Read Quechua Cuzco Bible 1988 COLOSENSES 3 Bible Online

COLOSENSES 3 - Quechua Cuzco Bible 1988 bible

COLOSENSES 3

¹Cristowan kuskan kawsarichimpusqa kankichis, chayrayku hanaq pachapi kaqkunata maskhaychis, chaypin Cristo tiyashan, Diospa paña ladonpi.

²Ama kay pacha kaqkunapichu yuyaychis, aswanpas hanaq pacha kaqkunapi yuyaychis.

³Qankunaqa Cristowanmi wañurqankichis, kawsayniykichistaq Cristowan Diospi pakasqa kashan.

⁴Kikin Cristopunin kawsayniykichisqa, chaymi pay rikhurimuqtin qankunapas paywan kuska sumaq k'anchayninpi rikhurillankichistaq.

⁵Chay hinaqa, qankuna kay pachapi lliw millay ruwaykunamanta t'aqakuychis, ama qhellipi puriychischu, ama millay map'ata ruwaychischu, ama cuerpoykichispa munasqanta ruwaychischu, ama mana allinta yuyaykuychischu, ama munapayaychischu, munapayayqa ídolo yupaychay hinan.

⁶Chaykuna hawan mana kasukuqkunaman Diospa phiñakuyninqa chayamun.

⁷Qankunapas ñawpaqqa chaykunata ruwaspan purirqankichis.

⁸Kunan ichaqa tukuy kaykunata saqepuychis: K'arak phiñakuyta, phiñasqalla kayta, millay-kayta, tumpayta, qhelli rimayta.

⁹Ama qankuna pura llullakuychischu. Qankunaqa ñawpa kawsayniykichispi millay ruwaykunatan wikch'upunkichisña,

¹⁰hinaspan mosoq runa-kaywan p'achawan hina churakunkichisña. Kamaqniykichis Diosmi paypa rikch'ayninman chay mosoq runata mosoqyachishan payta allinta reqsinankama.

¹¹Chay kawsaypiqa manan t'aqanakuy kanñachu, Griego runawanpas Judío runawanpas, qhari-kaynin señalasqawanpas mana señalasqawanpas, wak llaqtayoqwanpas ch'unchuwanpas, kamachiwanpas mana kamachiwanpas, aswanpas Cristollañan, payllataqmi llapapipas kashan.

¹²Diosmi qankunataqa munakusunkichis, chaymi paypaq kanaykichispaq akllakurqasunkichis. Chay hinaqa p'achawan hina p'achakuychis khuyapayakuq-kaywan, sumaq sonqo-kaywan, huch'uyyaykukuywan, llamp'u sonqo-kaywan, pacienciawan ima.

¹³Qankuna pura paciencianakuychis, pipas hukpa contranpi imatapas riman chayqa, pampachaykunakuychis. Imaynan Cristopas pampacharqasunkichis, chay hinallataq qankunapas pampachaychis.

¹⁴Chaykunamanta astawanqa munakuq sonqo kaychis, munakuymi tukuy imatapas sumaqta hukllaman tukuchin.

¹⁵Diosqa huk cuerpolla kashaqtan waqyarqasunkichis thak-kaypi kawsanaykichispaq, chayrayku Cristoq qosqasuykichis thak-kayqa sonqoykichispi kamachikuchun. Hinallataq agradecekuq kaychis.

¹⁶Cristoq yachachikuynin sonqoykichispi llimp'arichun, qankuna pura tukuy yachaywan yachachinakuspa kallpachanakushaqtiykichis, salmokunata, yupaychana takikunata, Santo Espirituq yuyaychasqan takikunata takishaqtiykichis, Diosman tukuy sonqo graciasta qoshaqtiykichis.

¹⁷Tukuy imatapas ruwankichis otaq rimankichis chayqa, lliwta ruwaychis Señor Jesuspa sutinpi, paywan Dios Yayaman graciasta qospa.

¹⁸Casarasqa warmikuna, qosaykichista kasuychis, chaytan ruwanaykichis Señorpi iñiqkuna hinapuni.

¹⁹Qosakuna, warmiykichista munakuychis, amataq paykunata k'utuychischu.

²⁰Wawakuna, tukuy imapi tayta-mamaykichista kasuychis, chaymi Señorta kusichin.

²¹Tayta-mamakuna, wawaykichista ama k'utuychischu, paqtan umphuyankuman.

²²Kamachikuna, kay pacha patronniykichista tukuy imapi kasuychis, ama qhawashasqallachu ruwaychis runakunata kusichinallaykichispaqqa, aswanpas cheqaq sonqowan Diosta manchakuspa ruwaychis.

²³Tukuy imata runakunapaq ruwaspaykichispas tukuy sonqowan ruwaychis, Señorpaq hinapuni, ama runakunapaq hinachu.

²⁴Qankunaqa yachankichisñan tupaqniykichis herenciata Señorpa qonasuykichista. Qankunaqa cheqaq Patronniykichis Cristotan servishankichis.

²⁵Mana chaninta ruwaqmi ichaqa, mana chanin ruwasqallantataq chaskinqa, Diosqa manan mayqen runamanpas sayapakunchu.