Read Quechua Cuzco Bible 1988 COLOSENSES 4 Bible Online

COLOSENSES 4 - Quechua Cuzco Bible 1988 bible

COLOSENSES 4

¹Patronkuna, kamachiykichista sumaqta chaninta rikuychis, qankunaqpas Patronniykichis hanaq pachapi kasqanta yachaspaykichis.

²Diosmantaqa mañakushallaychispuni, graciasta qospa rikch'ashallaychispuni.

³Mañapullawaychistaq ñoqaykupaqpas, Cristomanta pakasqa yachayta willanaykupaq punkuta Dios kicharipuwanankupaq, chaypaqmi presopas kashani.

⁴Diosmanta mañapuwaychis ancha sut'itapuni Cristomanta willanaypaq.

⁵Diospi mana iñiq runakunaq qayllanpi allin yuyaywanpuni kawsaychis, tiempoykichistapas amataq usuchiychischu.

⁶Rimakuyniykichisqa ancha sumaqpuni kachun, kachiwan kachichasqa hina, ahinapin yachankichis imaynatachus sapankaman allinta kutichinaykichista.

⁷Imaynachus ñoqa kashasqaytaqa munasqanchis wawqe Tiquicon lliwta willasunkichis, paymi Señorpa hunt'aq kamachin, llank'aq-masiytaqmi kanpas.

⁸Paytaqa kachamuykichis imaynachus kasqaykuta willanasuykichispaqpunin, sonqoykichistapas kallpachananpaqwanmi.

⁹Tiquicoqa hamushan munasqa hunt'aq wawqenchis Onesimopiwanmi. Onesimoqa qankunamanta hukniykichismi. Paykunan tukuy imachus kaypi kaqkunataqa willasunkichis.

¹⁰Presomasiy Aristarcon Bernabepa primon Marcospiwan napaykamusunkichis. Marcos watukamusunkichis chayqa sumaqta chaskiykuychis, chaytaqa ñan kamachirqaykichisña.

¹¹Napaykamullasunkichistaqmi Justo sutichasqa Jesuspas. Paykunallan Judío runakunamanta llank'aq-masiykunaqa kanku, Diospa kamachikushasqanmanta ñoqawan willanku, paykunan anchata kallpachawarqanku.

¹²Cristoq kamachin Epafraspas napaykamusunkichistaqmi, payqa hukniykichismi. Payqa Diosmanta mañapullasunkichispunin Diospa munayninta ruwaspa allin takyasqapuni kanaykichispaq, iñiypipas mana iskayrayaspa wiñasqaña kanaykichispaqwan.

¹³Ñoqaqa allintan yachani qankunapaq Epafraspa anchata llank'ashasqanta, qankunapaqpas, Laodicea llaqtapi kaqkunapaqpas, Hierápolis llaqtapi kaqkunapaqpas.

¹⁴Munasqa médico Lucaspas napaykamullasunkichistaqmi, hinallataq Demaspas.

¹⁵Laodicea llaqtapi kashaq wawqe-panakunata napaykapuwaychis, hinallataq Ninfatapas napaykapuwaychis, wasinpi huñukuq iñiq t'aqatawan.

¹⁶Qankuna kay cartata leespaykichisña Laodicea llaqtapi iñiq t'aqaman apachiychis, paykunapas leenankupaq, qankunapas Laodicea iñiq t'aqamanta apachimusunkichis chay cartata leellaychistaq.

¹⁷Arkipota niychis: Señorpa qosqasuyki llank'anataqa allintapuni hunt'ay, nispa.

¹⁸Ñoqa Pablon makiywan kay napaykukuyta qelqamuykichis. Preso kasqaymanta yuyarikuwaychis. Diosninchis sumaqta qhawarisunkichis.