Read Quechua Cuzco Bible 1988 JOSÚE 24 Bible Online

JOSÚE 24 - Quechua Cuzco Bible 1988 bible

JOSÚE 24

¹Josuemi llapan Israel ayllukunata Shehempi huñuykurqan, hinaspan kurak taytakunata, uma runakunata, juezkunata, oficialkunatawan waqyarqan, hinan Diospa ñawpaqenman chimparqanku.

²Chaymantataq Josueqa llapan llaqtantinta nirqan: —Israelpa Diosnin Señormi nin: Ñawpa p'unchaymi machulaykichis Tarepa churin Abrahamqa Nakorpiwan wak dioskunata yupaychaspanku, Eufrates mayu patapi tiyarqanku.

³Chay Eufrates mayu patapi tiyashaqtinkun Abrahamta pusakapurqani, hinaspan Canaán suyuntinta purichirqani. Payman askha wawata qorqani, ñawpaqtaqa Isaacllataraq.

⁴Isaacmantaq iskay wawata qorqani, Jacobta Esautawan. Esaumanmi Seir orqo-orqota qorqani, Jacobtaq wawankunantin Egipto suyuta ripurqan.

⁵Hinan Moisesta Aarontawan chayman kacharqani, chaypitaqmi Egipto runakunata wañurachirqani qankunata horqomunaykama.

⁶Machulaykichista Egiptomanta horqomuqtiymi, Egipto runakunaqa qhepankuta qatipamurqanku carretakunantin caballokunantin Puka Qochakama.

⁷Chaypitaqmi Israel runakuna waqyakamuwarqanku, chaymi ñoqaqa Egipto runakunaq ñawpaqenman paykunaq qhepankuman laqha tutayaqta kachaykamurqani, hinaspan Puka Qochawan Egipto runakunata millp'uchirqani Qankuna kikiykichismi chay ruwasqaykunata yacharqankichis. Chaymantataq ch'inneqpi unaytapuni tiyarqankichis.

⁸Ch'inneqmantataq Amor runakunaq hallp'anman pusamurqaykichis, Jordán mayu inti lloqsiy ladoman. Paykunan sayarimurqanku qankunawan maqanakunanpaq, ñoqañataq ichaqa qankunaq makiykichisman hap'iykuchirqaykichis, qankunataq atipaspa hallp'ankutapas kaqnichakapurqankichis.

⁹Chaymantapas Moab suyu rey Ziporpa churin Balak sayarimullarqantaq qankunawan maqanakuq. Balakqa Beorpa churin Balaamta maskhaqta kachamurqan qankunata ñakachinanpaq.

¹⁰Ñoqataq ichaqa Balaamwan mana ñakachirqaykichischu, aswanmi payqa samincharqasunkichis. Ahinapin qankunata qespichirqaykichis.

¹¹Chaymantan qankunaqa Jordán mayuta chimpaspa Jericokama chayarqankichis. Chay llaqtapi tiyaqkunan, Amor runakuna, Fares runakuna, Canaán runakuna, Het runakuna, Girgas runakuna, Hiv runakuna, Jebus runakunapiwan qankunawan maqanakurqanku, ñoqataq ichaqa qankunawan atipachirqaykichis.

¹²Amor runakunaq iskaynin reynintaqa manan espadaykichiswanpaschu p'eqtaykichiswanpaschu atiparqankichis, aswanmi ñoqaqa haykusqaykichisman hina paykunata q'aqcharqani. Chaymi paykunaqa ayqekapurqanku, manaraq qankuna chayamushaqtiykichis.

¹³Ñoqataq qoykurqaykichis mana llank'asqaykichis chakrakunata, mana perqakusqaykichis llaqtakunatawan. Kunantaq chaypi tiyakushankichis, mikhushankichis mana qankunaq tarpusqaykichis uvastapas aceitunastapas, nispa.

¹⁴Kunanqa Señor Diosta yupaychaychis, cheqaq hunt'aq sonqowan payta servispa. Machulanchiskunaqa Eufrates mayu patapipas Egipto suyupipas wak dioskunatan yupaycharqanku, chay dioskunamanta t'aqakuychis, Señor Diosllataña yupaychaychis.

