Read Quechua Cuzco Bible 1988 JOSÚE 2 Bible Online

JOSÚE 2 - Quechua Cuzco Bible 1988 bible

JOSÚE 2

¹Chaymantataq Josueqa Sitim pampamanta iskay qhamiyaqta pakalla kachaspa nirqan: —Riychis, chay suyuta qhawararqamuychis, aswantaqa Jericó llaqtata, nispa. Paykunataq rispanku, Jericopi rabona Rahab warmiq wasillanman haykuykurqanku, chaypin qorpachakurqanku.

²Chaytan chay llaqta reyman willarqamurqanku: —Israel runakunan llaqtanchis qhawaraq hamusqaku, nispa.

³Chaymi reyqa Rahabman kacharqan: —Wasiykiman haykumuq qharikunata horqomuy, paykunaqa llaqtanchis hallp'anchis qhawaraqmi hamunku, nispa ninanpaq.

⁴Warmitaq ichaqa iskaynin qhamiyaq qharikunata wasi pataman wicharqachispa, ch'akinanpaq churasqa lino winay ukhuman pakamusqaña. Chaymi nirqan: —Arí, chay runakunaqa hamusqakun, ichaqa manan yacharqanichu maymantachus kasqankutaqa. Llaqta punku wisq'akunanpaqkaman chayraq tutayarqoshaqtin kaymantaqa lloqsirqapunku, manataqmi yachanichu maymanchus risqankutaqa. Qhepantayá phawaychis, tariparqonkichisraqmi, nispa.

⁷Hinan reypa runankunaqa maskhaq puririrqanku Jordán mayu chimpanakama. Qatipaq lloqsiqtinku hinataq, llaqta punkutaqa wisq'apurqanku.

⁸Rahabtaq wasi pataman seqarqorqan pakasqan runakuna manaraq puñushaqtin,

⁹nirqantaq: —Ñoqaqa yachanin kay hallp'ata Señor Dios qopusqasuykichista, chaymi ñoqaykuqa sinchita manchakushaykiku, llapan kay suyupi tiyaqkunan qankuna hawa pasaqllataña khatatataykushayku.

¹⁰Uyarirqaykun qankuna Egiptomanta lloqsimushaqtiykichis Puka Qochata chimpanaykichispaq Señor Dios ch'akirqachisqanta. Yachallarqaykutaqmi Jordanpa chimpanpi Amor runakunaq iskaynin reyninta, Sehonta Ogtawan, wañuchisqaykichista.

¹¹Chayta uyarirqospayku hinallaraqmi pasaqta mancharikurqayku, llaksakuymantan kallpaykupas chiriyapurqan. Apu Señor Diosniykichisqa hanaq pachapipas kay pachapipas Diosmi.

¹²Chayraykun ñoqa valekuykichis, Señor Diospa sutinpi juraspa niwaychis ñoqata llapa aylluytawan khuyapayawanaykichispaq, imaynan ñoqapas sumaqta khuyapayarqaykichis hinata. Kunanqa imallatapas saqeykuwaychis hunt'aq runa kasqaykichista yachanaypaq.

¹³Chay hinaqa, amapuni wañuchiwankikuchu tayta-mamayta, turaykunata, ñañaykunata, paykunaq wawankunatawan, nispa.

¹⁴Paykunataq nirqanku: —Kay rimasqaykuta mana hunt'aqtiykuqa Señor Dios ñoqaykuta wañuchiwachunku. Qanpas amapuni ima ruwashasqaykutapas pimanpas rimarinkichu, Señor Dios kay hallp'ata qowaqtinkun ñoqaykuqa rimarisqaykuta hunt'aspa khuyapayasqaykiku, nispa.

¹⁵Rahabqa tiyakurqan kikin llaqta perqa sonqopi ruwasqa wasipin, chaymi payqa wasi ventananta waskhawan warkuykuspa kacharparipurqan.

¹⁶Niykurqantaq: —Orqo-orqoman ripuychis ama maskhaqniykichiswan qonqay tupanaykichispaq. Kinsa p'unchaymi pakakunkichis paykuna kutimunankukama, chaymantañan ripunkichis, nispa.

¹⁷Qharikunataq payta nirqanku: —Qanpa jurachiwasqaykikutaqa hunt'asaqkupunin.

¹⁸Llaqtaman haykumushaqtiykun, lloqsipusqayku ventanaman kay yawar puka q'aytuta warkuykunki. Wasiykimantaq huñunki tayta-mamaykita, turaykikunata, ñañaykikunata, llapan taytaykiq ayllunkunatawan.

¹⁹Pillapas wasiykimanta lloqsirqamunqa chayqa, wañuchisqapunin kanqa, ñoqaykuqa manan ima huchayoqpaschu kasaqku. Qanwan kuska kashaqtataqchus imananqakupas chaymi ichaqa, ñoqaykuq huchayku kanqa.

²⁰Imallatapas hamusqaykumanta rimayta ch'eqechinki chayqa, qanpa jurachiwasqaykikutaqa manañan hunt'anaykuñachu kanqa, nispa.

²¹Rahabtaq nirqan: —Arí, qankunaq nisqaykichis hinapuni kachun, nispa. Kacharparipuqtintaq qharikunaqa ripurqanku. Chaymantataq ventanaman yawar puka q'aytuta warkullarqanña.

²²Iskaynin qhamiyaqkunataq orqo-orqoman rirqanku, chaypin kinsa p'unchay pakakamurqanku. Maskhaqkunataq hinantinta maskhaykurqanku, mana tarispankutaq Jericoman kaqta kutiykapurqanku.

²³Hinan iskayninku orqo-orqomanta uraykamurqanku, Jordán mayuta chimpaspankutaq Josuepa kasqanman chayapurqanku. Paymantaq lliwta willaspa

²⁴nirqanku: —Cheqaqtapunin Señor Diosqa qowasqanchis llapan chay suyuta, ñoqanchis hawan kikinpi tiyaqkunaqa khuyaytaña manchakushanku, nispa.