Read Quechua Cuzco Bible 1988 1 TESALONICENSES 3 Bible Online

1 TESALONICENSES 3 - Quechua Cuzco Bible 1988 bible

1 TESALONICENSES 3

¹Chayraykun, manaña astawan qankunamanta llakikuyta muchuyta atispa, Atenas llaqtapi sapallayku qhepanaykupaq rimanakurqayku.

²Hinaspan Diospa kamachin Cristomanta allin willakuykunata willaqmasiyku wawqenchis Timoteota kachamurqayku, iñiyniykichispi kallpachanasuykichispaq yanapanasuykichispaqwan,

³ama pipas chay sasachakuykuna hawa pisi kallpayananpaq. Qankunaqa yachankichisñan chay sasachakuykunata muchunanchista.

⁴Qankunawan kashaspaykuraqmi ñawpaqmantaña qatiykachasqa kananchistaqa willarqaykiku, chaymi ahinapuni karqan, imaynan yachankichisña hina.

⁵Chayrayku ñoqapas, manaña astawan qankunamanta llakikuyta muchuyta atispa, imaynachus iñiyniykichispi kashasqaykichista yachanaypaq Timoteota kachamurqaykichis, “paqtan Satanasqa wateqasunkichisman karqan, ahinapi llank'asqayku usuqpaq kanman”, nispa yuyaykuspay.

⁶Kunanmi ichaqa Timoteoqa Tesalónica llaqtamanta kutimuspan willawanku qankunaq iñiyniykichismanta, munakuyniykichismantawan, chaymantan kusikurqayku. Munakuywansi ñoqaykumanta yuyarikushallankichispuni, ñoqaykuwan tupaykuytapas anchatapunis munashankichis, imaynan ñoqaykupas qankunawan tupaykuytapuni munashayku hinata.

⁷Chayrayku, wawqe-panaykuna, hinaña sasachakuykunapi muchuykunapi kashaspaykupas, iñiyniykichispi qaqa sayashasqaykichista yachaspa maytapuni sonqochakurqayku.

⁸Kunanqa kawsariykun, qankuna Señorwan hukllachasqa kaspa mana kuyuriq kashasqaykichiswan.

⁹Chhaynaqa, ancha hatun kusikuywanmi Diosninchispa ñawpaqenpi qankuna hawa q'ochukushayku, chaymantan mana imaynatapas Diosman graciasta qoyta atishaykuchu.

¹⁰Tuta p'unchaymi Diosmanta tukuy sonqo mañakullaykupuni qankunawan uya-uya pura tupanaykupaq, iñiyniykichispi manaraq yachasqaykichista yachachinaykupaqwan.

¹¹Anchatan munashayku kikin Dios Yayanchis, Señorninchis Jesucristopiwan qankunaman watukuqta pusamuwanankuta.

¹²Señorpuni munakuyniykichista wiñachispa llimp'arichichun qankuna ukhupipas lliw runakunapaqpas, imaynan munakuyniykupas qankunapaq llimp'arin hinata.

¹³Señorninchis sonqoykichispi allinta kallpachasunkichis, Señorninchis Jesucristo llapallan paypi iñiqkunawan hamuqtin, Dios Yayanchispa qayllanpi ch'uyataq mana huchachanataq kanaykichispaq.