Read Quechua Cuzco Bible 1988 FILIPENSES 4 Bible Online

FILIPENSES 4 - Quechua Cuzco Bible 1988 bible

FILIPENSES 4

¹Chay hinaqa, munakusqay wawqe-panaykuna, Señorwan hukllachasqa kaspa qaqata sayaychis. Ancha munakusqaykuna, maytapunin qankunawan tupaykuyta munashani, qankunan anchata kusichiwankichis, premioy hinataq kankichispas.

²Evodiatawan Sintikitawanmi valekuni Señorpi iñiq pura hinapuni sumaqta allipunanankupaq.

³Hinallataq qantapas cheqaq llank'aq-masíy, valekuyki, yanapaykuy chay warmikunata, paykunaqa ñoqawan kuskan Cristomanta allin willakuykuna willaypi tukuy sonqo llank'aysikurqanku Clementewanpas, wakin llank'aq-masiykunawanpas. Paykunaq sutinkuqa Diospa kawsay libronpi qelqasqañan kashan.

⁴Señorwan hukllachasqa kaspa kusikullaychispuni. Huktawanmi niykichis: ¡Kusikullaychispuni! nispa.

⁵Señorpa kutimuyninqa qayllaykamushanñan, chayrayku sumaq sonqo-kayniykichisqa lliw runakunaq yachasqan kachun.

⁶Ama imamantapas llakikuychischu, aswanpas lliwta Diosmanta mañakuspa necesitasqaykichista valekuychis, mañakuspaykichispas Diosman graciasta qoychis.

⁷Hinan Diosqa thak-kayta qosunkichis runakunaq mana aypay atisqan thak-kayta, chay hinapin Jesucristowan hukllachasqa kaqtiykichis sonqoykichistapas yuyayniykichistapas Diosqa waqaychanqa.

⁸Chaymanta astawanqa, wawqe-panaykuna, tukuy cheqaqkaqta, tukuy allinkaqta, tukuy chaninkaqta, tukuy ch'uyakaqta, tukuy sumaqkaqta, tukuy mentasqakaqta yuyaychis, ima allinpas yupaychanapaq hinapas kanmanraq chayqa, chaykunapi yuyaychis.

⁹Imatachus ñoqamanta yachaqarqankichis, chaskiwarqankichis, uyariwarqankichis, ñoqapi rikuwarqankichispas chaykunata ruwaychis, thak-kayta qoq Diostaq qankunawan kanqa.

¹⁰Anchatapunin ñoqaqa Señorpi kusikuni, unaymantaña huktawan yuyarikuwasqaykichisrayku. Qankunaqa manan qonqawarqankichischu, aswanpas yuyashallawarqankichispunin, ichaqa manan imaynata yanapaykuyta atishawarqankichischu.

¹¹Chaytaqa manan pisichikusqayraykuchu nini, ñoqaqa yachanin imaynapiña kaspapas kusisqallapuni kawsayta.

¹²Yachanin wakcha kawsayta, yachallanitaqmi allin qhapaq hina kawsaytapas, imayna kawsaypi kawsaqpas yachasqan kani: saksasqa kaspapas, yarqasqa kaspapas, askha kawsayniyoq kaspapas, pisi kawsayniyoq kaspapas.

¹³Kallpachawaqniy Cristowan hukllachasqa kaspan tukuy imaymanata atini.

¹⁴Chaywanpas allintan ruwarqankichis llakikuyniypi yanapawaspaykichis.

¹⁵Qankunaqa Filipos llaqtapi tiyaqkuna yachankichismi, chayllaraq allin willakuykunata qankunaman willashaqtiymi, Macedonia provinciamantapas lloqsishaqtiymi, mana pipas yanapaykuwarqanchu, aswanpas qankunallan willasqaymanta agradecekuspa yanapaykuwarqankichis.

¹⁶Tesalónica llaqtapi kashaqtiypas qankunaqa sapa kutin yanapayta apachimuwarqankichis pisichikuypi kashaqtiy.

¹⁷Manan imatapas qoykuwanaykichista munaspachu nishani, aswanpas Diospa ñawpaqenpi aswan askha kaqniyoq kanaykichista munaspan.

¹⁸Ñoqaqa llank'asqaymantan hunt'asqata chaskikapuni, astawanraqmi chaskinipas. Epafroditoman apachimuwasqaykichista chaskisqaymantaqa puchu-puchuraqmi kapuwan. Apachimuwasqaykichisqa sumaq q'apay ofrenda hinan karqan, Diospa sonqonman chayaq sacrificio hina.

¹⁹Chayraykun Diosniyqa tukuy necesitasqaykichista qopusunkichis, Jesucristopi askha qhapaq-kayninman hina.

²⁰Dios Yayanchista wiñay-wiñaypaq yupaychasun. Ahinapuni kachun.

²¹Jesucristowan hukllachasqa kashaq Diospi iñiq llapa wawqe-panakunata napaykapuwaychis. Chay hinallataqmi ñoqawan kashaq wawqe-panakunapas napaykamusunkichis.

²²Hinallataq kay llaqtapi tiyaq llapa wawqe-panakunapas napaykamusunkichis, astawanqa hatun rey Cesarpa wasinpi llank'aqkunan napaykamusunkichis.

²³Señorninchis Jesucristo llapaykichista sumaqta qhawarisunkichis.