Read Quechua Cuzco Bible 1988 COLOSENSES 1 Bible Online

COLOSENSES 1 - Quechua Cuzco Bible 1988 bible

COLOSENSES 1

¹Diospa munayninman hina Jesucristoq apostolnin*f** ñoqa Pablon Timoteo wawqepiwan,

²Colosas llaqtapi Diospa iñiq t'aqanman kay cartata qelqamuykichis. Qankunan Cristowan hukllachasqa kaspa hunt'aq kankichis: Dios Yayanchis Señor Jesucristopiwan sumaqta qhawarisunkichis, thak-kaytapas qosunkichis.

³Qankunapaq mañakuspaykuqa Señornichis Jesucristoq Yayan Diosmanmi graciasta qollaykupuni,

⁴Jesucristopi iñisqaykichismanta, Diospi iñiq llapa wawqe-panakunata munakusqaykichismantawan uyarispayku.

⁵Chaytaqa ruwashankichis hanaq pachapi qankunapaq waqaychasqa kashan chayta suyakuspan. Chay suyakuytan repararqankichis Cristomanta allin willakuykunata uyarispa, chay willakuyqa cheqaqpunin.

⁶Uyarisqaykichis p'unchaymantapachan qankunaqa imaynachus Diospa khuyapayakuynin kasqanta yacharqankichis, hinan chay allin willakuyqa qankuna ukhupi aswan-aswanta mast'arikurqan. Chay hinallataqmi kay pachantinpi mast'arikushan, hinantinpitaq runakunata saminchashan.

⁷Chaytan munasqa llank'aq-masinchis Epafraspas yachachirqasunkichis, paymi Cristoq hunt'aq kamachin kaspa ñoqanchista yanapashawanchis.

⁸Payllataqmi Santo Espirituq qosqan munakuyniykichismantapas willawarqanku.

⁹Chayraykun ñoqaykupas chayta uyarisqayku p'unchaymantapacha mana qonqaspa qankunapaq mañapushaykiku, Santo Espirituq tukuy yachayta entiendeyta qonasuykichispaq, Diospa munayninta allintapuni reqsinaykichispaq.

¹⁰Diosmantan mañakuyku Señorpa kaqkuna hinapuni purinaykichispaq, tukuy imapipas payta kusichinaykichispaq, llapa allin ruwayta aswan-aswanta ruwanaykichispaq, Diosta aswan allinta reqsiypi wiñanaykichispaqwan.

¹¹Hinallataq mañakuyku Diosqa ancha hatun atiyninwan kallpachanasuykichispaq, ahinapi tukuy pacienciawan lliwta muchunaykichispaq,

¹²Yayamanpas kusisqa graciasta qonaykichispaqwan. Dios Yayan k'anchashaq qayllanpi llaqtanman qonan herenciata chaskinanchispaq hinapuni ruwawarqanchis.

¹³Paymi laqhayaqpi kamachikuqpa atiyninmanta kacharichiwarqanchis, hinaspan munasqa Churinpa kamachikushasqanman churawarqanchis.

¹⁴Churin Jesucriston kacharichiwarqanchis, huchanchiskunata pampachawaspanchis.

¹⁵Cristoqa mana rikuna Diospa rikch'ayninmi, payqa karqanñan manaraq imapas kamasqa kashaqtin, chaymi payqa qollana.

¹⁶Paywanmi Diosqa kamarqan hanaq pachapi tukuy ima kaqkunatapas, kay pachapi kaqkunatapas, rikusqa kaqkunatapas, mana rikusqa kaqkunatapas, munayniyoqkunatapas, kamachikuqkunatapas, llapa atiyniyoqkunatapas. Cristowanmi Cristopaqmi tukuy imapas kamasqa karqan.

¹⁷Cristoqa tukuy imaymanamantapas ñawpaqtañan karqan, paymi tukuy imaymanatapas allinta purichishan.

¹⁸Hinallataq Cristoqa cuerpoq uman, chay cuerpoqa iñiq t'aqan. Criston tukuy imaymanaq qallariyninqa, paymi wañusqanmanta ñawpaqta kawsarimpun tukuy imaymanaqpas qollanan kananpaq.

¹⁹Diosmi munarqan tukuy Dios-kaynin Cristopi kananta.

²⁰Diosqa munallarqantaqmi Cristorayku tukuy imaymanata pay kikinwan allipunachiyta, kay pachapi kaqkunatapas hanaq pachapi kaqkunatapas Cristoq cruzpi wañusqanwan allipunachispa.

²¹Qankunapas ñawpaqtaqa Diosmanta karunchasqan karqankichis, mana allinkunata ruwaspa sonqoykichispi Dios contra yuyaykuspa.

²²Kunanmi ichaqa Cristoq runa-kayninpi wañusqanwan Diosninchis allipunachisunkichisña, paypa qayllanman ch'uyata, mana huchayoqta, mana huchachanata ima pusaykunasuykichispaq.

²³Chaypaqqa iñiypin allin takyasqa qaqata sayashanaykichis, uyarisqaykichis allin willakuykunapi suyakuymanta mana t'aqarikuspa. Chay allin willakuykunan kay pachantinpi runakunaman willasqa kashan, ñoqa Pablopas chay willakuypi llank'anaypaq churasqan kani.

²⁴Kunanqa kusikunin qankunarayku muchushasqaymanta, ahinapin Cristoq ñak'ariyninman pisishasqanta aycha cuerpoypi hunt'ashani, Cristoq cuerponrayku, chay cuerpon iñiq t'aqa.

²⁵Diosmi chay iñiq t'aqata yanapanaypaq churawarqan, paypa siminta hunt'asqata willanaypaq,

²⁶chay simin Diospa pakasqa yachayninqa, wiñaymantapacha miray-miraypaq pakasqa karqan, kunanmi ichaqa Diosqa sut'inchan paypi iñiqkunaman.

²⁷Diosqa munarqanmi mana Judío runakuna ukhupi chay pakasqa yachayqa may musphana kasqanta paykunaq yachananta. Chay pakasqa yachayqa Cristoq sonqoykichispi tiyasqanmi, paymi Diospa sumaq k'anchayninpi kanaykichistapuni suyachiqqa.

²⁸Cristomantan ñoqaykuqa willayku, llapan runata anyaspa, tukuy yachaywan yachachispa, sapankata Jesucristowan hukllachasqa allin wiñasqata Diosman qayllaykachinaykupaq.

²⁹Chaypaqtaqmi ñoqapas anchatapuni llank'ashani, Cristoq atiy qowasqan tanqariwaqtin kallpachakuspay.