Read Quechua Cuzco Bible 1988 JOSÚE 11 Bible Online

JOSÚE 11 - Quechua Cuzco Bible 1988 bible

JOSÚE 11

¹Hazor llaqta rey Jabintaq Israel runakunaq imaymana ruwasqanta uyarispa, willaqkunata kacharqan Madón llaqta rey Jobabman, Simrón llaqta reyman, Aksaf llaqta reymanwan,

²hinallataq wichay lado orqo-orqopi reykunaman, Kineret qochaq uraynin Jordán qheshwa wayq'o reykunaman, Shefela nisqa moqo-moqopi reykunaman, Mama Qocha pata Dor llaqtaq muyuriqninpi reykunamanpas.

³Kachallarqantaq Jordán qheshwa wayq'opi tiyaq Canaán runakunaman, Mama Qocha patapi tiyaq Canaán runakunaman, orqo-orqopi tiyaq Amor runakunaman, Het runakunaman, Fares runakunaman, Jebus runakunaman, Mizpa hap'iypi Hermón orqo qhatapi tiyaq Hiv runakunamanpas.

⁴Hinan llapan chay reykunaqa lloqsimurqanku askha soldadokunantin, caballokunantin, carretakunantin ima. Paykunan karqanku qocha pata aqo hina mana yupay atiyraq.

⁵Llapankutaq huñuykukurqanku, hinaspan Merom pukyu-pukyu patapi qaynarqanku Israel runakunaman phawaykunankupaq.

⁶Señor Diosmi Josueta nirqan: —Ama paykunata manchakuychu, paqarin kay horastan lliw wañusqataña rikuchisqaykichis. Qantaqmi caballonkuq hank'untaraq kuchunki, carretankutapas ninawan kanaykunki, nispa.

⁷Chaymi Josueqa Israel soldadokunantin qonqaylla Merom pukyu-pukyu patapi paykunaman phawaykurqan.

⁸Señor Diostaq Israel runakunawan atipachirqan, chaymi paykunaqa p'analla qatiykacharqanku hatun Sidón llaqtakama, Misrefotmaim llaqtakama, hinallataq inti lloqsimuy lado Mizpa wayq'okama. Manapunin hukllapas kawsarqanchu.

⁹Josueqa Señor Diospa nisqanta hunt'aspan caballonkuq hank'unta kuchurqarirqan, carretankutapas kanaykurqan.

¹⁰Chaymanta kutimuspataq Hazor llaqtata atiparqan, reynintapas wañuchirqan. Llapan chaypi tiyaqkunatan wañuchirqanku, llaqtankutapas kanaykurqanku. Hazor llaqtaqa chay llaqtakunamanta uman kasqa.

¹²Chay hinatakaman chay huñunakuq reykunaq llaqtankunata hap'irqan, hinaspan llapanta wañuchispa llaqtakunata thunirqan, Señor Diospa kamachin Moisespa nisqanman hina.

¹³Chay tukuywanpas hallp'a montosqa patapi llaqtakunamantaqa Hazor llaqtallatan kanarqanku.

¹⁴Chay llaqtakunapi tiyaqkunataqa mana ch'ullayoqta wañurachispankun uywankunata lliw kaqninkutawan llat'anarqanku.

¹⁵Imaynatachus Señor Diosqa Moisesta kamachirqan, kaqllataqmi Moisespas Josueta kamachirqan, Josuetaqmi chay kamachikuyta llapachallanta hunt'arqan.

¹⁶Chay hinatan Josueqa suyuntinta hap'ikapurqan: uray ladopi orqo-orqota, Neguev nisqa hap'iyta, Gosén nisqa llapan hap'iyta, Shefela nisqa moqo-moqotawan, Jordán qheshwa wayq'ota, wichay ladopi llapan orqo-orqota, chaypi kaq moqokunatawan.

¹⁷Hap'ikapusqan suyuqa karqan uray lado Seir qaylla Halak orqomanta Hebrón orqo chaki Libanoq qheshwanpi Baal-Gad llaqtakama. Josueqa unaytan chay reykunawan maqanakurqan, ichaqa lliwtan wañuchirqan.

¹⁹Gabaonpi Hiv runakunallan Israel runakunawanqa sumaqta rimanakurqan, wakin llaqtakunataq atipasqakama karqanku.

²⁰Señor Diosqa awqakunaq sonqontan rawrarichisqa Israel runakunawan maqanakunanpaq, chaymi Israel runakunaqa mana khuyapayaykuspa llapanta wañurachirqanku Señor Diospa Moisesta kamachisqanman hina.

²¹Chay p'unchaykunapin Josueqa Hebrón llaqtapi, Debir llaqtapi, Anab llaqtapi, uray lado orqo-orqopi, wichay lado orqo-orqopi tiyaq Anak runakunata atipaspa wañuchirqan, llaqtankunatapas thunirqan.

²²Chay hinapin Israel suyupi Anak runakunaqa llapallan wañuchisqa karqanku, aswanpas Gaza llaqtapi, Gad llaqtapi, Asdod llaqtallapiwanmi iskay kinsa Anak runakunaqa kawsarqanku.

²³Ahinatan Josueqa Señor Diospa Moisesta kamachisqanman hina suyuntinta hap'ikapurqan. Chaymantataq llapan Israel runakunaman rakirqan ayllunkunaq kasqanman hina paykunaq hallp'an kapunanpaq. Chaymantaraqmi suyuntinpi maqanakuymanta samarirqanku.