Read Quechua Cuzco Bible 1988 EFESIOS 4 Bible Online

EFESIOS 4 - Quechua Cuzco Bible 1988 bible

EFESIOS 4

¹Señorninchisraykun ñoqa preso kashani, chaymi valekuykichis Diospa waqyasqankuna hinapuni allinta kawsanaykichispaq. Chaypaqmi Diosqa waqyarqasunkichis.

²Qankunaqa huch'uyyaykukuywan, llamp'u sonqo-kaywan, pacienciawan, munanakuypi muchunakuspaykichis kawsaychis.

³Santo Espiritun huk-nisqallata kawsachisunkichis, chayrayku hukkuna hukkunawan sumaqta kawsanaykichispaq kallpachakuychis, chay hinata kawsaspan huñullapuni kankichis.

⁴Huk cuerpollan, huk Santo Espiritullan kan, imaynan Diosqa waqyarqasunkichis huk suyakuyllaman hina.

⁵Hukllan Señorqa, hukllan iñiypas, hukllataqmi bautismopas,

⁶llapanchispa Yayanchis Diospas hukllan, paymi llapallata kamachin, llapawantaq llank'an, llapapitaq kashanpas.

⁷Sapankanchismanmi llank'anapaq atiyta qowanchis, Cristoq qowasqanchisman hina.

⁸Chaymi Diospa Simin Qelqaqa nin: Hanaq pachamanmi wicharirqan presokunata watasqata apaspa, hinaspan atiykunata runakunaman qorqan, nispa.

⁹“Wicharirqan” nispanqa, ¿ima ninantataq nin? Chayta nispaqa, kay pachaq aswan ukhunkama ñawpaqta uraykusqantan nishan.

¹⁰Chay kikin uraykamuqllataqmi hanaq pachaq hawanmanraq wicharqan, tukuy imaymanaman pay kikin hunt'aykunanpaq.

¹¹Hinaspa pay kikillantaq churarqan hukkunata apóstol*f** kanankupaq, hukkunata profeta*f** kanankupaq, hukkunata Jesucristomanta allin willakuykunata willaq kanankupaq, hukkunata pastorpas yachachiqpas kanankupaq.

¹²Paykunatan churarqan iñiqkuna Diosta servinanpaq yachachiqta, Cristoq cuerponta wiñachinankupaq.

¹³Chay hinapin iñiypi huk-nisqalla-kaymanpas Diospa Churinta allin reqsiymanpas llapallanchis chayasunchis, allin takyasqa runa, Cristoq hunt'asqa sayaynin hina sayayniyoq wiñasqa kananchispaq.

¹⁴Chaymi manaña wawakuna hinañachu kasunchis, paykunaqa runakunaq tukuy llulla yachachikuyninwanmi qochata phoqchiqechiq wayrawan hina kayman chayman apaykachasqa kanku, pantachiyta munaq yuyaysapa llulla runakunawan q'otuchikuspa.

¹⁵Aswanpas munakuywan cheqaqkaqta rimaspa, tukuy imaymanapi Cristowan hukllachasqa wiñasunchis. Paymi cuerpoq umanqa.

¹⁶Paypa qhawasqanmi llapa cuerpoqa allin k'askanasqa kashan, sapanka moqokuna allin ch'antasqa, sapanka parte ruwananman hina allinta llank'aqtintaq llapa cuerpo munakuypi aswan-aswanta wiñashan.

¹⁷Señorninchispa sutinpin tanqaykichis: amaña wakin mana Judío runakuna hinaqa kawsaychisñachu, paykunaqa mana imapaq serviq yuyayninkupin purinku.

¹⁸Tutayasqa yuyayniyoq kaspankutaq Diosmanta hamuq kawsayta mana chaskinkuchu, rumi sonqo kaspankun Diosta mana reqsinkuchu.

¹⁹Paykunan mana p'enqarikuspa tukuy imaymana sinchi millaykunata ruwanku, lliw mana chanin kaqkunatapas mana amikuspan ruwashallanku.

²⁰Qankunan ichaqa mana chay hinatachu Cristomanta yachaqakurqankichis,

²¹cheqaqtapunin Cristomantaqa uyarirqankichis, riki, Jesuspi cheqaq-kay kasqanman hinapunitaqmi paymantaqa yachaqarqankichispas.

²²Chayrayku ñawpa kawsayniykichista wikch'upuychis, chay ñawpa runaqa q'otukuq mana chanin munayninkunawanmi waqllichisqa kashan.

²³Qankunaqqa yuyayniykichispas sonqoykichispas mosoqman t'ikrasqan kanan.

²⁴Qankunaqa Diosman rikch'akuq kamasqa mosoq runawan p'achallikuychis, chaytaqmi rikuchikun chanin kawsaypi cheqaq ch'uya kawsaypiwan.

²⁵Chayrayku, amaña llullakuychisñachu, aswanpas sapankaykichis runa-masiykichiswan cheqaqkaqta rimaychis, huk cuerpoq miembronkunalla kasqanchisrayku.

²⁶Phiñakunkichischus chayqa, ama huchallikuychischu, ama p'unchay ch'isiyaqqa phiñasqa kaychischu,

²⁷amapuni imaynallamantapas supaypa huchallichinasuykichistaqa munaychischu.

²⁸Suwakuqqa amaña suwakuchunñachu, aswanpas llank'achun, allinpaq kaqkunata makinwan ruwaspa pisichikuqkunaman imallatapas qoykunanpaq.

²⁹Ama millay qhelli simikunata rimaychischu, aswanpas uyariqkunaq necesitasqanman hina allinkaqllata rimaychis paykunaq wiñanankupaq, hinallataq paykunapaq huk sami kananpaq.

³⁰Amataq Diospa Santo Espiritunta llakichiychischu, Santo Espirituwanmi qankunaqa sellosqa kashankichis Diospa kaqnin hina qespichisqapuni kanaykichis p'unchaykama.

³¹Tukuy haya sonqo-kay, phiñapayay, k'arak phiñakuy, qaparkachay, tumpay, tukuy mana allin ruwaykunapas qankunamanta chinkachun.

³²Aswanpas sumaq sonqo kaychis, khuyapayanakuq, pampachaykunakuq, imaynan Diospas Cristopi qankunata pampacharqasunkichis hina.