Read Quechua Cuzco Bible 1988 EFESIOS 3 Bible Online

EFESIOS 3 - Quechua Cuzco Bible 1988 bible

EFESIOS 3

¹Ñoqa Pablon Jesucristota servisqaymanta qankuna mana Judío runakunaman willasqaymantawan preso kani.

²Yacharqankichisñan, Diosmi ancha khuyapayakuyninpi qankunaq allinniykichispaq llank'anata qowarqan.

³Paymi pakasqa yachayninta rikuchiwaspa yachachiwarqan. Chaykunamantaqa ñawpaqtañan pisillata qelqamurqaykichisña.

⁴Chayta leespan reparankichis Cristoq pakasqa yachayninta reqsiq kasqayta.

⁵Chay pakasqa yachaytan Diosqa ñawpa tiempopi mana pimanpas rikuchiqchu kasqa, kunanmi ichaqa, paypaq t'aqasqa apostolninkunamanpas*f** profetankunamanpas*f** Santo Espirituwan reqsichin.

⁶Kaymi chay pakasqa yachayqa: Mana Judío runakunan Judío runakuna hinallataq Diospa saminchayninta chaskinku allin willakuykunata willasqawan, huk cuerpoman hukllachasqallataq kanku, Jesucristopi Diospa prometesqanta chaskiqmasitaq kankupas.

⁷Diosmi sumaqta qhawariwaspa Jesucristomanta allin willakuykunata willanaypaq churawarqan, chayta ruwanaypaqtaq atiyninwan kallpachawarqan.

⁸Ñoqaqa llapan iñiqkunamantapas aswan huch'uyllapunin kani, ichaqa Diosmi churawarqan Cristoq mana tukukuq saminchayninmanta allin willakuykunata mana Judío runakunaman willanaypaq,

⁹imaynatachus Diospa pakasqa yuyaykusqanpa sucedenanta tukuy runaman sut'inchanaypaqwan. Tukuy imaymana kamaq Diosmi wiñay tiempomantaña chay yuyaykusqanta mana reqsichirqanchu,

¹⁰hanaq pachapi llapa kamachikuqkunamanpas atiyniyoqkunamanpas iñiq t'aqawan Diospa tukuy imaymana yachayninta kunanraq reqsichinanpaq.

¹¹Chaykunatan Diosqa wiñay yuyaykuyninman hina ruwarqan, chaytan payqa Señorninchis Jesucristopi hunt'arqanña.

¹²Cristowan hukllachasqa kaspan paypi iñisqanchisrayku, mana manchakuspa mana iskayrayaspa Diosman asuykuyta atinchis.

¹³Chaymi valekuykichis, qankunarayku ñak'arichisqa kashasqaymanta ama pisi kallpayanaykichispaq, chay ñak'ariyniyqa qankunaq hatunchasqa kanaykichispaqmi.

¹⁴Chayraykun Dios Yayanchisman qonqorikuni.

¹⁵Paypa sutintan hoqarin llapa ayllukuna hanaq pachapi kaqkunapas kay pachapi kaqkunapas.

¹⁶Mañakunin qhapaq atiyninman hina Santo Espiritunwan sonqoykichispi atiywan kallpachanasuykichispaq,

¹⁷iñisqaykichis hawa sonqoykichispi Cristo tiyananpaq. Ahinapin qankunaqa munakuypi saphichasqa teqsichasqa kaspa,

¹⁸llapan iñiq runakunawan kuska atiyniyoq kankichis Cristoq munakuyninta entiendenaykichispaq. Chay munakuyqa sinchi hatunmi anchonmanpas, wask'anmanpas, ukhunmanpas, sayayninmanpas.

¹⁹Cristoq munakuyninqa tukuy yachaymantapas aswan hatunraqmi, chaywanpas mañakunin chay munakuyninta reqsinaykichispaq, ahinapi kikin Dioswan hunt'aykusqa kanaykichispaq.

²⁰Ñoqanchispi atiyninwan llank'aq Diosmi mañakusqanchismantapas yuyaykusqanchismantapas aswan askhataraq tukuy imatapas atiyninwan ruwaqqa.

²¹Ñoqanchis iñiq t'aqakuna Jesucristowan hukllachasqa kaqkuna Diosta wiñay-wiñaypaq yupaychasun. Ahinapuni kachun.