Read Quechua Cuzco Bible 1988 EFESIOS 5 Bible Online

EFESIOS 5 - Quechua Cuzco Bible 1988 bible

EFESIOS 5

¹Diospa munasqa wawankunan kankichis, chayrayku payman rikch'akuq kaychis.

²Munanasqapuni kawsaychis, imaynan Cristopas munakuwarqanchis hinata. Payqa ñoqanchisraykun sacrificiopi pay kikinta haywakurqan Diospa sonqonman chayaq sumaq q'apay ofrendata hina.

³Qankunaqa Diospaq t'aqasqa runakunan kankichis, chayrayku qankuna ukhupiqa ama rimayllapas kachunchu qhellipi puriymanta, tukuy mana chanin kaymanta, munapayaymantapas.

⁴Amataq millayta rimaychischu, p'enqay simikunata, asichikuq qhelli simikunatapas, chaykunaqa manan allinchu, aswanpas Diosman graciasta qospallapuni kaychis.

⁵Qankunaqa yachankichisñan, pipas qhellipi purin, mana chaninta ruwan, munapayanpas chayqa, Cristoqpas Diospapas kamachikushasqanpiqa mana herenciayoq kasqanta (munapayayqa idolokunata yupaychay hinan).

⁶Ama piwanpas yanqa simikunawan q'otuchikuychischu, chay huchakuna hawan mana kasukuqkunaman Diospa phiñakuynin chayamun.

⁷Ama paykunaq ruwaqmasinqa kaychischu.

⁸Huk tiempopiqa laqhayaqpin kawsarqankichis, kunanmi ichaqa Señorwan hukllachasqa kaspa k'anchaypi kashankichis. K'anchaypi kashaq runakuna hina kawsaychis, imachus Señorpa sonqonman chayaq kaqta reparaspa. K'anchayqa paqarichin tukuy sumaq sonqo-kaykunatan, chanin kawsaytan, cheqaq kaytawan.

¹¹Laqhayaqpi kashaq runakunaq mana valeq ruwasqankutaqa ama ruwaysikuychischu, aswanpas paykunataqa anyaychis.

¹²Paykunaq pakapi ruwasqankumantaqa rimayllapas p'enqakuymi.

¹³Ichaqa tukuy imaymanapas k'anchayman horqosqa kaqtinqa lliwmi sut'inchasqa kapun, k'anchaymi tukuy imatapas sut'ita rikuchiqqa.

¹⁴Chayraykun nin: Puñusqaykimanta rikch'ariy, wañusqakunamanta kawsariy, chaymi Cristo k'anchaykusunki, nispa.

¹⁵Chayrayku, allintapuni reparakuychis imaynatachus kawsasqaykichista, ama mana yuyayniyoq hinaqa kawsaychischu, aswanpas yachayniyoq hina kawsaychis.

¹⁶Tiempota ama usuchiychischu, kay p'unchaykuna mana allin kasqanrayku.

¹⁷Ama mana yuyayniyoqqa kaychischu, aswanpas imachus Señorpa munaynin kasqanta allintapuni reparaychis.

¹⁸Ama vinowan machaychischu, machaypiqa waqlliymi kan, aswanpas Santo Espirituwan hunt'a kaychis.

¹⁹Qankuna pura rimapayanakuychis salmokunawan, yupaychana takikunawan, Santo Espirituq yuyaychasqan takikunawanpas. Señorman takispa payta tukuy sonqo yupaychaychis.

²⁰Tukuy imaymanamantapas Señorninchis Jesucristoq sutinpi Dios Yayaman graciasta qollaychispuni.

²¹Cristota manchakuspa kasunakuychis.

²²Imaynan Señorninchista kasunkichis chay hinata casarasqa warmikuna qosaykichista kasuychis.

²³Qosaqa warmiq umanmi, imaynan Cristopas llapa iñiq t'aqaq uman hina. Criston llapa iñiq t'aqaq qespichiqninqa, chay iñiq t'aqan paypa cuerpon.

²⁴Imaynan llapa iñiq t'aqaqa Cristoman kasukun, ahinallataqmi casarasqa warmikunapas tukuy imapi qosankuman kasukunanku.

²⁵Qosakuna, warmiykichista munakuychis, imaynan Cristopas llapa iñiq t'aqata munakuspa paykunarayku wañurqan hinata.

²⁶Chaytan payqa ruwarqan llapa iñiq t'aqata unupi mayllispa siminwan Diospaq t'aqananpaq,

²⁷ancha sumaq iñiq t'aqata pay kikinman qayllaykachinanpaq, mana qhelliyoqta, mana sip'uyoqta, mana imaq chhankaykusqanta, aswanpas ch'uyata, mana huchachanata ima.

²⁸Chay hinatan qosakunapas warminkuta kikinkuq cuerponkuta hina munakunanku. Warminta munakuqqa pay kikintan munakun.

²⁹Manan pipas pay kikinpa cuerpontaqa hayk'aqpas cheqnikurqanchu, aswanpas mikhuchispanmi allinta uywan, imaynan Cristopas llapa iñiq t'aqapaq ruwan hinata.

³⁰Ñoqanchisqa Cristoq cuerponmi kanchis, chay cuerpoq miembronkuna.

³¹Chayraykun Diospa Simin Qelqaqa nin: Runaqa taytanta mamanta saqepuspan warminwan hukllachaykakapunqa, iskayninkutaq huk cuerpollaña kapunqaku, nispa.

³²Kay pakasqa yachayqa sasa entiendeymi, aswanpas ñoqaqa nishani Cristomanta llapa iñiq t'aqamantawanmi.

³³Chayrayku, qosakuna, sapankaykichis qankuna kikiykichista hinapuni warmiykichista munakuychis, hinallataq qankunapas warmikuna qosaykichista respetaychis.