Read Quechua Cuzco Bible 1988 EFESIOS 1 Bible Online

EFESIOS 1 - Quechua Cuzco Bible 1988 bible

EFESIOS 1

¹Ñoqa Pablon, Diospa munayninrayku Jesucristoq apostolnin*f** kani. Kay cartatan Efeso llaqtapi kashaq Diospa iñiq t'aqanman qelqamuykichis. Qankunan Jesucristowan hukllachasqa kaspa hunt'aq kankichis:

²Dios Yayanchis, Señorninchis Jesucristopiwan sumaqta qhawarisunkichis thak-kaytapas qosunkichis.

³Señorninchis Jesucristoq Yayan Dios yupaychasqa kachun, paymi Cristowan huklla kasqanchisrayku Santo Espirituq tukuy saminchayninkunawan hanaq pachapi saminchawanchis.

⁴Diosmi Cristopi akllawarqanchis manaraq kay pacha kamasqa kashaqtin, paypa ñawpaqenpi ch'uya mana huchachana kananchispaq.

⁵Munakuyninraykun ñawpaqmantaña yuyaykurqan Jesucristopi wawankuna kananchispaq, allin munayninpi yuyaykusqanman hina.

⁶Chay hinaqa, payta yupaychasun musphana sumaq sonqo-kayninmanta, munakusqan Churinpi mana imaraykulla chaskiwasqanchismantawan.

⁷Diosmi ancha hatun munakuyninpi Churinpa yawar hich'asqanwan kacharichiwarqanchis huchanchiskunata pampachawaspanchis.

⁸Chay munakuynintan Diosqa llimp'arichispa tukuy yachayta allin yuyayniyoq-kayta qowarqanchis.

⁹Hinallataq allin munayninman hina pakasqa munayninta reqsichiwarqanchis. Chaytan Cristopi hunt'ananpaq yuyaykurqan,

¹⁰chaymi tiempokuna hunt'akuqtinña hanaq pachapi kaqkunatapas kay pachapi kaqkunatapas llapallanta Cristoman huñuykunqa, pay lliwpi uma kananpaq.

¹¹Diosmi yuyaykusqanman hina munayninman hina tukuy imaymanata ruwan. Paymi ñawpaqmantaña yuyaykuspa akllawarqanchis Cristowan hukllachasqa kaspa paypaq kananchispaq.

¹²Chay hinaqa, ñawpaqtaña Cristopi suyakuqkuna kaspanchis, Diosta hatun-kayninmanta yupaychasun.

¹³Qankunaqa cheqaq-kay willakuyta uyarispa, qespikuyniykichis allin willakuykunata iñirqankichis, chaymi Cristowan hukllachasqa kaspa Diospa prometesqan Santo Espirituwan sellosqa karqankichis, paypa kaqnin kasqaykichista rikuchinapaq.

¹⁴Santo Espiritun herenciata chaskinanchis señalqa, chaywanmi Diosqa rikuchiwanchis paypa kaqkunaqa kacharichisqapuni kananchista. Chay hinaqa, payta hatun-kayninmanta yupaychasun.

¹⁵Chayrayku ñoqapas Señor Jesuspi iñisqaykichista llapa iñiqkunata munakusqaykichistawan yachaspay,

¹⁶mañakuyniykunapi qankunata yuyarispay, Diosman graciasta qoshallanipuni.

¹⁷Señorninchis Jesucristoq Diosnin hatun atiyniyoq Yayamantan mañakuni Santo Espirituta qonasuykichispaq, paymi yachayta qosunkichis, Diostapas rikuchisunkichis, ahinapi Diosta allinta reqsinaykichispaq.

¹⁸Mañakullanitaq yuyayniykichista k'anchaykunanpaq, ahinapi suyakuywan waqyasqasuykichis imachus kasqanta yachanaykichispaq, ancha sumaq qhapaq herenciata Diosqa paypa kaqkunaman qosqantapas yachanaykichispaq,

¹⁹imayna hatunchus mana tupuy atina qhapaq atiyninpas kasqantawan yachanaykichispaq. Chay atiymi ñoqanchis iñiqkunata kallpachawanchis. Chay atiyllatataqmi Diosqa rikuchirqan,

²⁰wañusqanmanta Cristota kawsarichimpushaspa hanaq pachapi paypa pañaneqenman tiyaykachishaspapas.

²¹Hinallataq Cristota llapa kamachikuypa, atiypa, munaychakuypa, llapa atiq-kaypa, mentasqa-kaypa ima qollananta churarqan, manan kay tiempollapichu aswanpas hamuq tiempokunapiwanmi.

²²Hinaspa tukuy imaymanata Cristoq chaki sarunanman churarqan, hinallataq llapa iñiq t'aqapipas tukuy imaymanapi qollanata payta churarqan.

²³Chay iñiq t'aqan Cristoq cuerpon, chay cuerpotan payqa hunt'aykun, paytaq Diospa-kayninwan hunt'a kashan.