Read Quechua Cuzco Bible 1988 JOSÚE 14 Bible Online

JOSÚE 14 - Quechua Cuzco Bible 1988 bible

JOSÚE 14

¹Sacerdote Eleazarwan, Josuewan, Israel ayllukunaq umallinkunawanmi Canaán suyuta Israel runakunaman rakirqanku. Kaytaqmi chaymanta willakuy.

²Paykunan chay hallp'akunata isqon ayllu kuskanniyoqman sorteaspa rakirqanku, Señor Diospa Moisesta kamachisqanman hina.

³Ñawpaqtañan Moisesqa Jordán mayu inti lloqsimuy lado hallp'akunata Rubén aylluman, Gad aylluman, Manasés aylluq kuskanninmanwan qosqa (Josepa mirayninmi iskay aylluman tukusqa: Manasés aylluman, Efraín ayllumanwan). Leví ayllumantaq ichaqa hallp'ata mana qosqachu. Paykunataq hallp'ataqa mana chaskisqakuchu, aswanpas llaqtakunallata tiyanankupaq uywa michina campontinta.

⁵Ahinatan Israel runakunaqa hallp'ata rakinakurqanku Señor Diospa Moisesta kamachisqanman hina.

⁶Judá ayllu runakunataq Gilgalta rirqanku Josuewan parlaq, chaypitaq Jefoneq churin Kenaz runa Calebqa Josueta nirqan: —Qanqa yachankin Kades-barneapi Señor Diospa Moisesman ñoqanchismanta nisqanta.

⁷Tawa chunka watayoq kashaqtiymi, Moisesqa Kades-barneamanta hallp'a qhamiyaqta kachawarqan, kutimuspaypas sut'inta ñoqaqa willakurqani.

⁸Ñoqawan wakin riqkunan ichaqa llaqtata llakirichirqanku, ñoqataqmi Apu Señor Diosniypaq tukuy sonqo karqani.

⁹Chaymi Moisesqa juraspa niwarqan: Qanqa tukuy sonqopunin Señor Diospaq karqanki, chayraykun saruykusqayki hallp'aqa qanpaqpuni mirayniykipaqwan kapunqa, nispa.

¹⁰Israel runakuna ch'inneq pampapi kashallaqtinkuraqmi Señor Diosqa chayta Moisesman nirqan, chaymantapachataqmi tawa chunka phisqayoq watantin payqa kunankama kawsachikushallawanpuni. Kunanqa pusaq chunka phisqayoq watayoqñan kashani,

¹¹ichaqa hallp'a qhamiyaqta kachashawarqan chay p'unchay kallpayoq hinallaraqmi kashani. Maqanakuypi tupanaypaqpas ima ruwanaypaqwanpas, allinraqmi kashani.

¹²Chayraykun valekuyki Señor Diospa prometewasqan orqo-orqota qowanaykipaq. Qanmi uyarirqanki Anak runakunaq allichachaq hatun llaqtakunayoq chaypi tiyashasqankuta. Ichapaschá Señor Diosqa yanapawanman, yanapawaqtinqa chay runakunata qarqosaqraqmi, Señor Diospa nisqanman hina, nispa.

¹³Chaymi Josueqa Calebta samincharqan, hinaspan Hebronta qopurqan paypaq mirayninpaqwan hallp'anku kapunanpaq.

¹⁴Hinan Hebrón orqo-orqoqa chay p'unchaymantapacha Calebpa mirayninpaqwan kapurqan, Calebpa Israelpa Diosnin Señorpaq tukuy sonqo kasqanmanta.

¹⁵Hebronpa ñawpaq sutintaq kasqa Kiriat-arba, Arbaqa allin reqsisqa Anak runas kasqa. Chaymantaraqmi suyuntinpi maqanakuymanta samarirqanku.