Read Quechua Cuzco Bible 1988 GÁLATAS 6 Bible Online

GÁLATAS 6 - Quechua Cuzco Bible 1988 bible

GÁLATAS 6

¹Wawqe-panaykuna, pitapas ima huchapipas qonqaylla hap'iwaqchis chayqa, Santo Espirituq pusasqankuna, payta llamp'u sonqo-kaywan sayarichiychis, ichaqa sapankapas pay kikinta allinta qhawakuspa, paqtan paypas wateqasqallataq kanman.

²Ima sasachakuykunaña kaqtinpas yanapaykunakuychis, ahinapin, Cristoq kamachikuy siminta hunt'ankichis.

³Pipas mana imapas kashaspa aswan allin kasqanta yuyan chayqa, pay kikintan q'otukun.

⁴Chayrayku, sapanka pay kikinpa kawsasqanta allinta qhawakuchun, hinaspa allin kawsasqanta reparakun chayqa, chayllawan kusikuchun, amataq hukpa kawsasqanwan tupanachispachu.

⁵Sapankan ruwananchistaqa hunt'ananchispuni.

⁶Diospa siminta yachaqaq runaqa yachachiqnintan tukuy allin kaqkunawan yanapaykunan.

⁷Ama q'otukuychischu, manan pipas Dioswanqa pukllakunmanchu. Imatachus runaqa tarpunqa chayllatataqmi cosechanqapas.

⁸Pipas sonqonpa millay munasqallanta tarpuqqa chay tarpusqanmantan wañuyta cosechanqa. Santo Espirituq munasqanta tarpuqmi ichaqa, Santo Espiritumanta wiñay kawsayta cosechanqa.

⁹Chay hinaqa, amayá allinkaqta ruwaspaqa sayk'usunchu, manachus pisi kallpayasun chayqa, tiemponpin cosechasunchis.

¹⁰Chayrayku, atishaspanchisqa lliwpaq allinkaqta ruwasunchis, astawanqa ruwasun iñiq-masinchiskunapaq.

¹¹Qhawaychis, ancha hatuchachaq letrakunawanmi makiywanpuni qankunaman qelqamuykichis.

¹²Qhari-kayniykichis señalasqa kananpaq kamachiqniykichiskunaqa runakunaq qayllanpi allin rikhuriyllatan munanku, ahinapi Cristoq cruzpi wañusqanmanta mana qatiykachasqa kanankurayku.

¹³Qhari-kaynin señalasqakunapas manan kamachikuy simitaqa hunt'ankuchu, chaywanpas paykunaqa munankun qhari-kayniykichis señalasqa kananta, ahinapi chay kamachikusqankuta kasuqtiykichis hatunchakunankupaq.

¹⁴Ñoqaqmi ichaqa mana imamantapas hatunchakunay kanchu, aswanpas Señorninchis Jesucristoq cruzpi wañusqallanpin hatunchakuni. Cristoq cruzpi wañusqanraykun ñoqapaqqa kay pacha wañusqaña, ñoqapas kay pachapaqqa wañusqan kani.

¹⁵Jesucristowan hukllachasqa kashankichis chayqa, qhari-kaynin señalasqa kaypas mana señalasqa kaypas manan imapaqpas valenchu, aswanpas mosoqmanta kamasqa-kayllan valen.

¹⁶Chay yachachikuyman hina llapa kawsaqkunaman Diosqa thak-kayta qospa khuyapayachun, paykunan Diospa cheqaq Israel llaqtanqa kanku.

¹⁷Kunanmantaqa amaña pipas llakichiwachunchu, cuerpoypi kashaq sich'ukunan Señor Jesuspa kamachin kasqayta sut'inchan.

¹⁸Wawqe-panaykuna, Señorninchis Jesucristo llapaykichista sumaqta qhawarisunkichis. Ahinapuni kachun.