Read Quechua Cuzco Bible 1988 GÁLATAS 5 Bible Online

GÁLATAS 5 - Quechua Cuzco Bible 1988 bible

GÁLATAS 5

¹Criston qespichiwarqanchis libre kananchispaq, chay libre-kaypi qaqata sayaychis amataq kamachi-kayman huktawan kutiriychischu.

²Uyariwaychis, ñoqa Pablon niykichis, qhari-kayniykichista señalachikunkichispuni chayqa, manan Cristoqa imapaqpas servisunkichischu.

³Huktawanmi nini, pi runapas qhari-kayninta señalachikuqqa kamachikuy simiq lliw kamachisqantan hunt'anan.

⁴Qankunachus kamachikuy simita hunt'asqaykichiswan chaninpaq qhawarisqa kayta yuyankichis chayqa, Cristomanta t'aqasqan kashankichis, Diospa munakuyninmantapas karunchakapunkichismi.

⁵Ñoqanchisqa Jesucristopi iñispan Santo Espirituq kallpachasqan kaspa, makilla suyashanchis Diospa chaninpaq qhawariwananchista.

⁶Jesucristowan hukllachasqa kashanchis chayqa, qhari-kayninchis señalasqa kaypas mana señalasqa kaypas manan imapaqpas serviwanchischu, aswanpas Jesucristopi iñispa munanasqa kawsaynillanchismi servin.

⁷Qankunaqa allillantan purisharqankichis, ¿pitaq hark'arqasunkichis cheqaq-kayta mana kasunaykichispaq?

⁸Chay wak yachachikuyqa manan waqyaqniykichis Diosmantachu rikhurimurqan.

⁹Ninkun: Huk pisi qonchullan llapa masata poqochin, nispa.

¹⁰Chaywanpas Señorwan hukllachasqa kasqanchisraykun qankunamanta mana iskayrayanichu huk hinata yuyanaykichistaqa. Ichaqa Diosmi chay musphachiqniykichis runata huchachanqa, pipas chay runaqa kakuchun.

¹¹Wawqe-panaykuna, ñoqachus yachachiykichismanraq: Qhari-kayniykichista señalachikuychis, nispa chayqa, manachá Judío runakuna qatiykachawanmanchu, chay hina kaqtinqa: Criston cruzpi wañurqan, niqtiypas, manachá phiñakunkumanchu.

¹²Qhari-kayniykichista señalachikuychis, nispa yachachiqniykichiskunaqa, ¡paykuna hukpaqkama wit'ukuchunku!

¹³Qankunaqa, wawqe-panaykuna, libre kanaykichispaqmi waqyasqa karqankichis, ichaqa ama libre-kayniykichisqa sonqoykichispa munaynillanta ruwanaykichispaqchu kachun, aswanpas munanakuspaykichis yanapanakuychis.

¹⁴Diospa llapa kamachikuynin simikunaqa ch'ulla kamachikuyllamanmi ch'umakun, chaymi nin: Runamasiykitan qan kikiykita hina munakunki, nispa.

¹⁵Qankuna pura qhansanakunkichis mikhuykunakunkichis chayqa, allinta qhawakuychis, paqtataq qankuna purallataq ch'usaqyachinakuwaqchis.

¹⁶Kaytan niykichis: Santo Espirituq munasqanman hina kawsaychis, amataq sonqoykichispa munasqantachu ruwaychis.

¹⁷Runaq sonqonqa Santo Espirituq mana munasqantan munan, Santo Espiritutaq runaq sonqonpa munasqanta mana munanchu. Chaykunan paykuna pura churanakunku, hinan munasqaykichista mana ruwayta atinkichischu.

¹⁸Santo Espiritutaqchus pusashasunkichis chayqa, manan kamachikuy simiq kamachisqanñachu kankichis.

¹⁹Runaq sonqonpa munasqan ruwaykunaqa sut'i reqsisqan, chaykunaqa kaykunan: Wasanchaykuna, qhellipi puriykuna, millay viciokunapi kawsaykuna,

²⁰ídolo yupaychaykuna, layqakuykuna, cheqninakuykuna, quejanakuykuna, lerq'opayanakuykuna, k'arak phiñakuykuna, payllapaq kananta munaykuna, rakinakuykuna, wak t'aqata hatarichiykuna,

²¹envidiakuykuna, runa wañuchiykuna[1], machaykuna, hatun mikhuykunallapi waqlliykuna, chaykunaman rikch'akuq ruwaykunapiwan. Chaykuna hawan anchata anyaykichis, imaynan nirqaykichisña hina, chay hinata ruwaqkunaqa manan Diospa kamachikushasqanman haykunqakuchu.

²²Santo Espiritun ichaqa kawsayniykichispi rikhurichin munakuyta, q'ochukuyta, sumaq kawsayta, pacienciayoq-kayta, sumaq sonqo-kayta, allin runa-kayta, rimasqanta hunt'aq-kayta,

²³llamp'u sonqo-kayta, cuerpo kamachiq kaytawan. Chaykuna contraqa manan kamachikuy simi kanchu.

²⁴Cristoq kaqkunaqa ñan chakatankuña aycha cuerpota millay yuyaynintinta sinchi munapakuynintintawan.

²⁵Santo Espiritun kawsachiwanchis, chaymi Santo Espirituq pusasqan hinapuni kawsananchis.

²⁶Ama yanqa hatunchakuqchu kasunchis, amataq phiñachinakusunpaschu envidianakusunpaschu.