Read Quechua Cuzco Bible 1988 GÁLATAS 4 Bible Online

GÁLATAS 4 - Quechua Cuzco Bible 1988 bible

GÁLATAS 4

¹Kaytapas nillanitaqmi: Herencia chaskiq wawaqa warmallaraq kashaspanqa, manan imapipas huk hinachu wasipi kamachimantaqa, tukuy imaymana paypaqña kashan chaypas.

²Aswanmi uywaqkunaq waqaychaqkunaq makillanpiraq kashan, taytanpa nisqan tiempokama.

³Chay hinallataq ñoqanchispas warmallaraq kashaspanchisqa, kamachi karqanchis kay pachapi kamachiq espiritukunata kasuspa.

⁴Ichaqa tiempo hunt'akuqtinmi Diosqa Churinta kachamurqan, payqa warmimanta nacespanmi kamachikuy simipi Judío runa hina kawsarqan,

⁵kamachikuy simipi kawsaqkunata kacharichiwananchispaq, ahinapi Diospa wawachakusqanpuni kananchispaq.

⁶Wawankuna kasqanchisraykutaq, Diosqa Churinpa Espiritunta sonqonchisman kachamurqan, chay Espiritun rimachiwanchis: ¡Yayalláy! nispa.

⁷Chay hinaqa, Diospa wawanñan kapunki, manan kamachiñachu. Wawan kasqaykiraykutaq Diosmanta herenciata chaskinki.

⁸Ñawpaqa Diosta mana reqsispan espiritukunaq kamachin karqankichis, chaykunaqa manan dioschu.

⁹Kunanqa Diosta reqsispaña, otaq Diospa reqsisqanña kashaspaykichisqa, ¿imaynataq chay mana kallpayoq wakcha espiritukunamanqa kutirikapunkichis? ¿Wakmantachu chaykunaq kamachin kayta munankichis?

¹⁰Qankunaqa hatun p'unchaykunata, mosoq killakunata, fiesta mitakunata, watakunata ima waqaychankichis.

¹¹Manchakushanin qankunamanta, paqtan qankuna ukhupi llank'asqay yanqapaq kanman.

¹²Wawqe-panaykuna, valekuykichismi, ñoqa hinayá kaychis, ñoqapas qankuna hinan kapuni. Qankunaqa manan ima mana allintapas ruwarqankichischu.

¹³Yachankichisñan onqosqay hawa ñawpaq kutita qankunaman Diosmanta allin willakuykunata willasqayta.

¹⁴Chay onqoyqa huk prueban qankunapaqqa karqan, ichaqa manan onqosqa kaqtiypas qankunaqa pisichawarqankichispaschu, wikch'uwarqankichispaschu, aswanpas Diospa angelninta hina, kikin Cristo Jesusta hina chaskiwarqankichis.

¹⁵¿Maypitaq chay hatun kusikuyniykichisri? Ñoqaqa allintan reqsiykichis, atikunmanchus karqan chayqa, ñawiykichistapas horqokuspa qoykuwankichismanmi karqan.

¹⁶¿Cheqaqkaqta qankunaman nispaychu awqaykichis kapuni?

¹⁷Chay runakunaqa qankunamanta wañunkuraqmi, ichaqa manan allinniykichispaqchu, aswanpas ñoqaykumantan t'aqayta munashasunkichis, tukuy sonqowan paykunaman k'askakunaykichispaq.

¹⁸Allin kaqpaqqa kusapunin wañuy atikuq kayniykichisqa, ichaqa tukuy tiempo, ama qankunawan kashaqtillaychu.

¹⁹Wawallaykuna, huktawanmi qankunamanta nanayta muchushani, imaynan wachakuq warmi nanayta muchun hinata. Muchushallasaqpunitaqmi Cristoq rikch'aynin qankunapi rikhurinankama.

²⁰Maytan munashani kunanpacha qankunawan kashayta, mana k'amispa qankunata rimaykunaypaq, manan qankunamanta ima niytapas atishanichu.

²¹Niwaychis kamachikuy simiq kamachikuyninpi kayta munaqkuna, ¿manachu chay kamachikuy simiq nisqanta uyarinkichis?

²²Diospa Simin Qelqan nin Abrahampa iskay churiyoq kasqanta: hukninmi karqan kamachin Agarpi, huknintaq karqan warmin Sarapi. Payqa manan kamachichu karqan.

²³Kamachi warmipi kaq churinqa iman nacenallantan nacerqan.

²⁴Chayqa huk rikch'anachiy hinan. Chay warmikunaqa iskay rimanakuymanmi rikch'akun: hukninmi Sinaí orqoman rikch'akun, chaymi Agar. Paymi kamachi kanankupaq wawakunata wachakun.

²⁵Chay Agarqa Arabia suyupi Sinaí orqomanmi rikch'akun, payllataq Jerusalén llaqtamanpas kunan rikch'akun, chay llaqta wawankunantin kamachi kashasqanrayku.

²⁶Hanaq pacha Jerusalenmi ichaqa mana kamachichu, chaymi llapanchispa mamanchisqa.

²⁷Diospa Simin Qelqan nin: Kusikuy, mana wiksallikuq warmi, q'ochukuy, mana wachakuq warmi, kusisqa qapariy, wachakuy nanayta mana reqsiq warmi. Wikch'usqa warmiq wawankunan aswan askha qosayoq warmiq wawankunamantaqa, nispa.

²⁸Ahinaqa, wawqe-panaykuna, ñoqanchismi Isaac hina Diospa prometesqan wawakuna kanchis.

²⁹Imaynan chaypachapas iman nacenallanta naceq runaqa Santo Espirituq atiyninwan naceq runata qatiykacharqan, chay hinallataqmi kunanpas qatiykachashan.

³⁰Ichaqa, ¿ima nintaq Diospa Simin Qelqaqa? Kay hinatan nin: Kamachi warmita wawantinta qarqoy, kamachi warmiq wawanqa manan herenciata chaskiysikunmanchu mana kamachi warmiq wawanwanqa, nispa.

³¹Chay hinaqa, wawqe-panaykuna, manan kamachi warmiq wawankunachu kanchis, aswanpas casada warmiq wawankuna kaspan libre kanchis.