Read Quechua Cuzco Bible 1988 JOSÚE 18 Bible Online

JOSÚE 18 - Quechua Cuzco Bible 1988 bible

JOSÚE 18

¹Llapan suyuña atipasqa kashaqtinmi, lliw Israel ayllukunaqa Silopi huñuykukuspa Dios yupaychana karpata karparqanku.

²Karqanraqmi Israel runakunamanta qanchis ayllu hallp'ankuta mana chaskiqkuna.

³Chaymi Josueqa Israel runakunata nirqan: —¿Hayk'aqkaman suyankichis taytaykichispa Diosnin Señorpa qosqasuykichis hallp'ata hap'inaykichista?

⁴Akllaychis sapanka ayllumanta kinsa qharitakama, paykunatataq kachasaq llapan hallp'ata qhawamunankupaq. Hinan suyuntinta rispa tukuy rikusqankuta qelqamunqaku.

⁵Chay hallp'atan qanchisman t'aqamunqaku, Judá aylluta uray ladoman saqerparispa, Josepa miraynintapas wichay ladoman saqerparispa.

⁶Chay hallp'ata qanchisman t'aqarqarimuspataq qelqasqata apamuwanqaku, ñoqataq Apu Señor Diosninchispa qayllanpi sorteasaq.

⁷Leví ayllumanmi ichaqa maypipas hallp'aqa mana qokunqachu, paykunaq kaqninqa Señor Diospa sacerdoten kayninkun. Gad aylluqa, Rubén aylluqa, Manasespa kuskan ayllunpiwanqa hallp'ayoqñan kanku Jordán mayu inti lloqsiy ladopi, chaytan Señor Diospa kamachin Moisesraq qorqan, nispa.

⁸Hallp'a qhawaq riqkunataq puririnankupaq q'epichakurqanku, hinan Josueqa kamachirqan: —Riychis, llapan suyuta t'aqarqarimuychis. T'aqasqaykichistataq qelqamunkichis. Tukuspataq kayman kutimunkichis Señor Diospa qayllanpi sorteanaypaq, nispa.

⁹Chay runakunataq puririrqanku suyuntinta muyumunankupaq, hinaspan qanchis t'aqaman suyuta t'aqamuspa qelqamurqanku. Chaymantan Josuepa kasqan Silopi karpa-karpaman kutimurqanku.

¹⁰Chaypitaq Josueqa Señor Diospa qayllanpi sorteaspa, hallp'akunata Israel runakunaman rakiykapurqan.

¹¹Sorteaqtinkutaq Benjaminpa mirayninkuna Judá aylluqwan Josepa miraynin ayllukunapiwan chawpinpi hallp'ata chaskirqanku.

¹²Wichay ladon qorpataq qallarirqan Jordán mayumanta, chaymantataq wicharqan Jericó wichay lado qhatanta, chaymantataq qorpaqa orqo-orqonta inti haykuy kinrayman rirqan, chaymantataq Bet-avenpa ch'inneqninman lloqsirqan.

¹³Chaymantataq Betel nisqa Luz llaqtanta uray ladoman rirqan, chaymantataq uraykurqan Ura Bet-horonpa uran orqopi Atarot-adarkama.

¹⁴Chaymantataq qorpaqa kutirirqan uray ladoman Bet-horonpa ñawpaqenpi orqoq wichay lado qhatanta Kiriat-jearim nisqa Kiriat-baalkama (chay llaqtaqa Judá aylluqmi karqan). Chaytaq inti haykuy qorpa karqan.

¹⁵Uray lado qorpataq Kiriat-jearimmanta Neftoa pukyukama rirqan,

¹⁶chaymantataq uraykurqan Ben-hinom wayq'oq ñawpaqenpi orqo chakikama (chay orqoqa Refaim wayq'oq wichay ladonpi karqan). Chaymantataq uraykurqan Jebusman seqamuna uray lado Ben-hinom wayq'onta En-rogelkama aysakamuspa.

¹⁷Chaymantataq kutirirqan wichay ladoman, lloqsirqantaq Ensemesman, chaymantataq aysakurqan Adumín wichana qhataq ñawpaqenpi Gelilotkama, chaymanta uraykurqan Rubenpa churin nisqa Bohán Qaqakama.

¹⁸Chaymantataq Jordán qheshwa wayq'oq ñawpaqen qhataq wichay lado wasanta pasaspa, Bet-hoglaq wichaynin ladonta Jordán mayukama uraykurqan. Kachi Qochaman Jordán mayuq haykunan patapitaq tukukurqan. Chaytaq uray lado qorpa karqan.

²⁰Jordán mayutaq inti lloqsiy ladomanta qorpa karqan. Chaykunan karqan Benjamín aylluq mirayninkunaman qosqa hallp'akunaq qorpankuna.

²¹Benjamín aylluq mirayninkunaman qosqa llaqtakunan kaykuna karqan: Jericó, Bet-hogla, Emek-kasis,

²²Bet-arabá, Zemaraim, Betel,

²³Avim, Pará, Ofra,

²⁴Kefar-haamoni, Ofni, Gabapiwan, llapanpi chunka iskayniyoq llaqtakuna ayllukunantin.

²⁵Chaymantapas Gabaón, Ramá, Beerot,

²⁶Mizpa, Kafira, Mozah,

²⁷Rekim, Irpeel, Tarala,

²⁸Zela, Elef, Jebus (kayqa Jerusalenmi), Gabaa, Kiriat-jearimpiwan, llapanpi chunka tawayoq llaqtakuna ayllukunantin. Chay llaqtakuna rakisqa karqan Benjamín aylluman mirayninkunaman hina.