Read Quechua Cuzco Bible 1988 JOSÚE 17 Bible Online

JOSÚE 17 - Quechua Cuzco Bible 1988 bible

JOSÚE 17

¹Chaymantataq Josepa kurak churin Manasés aylluman hallp'ata qorqanku. Manasespa kurak churinmi karqan Galaadpa taytan Makir, allin maqanakuq qhari, paymanmi Jordán mayu inti lloqsiy ladopi Galaad hap'iyta Basán suyutawan qosqaku.

²Manasespa wakin mirayninkunataq inti haykuy ladopi hallp'ata chaskirqanku, paykunan karqanku Josepa nieton Abiezerpa, Helekpa, Asrielpa, Shehempa, Heferpa, Semidaqpiwan mirayninkuna.

³Huk runan karqan Zelofehad sutiyoq, taytantaq karqan Hefer, machulankunataq Galaad, Makir, Manasespiwan. Paypaqa manan qhari wawan karqanchu, aswanpas phisqa ususinkunallan: Maala, Noa, Hogla, Milka, Tirsapiwan.

⁴Paykunataq rirqanku sacerdote Eleazarman Josuemanwan llaqta uma runakunamanwan, hinaspan nirqanku: —Señor Diosmi Moisesta kamachisqa ñoqaykumanpas hallp'akunata qowanankupaq aylluykumanwan kuskata, nispa. Chaymi Josuepa ayllunkumanwan kuskata hallp'ata qoykapurqan, Señor Diospa kamachikusqanman hina.

⁵Chhaynapin Manasés aylluqa Jordán mayu inti lloqsiy ladopi Galaad hap'iyta Basantawan chaskirqan, chaymantapas chaskillarqantaqmi chunka t'aqa hallp'akunatawanraq,

⁶Manasespa ususinkuna qharikunawan kuska hallp'ata chaskisqankurayku. Galaad suyutaq Manasespa wakinnin mirayninkunapaq karqan.

⁷Manasés ayllu hallp'ataq karqan Asermanta Shehem inti lloqsiy ladopi Mikmetatkama, chaymantataq qorpanqa uray ladoman aysakurqan Tapuapi pukyukama.

⁸Hinaña Manasés aylluq Tapúa hallp'a karqan chaypas, kikin Manasespa qorpanpi kaq Tapúa llaqtaqa Efraín aylluqmi karqan.

⁹Tapuapi pukyumanta qorpaqa uraykurqan Kaná mayukama. (Mayuq uray ladonpi Manasés hallp'api llaqtakunan Efraín aylluq kapurqan). Chaymantataq qorpaqa rirqan mayuq wichay lado patanta Mama Qochakama.

¹⁰Efraín hallp'ataq mayuq uray ladonpi karqan, Manasés aylluñataq mayumanta wichayman karqan. Mama Qochataq inti haykuy ladomanta qorpa karqan. Manasespa wichay ladon qorpataq Aser aylluwan karqan, inti lloqsiy lado wichaymantataq Isakar aylluwan.

¹¹Hinallataq Manasesman tuparqan Isakarpa, Aserpawan hallp'anpi kay llaqtakuna ayllukunantin: Bet-seán, Ibleam, Mama Qocha patapi Dor, Endor, Taanak, Meguidopiwan.

¹²Manasés ayllun ichaqa chay llaqtakunata mana hap'ikapuyta atirqankuchu, Canaán runakunan mana kuyuriyta munaspanku kikinpi tiyakapurqanku.

¹³Chaymantañan Israel runakunaqa qhepaman kallpachakuspa Canaán runakunata mit'animanta llank'achirqanku, manataq chaymanta qarqorqankuñachu.

¹⁴Josepa miraynintaq Josueta nirqan: —¿Imanaqtintaq sorteaspa huk t'aqa hallp'allata qowankiku? Señor Diosmi saminchawanku, chaymi askhaña kapuyku, nispa.

¹⁵Josuetaq paykunata nirqan: —Askhañataq qankuna kankichis, manañataq Efraín orqo-orqopas taripasunkichisñachu chayqa, sach'a-sach'ata rispa sach'akunata kumpaspa Fares runakunaq Refaim runakunaqpiwan hallp'ankuta llank'akamuychis, nispa.

¹⁶Paykunataq nirqanku: —Chay orqo-orqopas manan aypawankuñachu. Pampapi tiyaq Canaán runakunapas Bet-seanpi ayllunkunantinpi tiyaqkunapas, Jezreel pampapi tiyaqkunapas fierro carretakunayoqmi kanku, nispa.

¹⁷Chaymi Josueqa Efraín aylluta Manasés ayllutawan nirqan: —Qankunaqa askhamá kankichis, kallpasapakunataq, chayraykun mana huk t'aqa hallp'allachu qankunapaq kanqa,

¹⁸aswanpas chay sach'akama orqo-orqopas qankunaqmi, sach'akunata kumpaspa llapanpi tiyakapuychis. Canaán runakunatataq chaymanta qarqopunkichis, hinaña paykuna kallpasapa fierro carretakunayoq kanku chaypas, nispa.