Read Quechua Cuzco Bible 1988 COLOSENSES 2 Bible Online

COLOSENSES 2 - Quechua Cuzco Bible 1988 bible

COLOSENSES 2

¹Ñoqaqa munanin yachanaykichista, qankunarayku, Laodicea llaqtapi tiyaq iñiqkunarayku, llapa mana reqsiwaqniy iñiqkunarayku ima anchatapuni kallpachakuspa llank'ashasqayta.

²Chaytan ruwani sonqoykichispi kallpachakunaykichispaq, munakuypi hukllachasqa kanaykichispaq. Ahinapin cheqaq hunt'asqa yuyaywan qhapaqyachisqa kankichis Dios Yayaq pakasqa yachayninta yachanaykichispaq, chay pakasqa yachayqa Criston.

³Paypin Diospa tukuy imaymana yachayninpas yuyayninpas, pakasqa illa hinaraq kashan.

⁴Kaytan niykichis, ama pipas sumaq simikunawan q'otunasuykichispaq.

⁵Ñoqa kikiyña mana qankunawanchu kashani chaypas, yuyayniypiqa qankunawanpunin kashani, chaymi anchata kusikushani allintapuni kawsashasqaykichismanta, Cristopi iñiyniykichispas mana kuyuriq kashasqanmantawan.

⁶Chayrayku imaynatachus Señor Jesucristota sonqoykichispi chaskikurqankichis, chayman hinapuni paywan hukllachasqa kawsaychis.

⁷Paypi saphichasqa kawsaychis, takyachisqa kaychis, yachachisqa kasqaykichisman hina iñiypi kallpachakuychis, Diosmanpas anchatapuni graciasta qoychis.

⁸Makilla cuidakuychis, paqtan pipas q'otusunkichisman yanqa mana valeq yuyaykunawan, llulla yachachikuykunawan ima, paykunaqa manan Cristoq yachachisqantachu yachachinku, aswanpas runakunaq yachachikuynillantan kay pachata kamachiq espiritukunaq yachaynintawan yachachinku.

⁹Diospa tukuy kayninmi Cristoq runa-kayninpi kashan.

¹⁰Cristowan hukllachasqa kaspaykichismi qankunaqa Diospa kawsayninwan hunt'a kankichis. Criston llapa kamachikuqkunatapas atiyniyoqkunatapas kamachin.

¹¹Paywan hukllachasqa kaspaykichismi qankunapas señalasqa karqankichis, ichaqa manan aycha cuerpoykichispi qhari-kayniykichis señalasqa señalaywanchu, aswanpas Cristoq ruwasqan señalaywanmi. Chay señalayqa aycha cuerpoq atiyninmanta kacharichisqa kaymi.

¹²Qankunaqa bautizasqa kaspaykichismi Cristowan kuska p'ampasqa karqankichis, hinaspa paywan kuskallataq kawsarichimpusqa karqankichis, wañusqanmanta Cristota kawsarichimpuq Diospa atiyninpi iñisqaykichisrayku.

¹³Qankunaqa huchaykichiskunapin wañusqa kasharqankichis, aycha cuerpoykichispa atiyninmanta mana kacharichisqa kaspa. Kunanmi ichaqa Cristotawan kuskata Dios kawsarichisunkichis, lliw huchaykichiskunatapas pampachaspa.

¹⁴Diosmi manu kasqanchis qelqata ñoqanchis contra kamachikuy simikunatawan yanqayachispa kacharichiwarqanchis Cristoq cruzpi wañusqanwan.

¹⁵Cristoqa cruzpi wañuyninwanmi kamachikuqkunatapas atiyniyoqkunatapas atiparqan, hinaspa munaychakuyninkuta qechuspa, tukuy runaq qayllanpi paykunata k'umuykachachirqan.

¹⁶Chayrayku, ama pipas qankunata huchachachunchu mikhusqaykichismanta, ukyasqaykichismanta, fiesta p'unchaykunamanta, mosoq killa fiestamanta, samana p'unchaykunamantapas.

¹⁷Tukuy chaykunaqa imakunachus kanan karqan chaykunaq llanthullanmi, cheqaqkaqmi ichaqa Cristo.

¹⁸Ama pipas premioykichista qechuchunchu huch'uyyaykukuqman tukuspa, angelkunatapas yupaychaspa. Chay runakunaqa mosqoypi rikusqankumanmi hap'ipakunku, paykuna kikinkuq yanqa yuyaynillankuwan hatunchakuspa.

¹⁹Paykunaqa manan Cristoman hap'ipasqachu purinku. Criston cuerpoq umanqa, imaynan cuerponchisqa moqochunkunawan hank'unkunawan hukllaman hap'ichisqa kashan, chay hinatan ñoqanchistapas Cristoqa hukllachawanchis, hinaspan wiñachiwanchis Diospa munasqanman hina.

²⁰Qankunaqa Cristowan kuska wañuspaykichismi kay pachata kamachiq espiritukunata saqepunkichisña, kunanri, ¿imaynataq kay pachaqpas kawaqchis hinaqa kamachikuyninkunata kasukuspa kawsashankichis?

²¹Paykunan kamachisunkichis: Ama kayta hap'iychu, ama chayta mikhuychu, ama haqayta llamiykuypaschu, nispa.

²²Tukuy chay kamachikuykunaqa ruwashasqa tukukapuqllan, runakunaq yachachikuynin kamachikuynillantaqmi kanpas.

²³Cheqaqtapunin chay kamachikuykunaqa allin yachayniyoq kayman rikch'akun, chaykunaqa yupaychaytan, huch'uyyaykukuytan, cuerpota sinchi muchuchiytan kamachinku, ichaqa manan ima atiyniyoqpaschu chay kamachikuykunaqa runaq millay munayninkunata atipanapaqqa.