Read Quechua Cuzco Bible 1988 JOSÚE 3 Bible Online

JOSÚE 3 - Quechua Cuzco Bible 1988 bible

JOSÚE 3

¹Qhepantin p'unchaymi tutallamanta Josueqa llapa Israel runakunantin Sitim pampamanta puririmuspa Jordán mayu pataman chayarqanku, manaraq chimpashaspankutaq chayllapiraq qaynakurqanku.

²Kinsa p'unchaymantataq uma runakunaqa karpan-karpanta purimuspanku,

³Israel runakunata kamachirqanku: Apu Señor Diosniykichispa rimanakuy cajanta Leví runa sacerdotekunaq apashasqanta rikurqospaykichismi, puririmunkichis maypichus kasqaykichismanta, hinaspan qhepanta rinkichis.

⁴Qankunaqa manan chay ñanta rikunkichisraqchu, chayraykun paykuna mayninta rinaykichistapas pusasunkichis. Rimanakuy cajamanmi ichaqa ama qayllankichischu, yaqa huk kilómetro hina qhepallanta rinkichis, nispa.

⁵Chaymantataq Josueqa Israel runakunata nirqan: —Señor Diosmi paqarin qankunaq rikushasqaykichis imaymana musphanata ruwanqa, chayrayku ch'uyanchakuychis, nispa.

⁶Hinallataq sacerdotekunata kamachirqan: —Rimanakuy cajata apaychis, hinaspa llaqtaq ñawpaqenta riychis, nispa. Paykunataq cajata wanturikuspa runakunaq ñawpaqenta rirqanku.

⁷Chaymantataq Señor Diosqa Josueta nirqan: —Kunanmantapacha Israel runakunawan mentachisqayki, chay hinapin paykuna yachanqaku qanwan kashasqayta imaynan Moiseswanpas karqani hinata.

⁸Hinallataq rimanakuy caja wantuq sacerdotekunata kamachinki Jordán mayu unu pataman chayaspanku, mayu ukhupi sayaykunankuta, nispa.

⁹Chaymantataq Josueqa Israel runakunata nirqan: —Qayllaykamuychis, Apu Señor Diosniykichispa nisqantan willasqaykichis.

¹⁰Kunanmi yachankichis Kawsaq Diospa qankuna chawpipi kashasqanta, yachallankichistaq suyuman haykusqaykichisman hina Canaán runakunata, Het runakunata, Hiv runakunata, Fares runakunata, Gerges runakunata, Amor runakunata, Jebus runakunata Diospa wikch'unanta.

¹¹Teqsimuyuntin Kamachiq Señor Diospa rimanakuy cajanmi qankunaq ñawpaqeykichista Jordán mayuta chimpanqa.

¹²Kunanqa chunka iskayniyoq qharikunata akllaychis huktakama sapanka Israel ayllumanta.

¹³Teqsimuyuntin Kamachiq Señor Diospa rimanakuy cajan wantuq sacerdotekuna Jordán mayu unuman saruykuqtinku hinan, mayuqa iskayman t'aqarikunqa. Wichaymanta phawamuq unun kasqanpi qochachakunqa, urayman phawaqñataqmi ch'akipunqa, nispa.

¹⁴Mayu chimpay yuyaykusqanku p'unchaykunaqa cosecha tiempon karqan, sapa watallapunitaq chay tiempopi Jordán mayuqa patantinta llimp'asparaq suchuykamuq. Israel runakunataq karpankumanta puririrqanku Jordán mayuta chimpanankupaq, rimanakuy cajata wantuq sacerdotekunataq paykunaq ñawpaqenta rirqanku. Mayuman sacerdotekuna saruykuqtinkutaq,

¹⁶wichaymanta phawamuq unuqa kasqanpi sayarparispa, paykunaq chimpanan cheqasmanta karupiraq qochachaykukurqan Saretán qaylla Adam llaqtakama. Arabá qheshwa wayq'onta Kachi Qochaman haykuq unutaq ch'akirqapurqan. Hinan chayninta Israel runakunaqa Jericó cheqasman chimparqanku.

¹⁷Paykunaqa allin ch'aki hallp'ata hinan Jordán mayuta chimparqanku, Señor Diospa rimanakuy cajanta wantuq sacerdotekunataq chaykama Jordán mayu ukhupi allin ch'aki hallp'api hina sayasharqanku.