Read Quechua Cuzco Bible 1988 JOSÚE 13 Bible Online

JOSÚE 13 - Quechua Cuzco Bible 1988 bible

JOSÚE 13

¹Sinchi yuyaqña Josué kaqtintaq, Señor Diosqa nirqan: —Qanqa sinchitañan machuyaykapushanki, askha hallp'akunaraqmi mana hap'isqa kashan:

²Filistea runakunaq hallp'an, Gesur runakunaq hallp'an,

³Egipto suyu qorpa Sihor mayumanta wichay ladopi Ekrón llaqta qorpakama. Chay hallp'akunapin Filistea runakunaq phisqa reyninkuna tiyashanku Gaza llaqtapi, Asdod llaqtapi, Askalón llaqtapi, Gat llaqtapi, Ekrón llaqtapiwan. Chay hallp'akunataqmi Canaán runakunaq karqan. Kashallantaqmi uray ladopi Avim runakunaq hallp'anpas, kaqllataq Canaán runakunaq hallp'anpas Sidón runakunaq Mearah llaqtanmanta Amor runakunaq qorpanpi Afek llaqtakama.

⁵Kashallantaqmi Gebal runakunaq hallp'an, kaqllataq inti lloqsiy lado Líbano suyupas Hermón orqo chaki Baal-gadmanta Hamat Q'asakama.

⁶Libanomanta Misrefotmaim llaqtakama orqo-orqopi tiyaq llapan Sidón runakunatan haykusqaykichisman hina wikch'usaq. Chaymi qanqa kamachisqayman hina Israel runakunaman chay hallp'ata rakipunki chaypi tiyakapunankupaq.

⁷Chay hallp'akunatan rakipunki isqonnintin aylluman, Manasespa kuskannin ayllunmanwan, nispa.

⁸Rubén aylluman, Gad aylluman, Manasespa kuskannin ayllunmanwanmi Moisesqa Jordán mayu inti lloqsiy ladopi hallp'ankunata ñawpaqña rakiykapusqa.

⁹Hallp'ankutaq karqan Arnón mayu qayllapi Aroer llaqtamanta, hinallataq Arnón wayq'opi kaq llaqtamantapas, Medeba nisqa pata pampantin Dibón llaqtakama,

¹⁰hinallataq rey Sehonpa llapan llaqtankunapas Amón runakunaq qorpankama. Sehonqa Hesbón llaqtapi kamachikuq Amor runakunaq reyninmi kasqa.

¹¹Chay kinsa aylluqtaq kapurqan Galaad hap'iy, Gesur suyu, Maaka suyupiwan, kaqllataq Hermón orqopas, llapan Basán suyu Salka llaqtakamaraq.

¹²Chaymi kasqa Refaim runakunamanta puchuqpa miraynin Basán suyu rey Ogpa hallp'an, payqa Astarot llaqtapi Edrei llaqtapiwanmi kamachikusqa. Sehonta Ogtawanmi Moisesqa atipaspa chinkachipusqa.

¹³Gesur runakunan Maaka runakunapiwan mana qarqosqachu kasqaku, hinallapuni paykunaqa Israel runakunawan kuskalla tiyakapusqaku.

¹⁴Leví ayllumanmi ichaqa Moisesqa hallp'ata mana qosqachu, paykunapaqqa Israelpa Diosnin Señorman ruphachinapaq apamusqa ofrendamanta wakinninmi karqan, Diospa Moisesman nisqanman hina.

¹⁵Rubén ayllumanmi Moisesqa hallp'ata rakiykusqa mirayninkuman hina.

¹⁶Chay hinapin hallp'ankuqa mast'arikurqan Arnón mayu qaylla Aroer llaqtamanta, hinallataq chay wayq'opi llaqtamantawan Medeba nisqa pata pampantin Hesbón llaqtakama. Chay pata pampapi llaqtakunataq karqan Dibón, Bamot-baal, Bet-baal-meón,

¹⁸Jahaza, Kademot, Mefaat,

¹⁹Kiriataim, Sibna, wayq'opi kaq moqo patapi Zaret-sahar,

²⁰Bet-peor, Bet-jesimot, Pisga orqo qhatakunapiwan.

²¹Hinan pata pampapi llapan llaqtakuna, Hesbón llaqtapi kamachikuq Amor runakunaq reynin Sehonpa suyunpas Rubén aylluq kapurqan. Moisesmi atipasqa Sehonta, hinallataq Sehonpa kamachin Madián suyu uma runakunatawan: Evita, Rekimta, Zurta, Hurta, Rebatawan.

²²Israel runakunaqa wañuchillasqakutaq Beorpa churin watuq Balaamta askha runakunatawan.

²³Llapan chay llaqtakunan huch'uy llaqtakunantin Rubén aylluman mirayninkuman hina rakisqa kasqa. Inti haykuy qorpataq Jordán mayu patantakama kasqa.

²⁴Kaqllataq Gad ayllumanpas Moisesqa hallp'ata rakiykusqa mirayninkuman hina.

²⁵Chay hinapin paykunaq karqan Jazer hap'iypas, Galaad hap'iypi llapan llaqtakunapas, hinallataq Rabá llaqta inti lloqsiy lado Amón runakunaq kuskannin hallp'amanta Aroer llaqtakama,

²⁶Hesbón llaqtamanta Ramat-mizpa llaqtakama, hinallataq Betonim llaqtakama, kaqllataq Mahanaim llaqtamantapas Lodebar llaqta qorpakama.

²⁷Jordán qheshwa wayq'opitaq kasqa Bet-aram llaqta, Bet-nimra llaqta, Sukot llaqta, Zafón llaqtapiwan. Chay llaqtakunan Hesbón llaqta rey Sehonpa suyunmanta puchusqa. Chay hinapin hallp'ankuqa mast'arikurqan Jordán mayu inti lloqsiy lado mayu patantakama Kineret qochakamaraq.

²⁸Chay llaqtakunantin huch'uy llaqtakunantintaq rakisqa kasqa Gad aylluman mirayninkuman hina.

²⁹Kaqllataqmi Manasés aylluq kuskanninman Moisesqa hallp'ata rakiykusqa mirayninkuman hina.

³⁰Chay hinapin hallp'ankuqa karqan Mahanaim llaqtamanta rey Ogpa llapan Basán suyuntin, Jairpa soqta chunkantin llaqtan,

³¹Galaadpa kuskannintin, Astarot llaqta, Edrei llaqtapiwan. Llapan chay llaqtakunataq hallp'akunantin rakisqa kasqa Manasespa churin Makirpa mirayninkunaman hina.

³²Jericó chimpa Jordán mayu inti lloqsiy lado Moab suyu pata pampakunapi kashaspan, Moisesqa chay hallp'akunata rakisqa.

³³Leví ayllumanñataq ichaqa hallp'ata mana qosqachu, aswanmi nisqa: Israelpa Diosnin Señormi qankunaq qhapaq-kayniykichisqa, nispa.