Read Quechua Cuzco Bible 1988 JOSÚE 23 Bible Online

JOSÚE 23 - Quechua Cuzco Bible 1988 bible

JOSÚE 23

¹Askha watañan pasasharqan, qhepa watakunapin Señor Diosqa Israel runakunata awqankumantapas samachirqan. Hinan Josueqa sinchi machuña kaspan,

²llapan Israel runakunata, kurak taytakunantinta, uma runakunantinta, juezkunantinta, oficialkunantinta waqyachispa nirqan: —Ñoqaqa sinchitañan machuyaykapushani.

³Qankunaqa lliwtan rikurqankichis Apu Señor Diosninchispa ñoqanchista amachaspa chay llaqtakunata imaymana ruwasqanta, paymi ñoqanchisrayku maqanakurqan.

⁴Ñoqan aylluykichisman lliw hallp'akunata rakirqani inti lloqsiy ladopi Jordán mayumanta inti haykuy ladopi Mama Qochakama. Ñoqan rakirqani llapan hap'isqa kaq hallp'akunata manaraq hap'isqa kaq hallp'akunatapas.

⁵Señor Diosmi wikch'unqa chay hallp'api tiyashaqkunata, qankunataqmi hallp'ankuta hap'ikapunkichis, Apu Señor Diosninchispa niwasqanchisman hina.

⁶Allintapuni sayaychis Moisespa qelqanpa kamachikusqanta llapantapuni hunt'anaykichispaq.

⁷Aman qankuna ukhupi tiyaq wak runakunawanpas mich'ukunkichischu, aman diosninkutapas yupaychankichischu, aman kasullankichispaschu, amapunin sutinkutapas rimankichischu, amallataq sutinkupipas jurankichischu.

⁸Apu Señor Diosllanchismanpunin k'askakunkichis, imaynan kaykama ruwashankichis hinallatapuni.

⁹Señor Diosmi riki haykusqaykichisman hinaqa llapan kallpasapa hatuchaq llaqtakunata wikch'urqan, manataq kunankama pillapas qankunawan churanakuyta atirqanchu.

¹⁰Qankunaqa huk runallaraqmi waranqa runata qatirirqankichis, Apu Señor Diosninchispa rimarisqanman hina ñoqanchismanta maqanakusqanrayku.

¹¹Kunanqa Apu Señor Diosninchistapunin munakunkichis.

¹²Qankunataqchus Señor Diosmanta t'aqarikuspa qankuna ukhupi tiyaqkunawan mich'ukuspa casarakapunkichis chayqa,

¹³allinta yachakuychis, Apu Señor Diosninchisqa qankuna ukhumanta chay runakunata manan wikch'unqachu, aswanmi chay runakunata Diosqa tukuchinqa huk toqllata otaq k'allpata chaypi urmanaykichispaq. Chay runakunan qankunata nanachisunkichis hasut'i hina, otaq ñawiykichispi khiska hina, Señor Diospa qosqasuykichis chay sumaq hallp'api llapaykichis tukukunaykichiskama.

¹⁴Ñoqaqa wañukapusaqñan, ichaqa ñawpaqtaraqmi munani qankunaq tukuy ukhu sonqoykichiswan Señor Diospa sumaq nisqasuykichis llapan hunt'asqanta reqsikunaykichista, payqa llapantapunin rimarisqantaqa hunt'arqan.

¹⁵Chhaynaqa imaynan Señor Diospa sumaq nisqankuna lliw hunt'akun, chay hinallataqmi paywan rimanakusqaykichista mana hunt'aqtiykichisqa qankunaman chayamullanqataq imaymana rikch'aq llakikuykuna, kay sumaq qosqasuykichis hallp'api llapaykichis wañunaykichiskama. Wak dioskunatachus yupaychankichis chayqa, Señor Diosmi qankunapaq phiñakapunqa, kay sumaq qosqasuykichis hallp'amantapas llapaykichistan picharparisunkichis, nispa, nirqan.