotawan pusarikuspa.

²Dios niwaqtinmi Jerusalén llaqtataqa rirqani, hinaspan chaypi sapaqllata huñurikuspayku allin reqsisqa umallikunaman sut'incharqani mana Judío runakunaman allin willakuykunata willasqaymanta. Chaytan sut'incharqani ñawpaq llank'asqaypas kunan llank'ashasqaypas ama yanqalla kananpaq.

³Ñoqawan kashaq Titopas mana Judío runa kashaspa, qhari-kaynin señalasqa kananpaq manan kamachisqachu karqan.

⁴Llulla wawqekunan ichaqa mana piqpa yachasqallan haykumurqanku qhari-kayninkuta señalachikunankupaq kamachikuspa. Paykunaqa qhamiyaq hinan haykumurqanku Jesucristowan hukllachasqa kaspa libre kasqaykuta qhawaranankupaq, hinaspa wakmanta kamachikuy simiman watawanankupaq.

⁵Chaywanpas manapunin paykunataqa chhikallantapas kasurqaykuchu, cheqaq allin willakuykuna qankunapaq mana waqllichisqa kananpaq.

⁶Chay allin reqsisqa umallikunaqa manan ima wak yachachikuytapas yachachiwarqanchu. (Paykunaña allin reqsisqa karqanku chaypas, manan ñoqamanqa imapas qokuwanchu, Diosqa manan runakunaq rikch'ayninta qhawaspachu juzgan).

⁷Aswanmi wak yachachikuyta yachachiwanankutaqa, mana Judío runakunaman Cristomanta allin willakuykunata willanaypaq Diospa churasqan kasqayta reqsiwarqanku, imaynan Pedropas Judío runakunaman Cristomanta allin willakuykunata willananpaq churasqa karqan hinata.

⁸Judío runakunaq apostolnin*f** Pedrota yanapaq Diosllataqmi ñoqatapas mana Judío runakuna ukhupi llank'anaypaq yanapashawarqan.

⁹Chaymi allin reqsisqa umallikuna Jacobo, Pedro, Juanpiwan Diospa kay llank'anata qowasqanta reparawaspanku, ñoqata Bernabetawan paña makinkuwan hap'iykuwarqanku huk sonqolla kashasqaykuta rikuchinapaq. Hinaspan niwarqanku: Allinmi, mana Judío runakunaman willaq rinkichis, ñoqaykutaq Judío runakunaman willamusaqku, nispa.

¹⁰Wakchakunata yuyarikunallaykumantan valekuwarqanku, chaytan ñoqaqa tukuy sonqopuni ruwarqani.

¹¹Antioquía llaqtaman Pedro chayamuqtinmi uyanpi nirqani pantashasqanrayku.

¹²Jacoboq kachamusqan wakin runakuna manaraq chayamushaqtinmi, Pedroqa mana Judío runakunawan mikhurqan, chayamuqtinkutaq ichaqa mana Judío runakunamanta t'aqakuspa anchhuripurqan Judío t'aqa runakunata manchakusqanrayku.

¹³Chaymi wakin iñiq Judío runakunapas Pedrowan kuska iskay uya kallarqankutaq, Bernabepiwanpas chay iskay uya-kayninkuwan aysachikullarqantaq.

¹⁴Ichaqa Cristomanta allin willakuykunaq cheqaq yachachikuyninpi mana purisqankuta rikuspaymi, Pedrota llapa huñuykusqaq qayllanpi nirqani: Qanqa Judío runa kashaspa, manataq Judío runa hinachu kawsashanki chayqa, ¿imanaqtintaq mana Judío runakunata tanqanki Judío runaman t'ikrakunankupaq? nispa.

¹⁵Ñoqanchisqa Judío runakunapunin kanchis, manan huchasapa mana Judío runakunachu.

¹⁶Chaywanpas yachanchismi, runaqa manan kamachikuy simita hunt'asqanraykuchu chaninchasqaqa, aswanpas Jesucristopi iñisqanraykullan, ñoqanchispas Jesucristopin iñinchis, chay iñiyrayku chaninchasqa kananchispaq, manataq kamachikuy simita hunt'asqanchisraykuchu. Manan pipas kamachikuy simita hunt'asqanraykuqa chaninchasqachu kanqa.

¹⁷Ñoqanchischus Cristowan hukllachasqa kaspa Diospa chaninpaq qhawariwananchista maskhaspa, huchasapa kasqanchista reqsichikunchis chayqa, ¿chayraykuchu Cristoqa huchallikuq runaman tukuchipuwanchis? Manapunin.

¹⁸Imatapas thunisaq hinaspa wakmanta sayarichisaq chayqa, ñoqa kikiymi kamachikuy simi p'akiq kani.

¹⁹Ñoqataqa kamachikuy simin wañuchiwarqan, chaymi kamachikuy simipaqqa wañusqaña kani Diospaq kawsanaypaq.

²⁰Cristowan kuska chakatasqañan kani, chaymi mana ñoqañachu kawsashani, aswanpas Criston ñoqapi kawsashan. Cuerpopi kunan kawsaspayqa Diospa Churinpi iñispaymi kawsani, paymi munakuwarqan, chaymi ñoqarayku wañurqan.

²¹Diospa khuyapayakuynintaqa manan pisichanichu, kamachikuy simita kasukuywanchus chaninpaq qhawarisqa-kay kanman chayqa, yanqapaqmi Cristoqa wañunman karqan.