¹⁵Manataqchus Señor Diospa kamachin ruwayta munankichis chayqa, kunanpacha akllakuychis pin servinaykichista. ¿Icha Eufrates mayu patapi machulanchispa servisqan dioskunatachu serviwaqchis, icha kay hallp'api tiyaq Amor runakunaq diosnintataqchu? Ñoqan ichaqa familiantin Señor Diosllatapuni servisaqku, nispa.

¹⁶Chaymi llaqtantin runapas nirqan: —¡Ñoqaykuqa manan hayk'aqpas Señor Dios serviytaqa saqeykumanchu wak dioskunata servinaykupaqqa!

¹⁷Egiptopi kamachi kashaqtinchis, Señor Diospunin machulanchistapas ñoqanchistapas horqomuwaqninchisqa. Paypunin imaymana musphanakunata qhawashaqtinchis ruwaqqa. Askha llaqtakunaq chawpin ñanninta purimushaqtinchis, paypunin waqaychaykuwarqanchis.

¹⁸Paymi lliw llaqtakunata ñawpaqenchismanta wikch'urqan, kaypi tiyaq Amor runakunatapas. Lliw chaykuna ruwapuwasqanchismantaqa Señor Diostapunin servisaqku, paypunitaqmi Diosninchisqa kanpas, nispa.

¹⁹Josuetaq ichaqa nirqan: —Qankunaqa manan Señor Dios serviyta atiwaqchischu, payqa ch'uya Diosmi, payqa imapas mana hinalla qhawaq Diosmi, payqa huchaykichista mana kasukusqaykichistawan manan pampachanqachu.

²⁰Qankunataqchus wak dioskunata yupaychaspa payta saqerparipunkichis chayqa, Señor Diosmi contraykichispi sayarispa ñak'arichisunkichis. Hinaña askha allinkunata ruwapurqasunkichis chaypas, pasaqtan tukupusunkichis, nispa.

²¹Llaqta runataq kutichirqan: —Manan chayqa kanqachu, ñoqaykuqa Señor Diosllatapunin servikusaqku, nispa.

²²Hinan Josueqa nirqan: —Qankuna kikiykichismi Señor Diosllatapuni servinaykichispaq akllakusqaykichismanta uyariqqa kankichis, nispa. Paykunataq nirqanku: —Arí, ñoqaykupunin uyariqqa kayku, nispa.

²³Josuetaq nirqan: —Chhaynaqa, qankuna ukhupi kaq dioskunata wikch'uychis, hinaspataq tukuy sonqoykichiswan Israelpa Diosnin Señorman kutirikapuychis, nispa.

²⁴Llaqta runataq kutichirqanku: —Ñoqaykuqa Señor Diosllatapunin servisaqku, ima niwasqankutapas ruwasaqkun, nispa.

²⁵Chay p'unchaypachan Josueqa llaqta runawan Shehempi rimanakurqan, chaypitaq paykunapaq kamachikuy simikunata churarqan.

²⁶Chaykunatataqmi Diospa kamachikuy qelqanman qelqarqan. Chaymantataq hatun rumita hoqarispa Señor Dios yupaychana cheqaspi kaq encina sach'a chakipi churaykurqan.

²⁷Hinaspan llaqta runakunata niykurqan: —Kay rumin contranchispi rimariq kanqa, paymi Señor Diospa lliw niwasqanchista uyariqqa. Ahinaqa contraykichispi rimariqmi kanqa, Diosta ama wasanchanaykichispaq, nispa.

²⁸Chaymantataq Josueqa sapankata llaqtanku-llaqtankuman kachapurqan.

²⁹Chaykuna qhepatataq Señor Diospa kamachin Josueqa wañukapurqan, pachak chunkayoq watayoq kashaspa.

³⁰Gaas orqoq wichaynin Efraín orqo-orqopi Timnat-sera hallp'anpin p'ampapurqanku.

³¹Israel runakunataq Josuepa kawsanankama Señor Diosta servirqanku, chaymantapas kaqllataq Señor Diospa Israel runakunapaq imaymana ruwasqanta rikuq kurak taytakunaq kawsanankama.

³²Egiptomanta Israel runakunaq apamusqanku Josepa tullunkunata Shehempi p'ampapurqanku, Jacobpa pachak qolqewan Shehempa taytan Hamorpa churinkunamanta rantisqan hallp'api. Chay hallp'ataq Josepa mirayninpa karqan.

³³Aaronpa churin Eleazar wañukapuqtintaq, Efraín orqo-orqopi churin Fineesman qosqa moqopi p'ampapurqanku.