Read Quechua Cuzco Bible 1988 JOSÚE 16 Bible Online

JOSÚE 16 - Quechua Cuzco Bible 1988 bible

JOSÚE 16

¹Josepa miraynin ayllukunaq sorteopi chaskisqanku hallp'ankuq qorpanmi qallarirqan Jericó pukyu-pukyu inti lloqsiy lado Jordán mayu patamanta, chaymantataq ch'inneqninta pasarqan orqo-orqopi Betelkama,

²Betelmantataq Luzman, chaymantataq Arki runakunaq tiyasqan Atarotkama.

³Chaymantataq inti haykuy kinrayman rispa, Japlet runakunaq hallp'anta pasaspa, Ura Bet-horón qorpakama chayarqan. Gezerninta pasaspataq Mama Qocha pataman chayarqan.

⁴Chaykunan karqan Josepa miraynin ayllukunaq Manasespa Efrainpapiwan chaskisqanku hallp'a.

⁵Efraín aylluq mirayninpa hallp'ankuq inti lloqsiy lado qorpantaq qallarirqan Atarot-adarmanta Wichay Bet-horonkama,

⁶chaymantataq mast'arikurqan Mama Qochakama. Wichay ladopi qorpantaq karqan Mikmetatkamaraq, chaymantataq inti lloqsiy ladoman aysakuspa Taanat-Siloman chayarqan. Chaymantataq Janoanta pasaspa,

⁷Atarotman Naaratmanwan uraykurqan. Chaymantapas Jericoman yaqa chayaspa Jordán mayuman haykupurqan.

⁸Tapuamantataq qorpaqa aysakurqan inti haykuy lado Kaná mayukama, mayu patantakamataq Mama Qochaman chayarqan. Chaykunan karqan Efraín aylluq mirayninkunaman qosqa hallp'akuna.

⁹Kallarqantaqmi Manasés aylluq hallp'an ukhupi huk llaqtakuna aylluntinkama Efraín ayllupaq t'aqasqa.

¹⁰Efraín ayllun ichaqa Gezerpi tiyaq Canaán runakunata mana qarqoyta atirqankuchu, aswanmi hinallata paykuna ukhupi tiyachirqanku mit'animanta llank'achispa. Hinan Canaán runakunaqa chayllapipuni tiyakapurqanku.