Read Quechua Cuzco Bible 1988 EFESIOS 6 Bible Online

EFESIOS 6 - Quechua Cuzco Bible 1988 bible

EFESIOS 6

¹Wawakuna, tayta-mamaykichista Señorpi iñiqkuna hinapuni kasuychis, chaymi allinqa.

²Diospa Simin Qelqan nin: Taytaykitapas mamaykitapas respetankin, nispa. Chaymi ñawpaqkaq prometesqayoq kamachikuyqa, chayqa ninmi:

³Ahinapin allillan kanki, kay pachapipas unayta kawsanki, nispa.

⁴Qankunapas, tayta-mamakuna, wawaykichista ama phiñachiychischu, aswanpas kasuchikuspa uywaychis, Señormanta yachachispa.

⁵Kamachikuna, kay pachapi patronniykichista kasuychis, manchakuywan sut'in rimaq kaywan respetaychis, Cristotapas servishawaqchis hina.

⁶Ama runakunaq rikunallantaqa ruwaychischu, paykunawan allin kayta munaspa, aswanpas Cristoq kamachinkuna hina, Diospa munayninta tukuy sonqo ruwaychis.

⁷Sonqopas-sonqo llank'aychis, Señorta serviq hinapuni, ama runakunata serviq hinallachu.

⁸Yachankichismi kamachi kaspapas mana kamachi kaspapas, sapanka runan allinta ruwasqanman hina Señormanta chaskinqa.

⁹Qankunapas, patronkuna, chay hinallatataq kamachiykichiskunapaq ruwaychis, amaña astawan manchachiychischu. Yachankichismi, qankunaqpas paykunaqpas hanaq pachapi Señorniykichisqa ch'ullalla kasqanta, payqa manan pimanpas sayapakunchu.

¹⁰Chaymantapas, wawqe-panaykuna, Señorpi kallpachakuychis paypa atiyniyoq kallpanwan.

¹¹Diospa qosqan llapallan tupapakuna p'achawan churakuychis, Satanaspa q'otukuq yuyayninkuna contra qaqata sayanaykichispaq.

¹²Manan runawanchu maqanakunchis, aswanpas kamachikuqkunawanmi, atiyniyoqkunawanmi, kay tutayaq tiempopi kamachikuqkunawanmi, hanaqkunapi kaq mana allin espiritukunawanmi.

¹³Chayrayku, Diospa qosqan llapallan tupapakuna p'achawan churakuychis, mana allin p'unchaypi allinta tupapakunaykichispaq, hinaspa allinta ruwaspaña qaqata sayanaykichispaq.

¹⁴Allintapuni sayashaychis, cheqaq-kaywan chumpiwan hina allin chumpiykusqa, chanin-kaywan fierro unkuwan hina churaykusqa.

¹⁵Usut'akushaq soldado hina listolla kaychis thak-kay allin willakuykunata usqhaylla willamunaykichispaq.

¹⁶Tukuy tiempo Diospi iñiychis escudowan hina waqaychasqa kanaykichispaq, chaywanmi Satanaspa llapa rawrashaq wach'isqankunata thasnuyta atinkichis.

¹⁷Diospa qespichiyninwanpas cascowan hina churakuychis umaykichista hark'ananpaq, hinallataq Santo Espirituq espadantapas hap'iychis, chay espadaqa Diospa Siminmi.

¹⁸Diosmanta sapa p'unchay mañakuychis tukuy roqakuywan valekuywan Santo Espirituq yanapasqan. Chaypaqtaq rikch'ashallaychispuni, mana p'itiyta llapallan iñiqkunapaq Diosmanta mañapuspaykichis.

¹⁹Ñoqapaqpas mañapuwaychis, rimariqtiy Diosninchis simita rimarinaypaq qowananpaq, allin willakuykunaq pakasqa yachayninta mana manchakuspa willanaypaq.

²⁰Diosmi kachawarqan chay allin willakuykunata willanaypaq, chay hawan kunanpas preso kashani. Mañakuychis, rimanayta hinapuni mana manchakuspa allin willakuykunata willanaypaq.

²¹Señorpa llank'ananpi hunt'aq munasqanchis wawqe Tiquicon lliwta willasunkichis ñoqamantapas tukuy llank'ashasqaymantapas.

²²Chaypaqpunin paytaqa kachamushaykichis, imaynachus kashasqaykuta willanasuykichispaq, ahinapi qankunata kallpachanasuykichispaqwan.

²³Dios Yayanchis Señorninchis Jesucristopiwan thak-kaytapas iñiytapas munakuywan wawqe-panakunaman qosunkichis.

²⁴Señorninchis Jesucristota mana hayk'aq tukukuq munakuywan llapallan munakuqkunata Diosninchis saminchachun.