Read Quechua Cuzco Bible 1988 JOSÚE 20 Bible Online

JOSÚE 20 - Quechua Cuzco Bible 1988 bible

JOSÚE 20

¹Señor Diostaq Josueta nirqan:

²—Israel runakunata niy: Pakakunapaq llaqtakunata akllaychis Moisesta kamachisqayman hina.

³Pillapas mana yuyaypichu runamasinta qonqaylla wañurqachinman chayqa, chay llaqtakunamanta hukninmanmi ayqekunman, wañuqpa ayllunkunaq vengakunanmanta pakakamunanpaq.

⁴Pipas pakakunanpaq chay llaqtakunaman ayqekuqqa, chay llaqta punkuman chayaspanmi, lliwta chay llaqtapi kurak taytakunaman willakunqa. Hinan paykuna hinallata haykuchinqaku, huk wasita qospataq chaypi payta tiyachinqaku.

⁵Wañuqpa aylluntaqchus vengakunanpaq maskhamunqa chayqa, llaqta kurak taytakunan pakakuq runataqa mana hap'iykuchinqachu, payqa mana yuyaykuspapunichu manallataq cheqnikuspapaschu wañuchisqanrayku.

⁶Chay pakakuq runataq ichaqa chay llaqtapi llapan llaqta kurak taytakunaq ñawpaqenpi chaninchasqa kanankama pakakunan, hinallataq chaypacha kashaq uma sacerdoteq wañukapunankama. Chaykuna qhepataqa chay pakakuq runaqa wasinman kutipuyta atinmi, maymantachus ayqekamusqan llaqtamanwan, nispayki, nispa.

⁷Hinan Israel runakunaqa kay llaqtakunata pakakunapaq akllarqanku: Galileapi Neftalí orqo-orqopi Kedes llaqtata, Efraín orqo-orqopi Shehem llaqtata, Judá orqo-orqopi Hebrón sutiyoq Kiriat-arba llaqtatawan.

⁸Jordán mayu inti lloqsiy ladopitaq akllarqanku Jericó inti lloqsiy lado ch'inneq pata pampapi Rubén ayllupi Beser llaqtata, Gad ayllumantataq Galaad suyupi Ramot llaqtata, Manasés ayllumantataq Basanpi Golán llaqtatawan.

⁹Chay hinaqa Israel runakunapaq paykunawan tiyaq wak llaqtayoqkunapaqwan pakakunanpaqmi chay llaqtakunaqa karqan. Mana yuyaypichu runamasinta wañuchiqqa chaykunapi pakakuyta atiqmi, chay hinapi wañuqpa ayllun vengakunanpaq maskhaqpas mana wañuchiyta atiqchu, manaraq llaqta kurak taytakunaq chaninchasqan kashaqtin.