Read Quechua Cuzco Bible 1988 1 TESALONICENSES 1 Bible Online

1 TESALONICENSES 1 - Quechua Cuzco Bible 1988 bible

1 TESALONICENSES 1

¹Ñoqa Pablon, Silvanopiwan Timoteopiwan kay cartata Tesalónica llaqtapi kashaq iñiq t'aqaman qelqamuni. Qankunaqa Dios Yayawan Señor Jesucristowan hukllachasqan kashankichis: Dios Yayanchis Señor Jesucristopiwan sumaqta qhawarisunkichis thak-kaytapas qosunkichis.

²Llapaykichismantan Diosman graciasta qollaykupuni, mañakuyniykupipas qankunamantaqa yuyarikullaykupunin.

³Dios Yayanchispa ñawpaqenpin yuyarillaykupuni ancha hatun iñiywan ruwasqaykichismanta, munakuywan llank'asqaykichismanta, Señorninchis Jesucristopi ancha pacienciawan suyakuyniykichismantapas.

⁴Wawqe-panaykuna, Diosmi munakusunkichis, yachaykutaqmi paypa akllakusqan kasqaykichistapas.

⁵Cristomanta allin willakuykunatan willarqaykichis, manan runaq simillanwanchu, aswanpas mana imamanta iskayrayaspan atiywan Santo Espirituq ruwasqanwan willarqaykichis. Allintataqmi yachankichispas imaynatachus qankuna ukhupi allinniykichispaq kawsasqaykuta.

⁶Qankunaqa ñoqaykumantan yachaqakurqankichis, hinallataq Señormantapas, hinaspan sinchita ñak'arishaspaykichispas Diospa siminta chaskirqankichis Santo Espirituq kusichisqasuykichiswan.

⁷Chay hinapin Macedonia provinciapipas Acaya hap'iypipas llapa iñiqkunaq yachaqakunanpaq karqankichis.

⁸Qankunan Señorpa simintaqa mast'arirqankichis, manan Macedoniallapichu manataq Acayallapichu, aswanpas tukuy hinantinpin Diospi iñisqaykichisqa uyarikurqan, chaymi manaña imapas ninayku kanñachu.

⁹Paykuna kikinkupunin willakunku imaynatachus ñoqaykuta chaskiwasqaykikuta, imaynatachus idolokunamanta Diosman kutirikusqaychistapas, kawsaq cheqaq Diosta kasukunaykichispaq.

¹⁰Willakullankutaqmi wañusqanmanta Diospa kawsarichimpusqan hanaq pachamanta hamuq Diospa Churin Jesusta suyashasqaykichistapas, Jesusmi hamushaq manchay ñak'ariymanta qespichiwaqninchisqa.