Read Quechua Cuzco Bible 1988 JOSÚE 1 Bible Online

JOSÚE 1 - Quechua Cuzco Bible 1988 bible

JOSÚE 1

¹Señor Diospa kamachin Moisespa wañukapusqan qhepatan, Señor Diosqa Moisespa yanapaqnin Nunpa churin Josueta nirqan:

²—Kamachiy Moisesmi wañukapun, ahinaqa qanpas Israel runakunapas wakichikuychis Jordán mayuta chimpaspa qankunaman qonay hallp'aman haykunaykichispaq.

³Chaypin qosqaykichis llapan chayasqaykichis hallp'ata imaynan Moisesman prometerqani hinata.

⁴Chay hallp'aykichismi kanqa wichay lado Líbano orqo-orqomanta uray lado ch'inneqkama, hinallataq inti lloqsiy lado hatun Eufrates mayumanta inti haykuy lado Mama Qochakama, chaypi kaq Het runakunaq hallp'anpas qankunaqmi kapunqa.

⁵Kawsashaqtiykiqa manan pipas atipasunkichu, imaynan Moiseswanpas kasharqani hinallataqmi qanwanpas kasaq, ahinaqa manapunin saqerparisqaykichu manallataqmi wikch'usqaykipaschu.

⁶Qanmi machulaykichisman qosqaykichis nispa jurasqay hallp'aman chay runakunata pusaykuspa tiyachinki, chayrayku kallpachakuspa qharita sayay.

⁷¡Kallpachakuy! ¡Qhari kay! Kamachiy Moisespa qosqasuyki kamachikuykunata llapantapuni hunt'ay, amapunin chaykunataqa chhikallantapas qonqankichu, chay hinapin allillan kasunki may purisqaykipipas.

⁸Kamachikuy simi qelqamantaqa rimashallankipunin, chaytaqa tuta p'unchaymi yuyaymanallankipuni qelqaq kamachikusqanman hinapuni ruwanaykipaq. Chay hinapin tukuy ima ruwasqaykipas allinkama kasunki.

⁹Qhawariy, ñoqan kamachiykiña kallpachakuspa qhari hinapuni sayanaykita. Ama manchakuychu, amataq pisi kallpayaychu, ñoqa Apu Señor Diosniykiqa qanwanpunin kashasaq maytaña riqtiykipas, nispa.

¹⁰Hinan Josueqa Israel uma runakunata kamachirqan:

¹¹—Riychis llapan runakunaman, kamachimuychistaq qoqawa ruwakunankupaq. Kinsa p'unchaymanta hinan Jordán mayuta chimpasunchis Apu Señor Diosninchispa qowananchis hallp'ata hap'ikapunanchispaq, nispa.

¹²Hinallataq Josueqa Rubén ayllu runakunata, Gad ayllu runakunata, Manasés kuskan ayllu runakunatapas nirqan:

¹³—Señor Diospa kamachin Moisespa nisqasuykichis simita yuyariychis, paymi nirqan: Apu Señor Diosniykichismi kay hallp'ata qosunkichis mana kuyuq tiyanaykichispaq, nispa.

¹⁴Jordanpa kay ladonpi Moisespa qosqasuykichis hallp'apin saqenkichis warmiykichista, wawaykichista, uywaykichiskunatapas. Allin maqanakuq qharikunallan maqanaykichista aparikuspa, wakin ayllukunaq ñawpaqenta mayuta chimpankichis. Paykunata yanapankichis

¹⁵Señor Dios mana kuyuqta tiyachinankama imaynan qankunatapas tiyachirqasunkichis hinata, yanapallankichistaqmi Apu Señor Diosniykichispa qonan hallp'ata hap'ikapunankukama. Chaymantataq kutimpunkichis Moisespa qosqasuykichis kay hallp'aykichista hap'ikapunaykichispaq, nispa.

¹⁶Paykunataq Josueta nirqanku: —Arí, llapan niwasqaykikutan ruwasaqku, mayta: Riychis, niwaqtiykikupas purisaqkun.

¹⁷Imaynan Moisestapas tukuy kamachiwasqankuta kasurqayku hinatan qantapas kasusqaykiku. Apu Señor Diosniykipunitaq qanwan kachun, imaynan Moiseswanpas karqan hinata.

¹⁸Kamachikusqaykita mana kasukuqkunapas qan contra sayariqkunapas wañuchisqan kanqa. Chhaynaqa, kallpachakuy, qharita sayay, nispa.