Read Quechua Cuzco Bible 1988 FILIPENSES 1 Bible Online

FILIPENSES 1 - Quechua Cuzco Bible 1988 bible

FILIPENSES 1

¹Jesucristoq kamachinkuna, Pablowan Timoteopiwanmi qelqamuykichis Filipos llaqtapi kashaq Jesucristopi iñiq llapa wawqe-panakunaman, uma runakunaman, yanapakuqkunamanwan:

²Dios Yayanchis, Señor Jesucristopiwan sumaqta qhawarisunkichis, thak-kaytapas qosunkichis.

³Sapa kuti qankunamanta yuyarikuspaymi Diosniyman graciasta qoni.

⁴Sapa kuti llapaykichispaq mañakuspaymi kusisqa mañapuykichis,

⁵qallariy p'unchaymantapacha kunankama Cristomanta allin willakuykunata willaqtiy llank'aysiwasqaykichismanta.

⁶Cheqaqtapunin qankunapi allin ruwayta qallariq Diosqa, Jesucristoq kutimunan p'unchaykama qankunapi ruwashasqanta hunt'anqa.

⁷Qankunaqa sonqoypipunin kashankichis, chaymi qankunamanta chay hina rimasqayqa chaninpuni. Qankunaqa Diospa qowasqan llank'anapi llank'aq-masiymi kankichis, preso kashaqtiypas libre kashaspa Cristomanta allin willakuykunata defiendeshaqtiypas, allinta takyachishaqtiypas.

⁸Diosmi yachan imaynatachus llapaykichista Jesucristoq munakuyninwan maytapuni munakusqayta.

⁹Kaytan Diosmanta mañakuni, tukuy yachaypipas allin reparaypipas aswan-aswantaraq munakunaykichispaq,

¹⁰aswan allin kaqtapuni akllakunaykichispaq, Cristoq hamunan p'unchaypi ch'uya sonqoyoq mana huchachana kanaykichispaqwan.

¹¹Ahinapi Jesucristoqa chanin ruwasqaykichiskunata kawsayniykichispi askhayachinqa, Diosta hatunchanapaq yupaychanapaqwan.

¹²Wawqe-panaykuna, yachanaykichistan munani, tukuy imaymana sucedewasqanqa Cristomanta allin willakuykunata astawan mast'arichisqanta.

¹³Chay hinapin Cristorayku preso kasqayta Roma hatun reypa wasinpi kaq soldadokunapas wakin runakunapas yachankuña.

¹⁴Chaymi askha wawqe-panakunapas preso kasqayta yachaspanku astawan Señorpi kallpachakuspanku mana mancharispa Diospa siminta willashanku.

¹⁵Cheqaqtapunin wakinqa envidiakuspa churanakuspa Cristomanta willanku, chaywanpas wakinqa allin yuyaywanmi willanku.

¹⁶Allin yuyaywan willaqkunaqa munakuspankun Cristomanta willanku, paykunaqa yachankun Cristomanta allin willakuykunata defiendenaypaq kaypi kashasqayta.

¹⁷Chay envidiakuqkunan ichaqa mana tukuy sonqowanchu willanku, aswanmi paykunaqa allinnillankuta maskhaspa ruwanku, preso kashaqtiy astawanraq llakichiwayta yuyaspa.

¹⁸Chaywanpas manan imananpaschu, aswanmi imaynallamantapas Cristomanta willanku, tukuy sonqowanpas mana tukuy sonqowanpas, chaymi ñoqaqa anchatapuni kusikuni. Arí, kusikusaqraqmi.

¹⁹Yachanin tukuy chaykunaqa kachariwanankupaq kananta, mañapuwasqaykichisrayku, Jesucristoq Espiritun yanapawasqanrayku ima.

²⁰Ñoqaqa makillapunin suyakushani ama imapipas p'enqachisqa kanayta, aswanpas mana mancharispa rimarinayta. Chay hinapin wañusaqña kawsasaqña chaypas, kunanpas qhepamanpas ñoqapi Cristoqa hatunchasqa kanqa.

²¹Ñoqaqa Cristollapaqñan kawsashani, wañuspaytaq aswan allinraq kasaq.

²²Chaywanpas kay pachapi kawsashaspayqa ima allinkunatapas Señorpaq llank'aymanraqmi, chaymi mana mayqentapas akllakuyta atishanichu.

²³Kay iskayninmantan mana mayqen kaqtapas akllakuyta atishanichu: Munaymanmi wañukapuspay Cristowan kuska kashayta, chaymi ñoqapaqqa aswan allin kanman.

²⁴Ichaqa kay pachapi kawsayniyqa aswan allinraqmi qankunapaq kallantaq.

²⁵Chayta yachaspan ñoqaqa yachakuniña manaraq wañunayta, chaymi qankunawan kashasaq aswan allinta purinaykichispaq, iñiyniykichispipas kusikunaykichispaqwan.

²⁶Chay hinaqa, huktawan hamuqtiymi qankunaqa Jesucristota ñoqa hawa astawan hatunchayta atinkichis.

²⁷Cristomanta allin willakuykunaman hinapuni allinta kawsaychis. Chayrayku watukuq hamuspaypas karupiña kashaspaypas, qankunamanta yachasaq huk sonqolla kusata sayashasqaykichista, allin willakuykunapi iñiyta defiendespa huk-nisqalla allinta llank'ashasqaykichista,

²⁸awqaykichiskunatapas mana manchakuspa kashasqaykichistawan. Chayqa sut'itan rikuchin ñak'ariyman paykuna rishasqankuta, qankunapaqtaq ichaqa sut'inchan qespichisqa kasqaykichista, chaytaqa Diosmi ruwanqa.

²⁹Cristoraykun qankunaqa samiyoq kankichis, manan iñinallaykichispaqchu, aswanpas payrayku ñak'arinaykichispaqwanmi.

³⁰Qankunaqa rikurqankichismi muchusqayta, qankunapas chay hinallatataqmi muchushankichisña, uyarishallankichistaqmi muchushasqaytapas.