Read Quechua Cuzco Bible 1988 JOSÚE 6 Bible Online

JOSÚE 6 - Quechua Cuzco Bible 1988 bible

JOSÚE 6

¹Jericó llaqtataqa allin-allintan wisq'akamurqanku Israel runakunaq mana haykunanpaq, manan pillapas lloqsimurqanchu haykurqanpaschu.

²Señor Diosmi Josueta nirqan: —Jericó llaqtatan, reynintinta, soldadokunantinta hap'iykachiyki.

³Qanqa Israel soldadokunantinmi huk kutitakama soqta p'unchaynintin llaqtata muyurinkichis.

⁴Qanchis sacerdoten rimanakuy cajaq ñawpaqenta rinqa sapankanku waqra pututu apaykusqa. Qanchiskaq p'unchaymi ichaqa qanchis kutita llaqtata muyurinkichis, sacerdotekunataq ñawpaqeykichista rinqa waqra pututunkuta tocakuspa.

⁵Aysarisqa tocasqankuta uyarispaykichistaq ichaqa, qankunapas kallpawan qaparinkichis, hinan llaqta muyuriq perqaqa paymantakama thunikamunqa. Qankunataq llapallaykichis llaqtaman cheqallantaña phawaykunkichis, nispa.

⁶Chaymi Josueqa sacerdotekunata waqyarqan: —Señor Diospa rimanakuy cajanta apaychis, ñawpaqentataq qanchisniykichis pututuntinkama riychis, nispa.

⁷Israel runakunatataq nirqan: —Llaqtata muyurimuychis, maqanayoq qharikunataq Señor Diospa cajanpa ñawpaqenta riychis, nispa.

⁸Hinan paykunaqa Josuepa nisqanta hina ruwarqanku. Qanchis sacerdotekuna Señor Diospa cajanpa ñawpaqenta rirqan waqra pututunkuta tocakuspanku, paykunaq qhepantataq Señor Diospa cajanta wanturqanku.

⁹Maqanayoq qharikunataq sacerdotekunaq ñawpaqenta rirqan, wakin qharikunataq Señor Diospa cajanpa qhepanta rirqanku. Sacerdotekunataq waqra pututunkuta mana thanispa tocarqanku.

¹⁰Josuetaq runakunata kamachirqan: —Ama imata rimarispallan llaqtata muyurimunkichis, maypachachus ñoqa: Qapariychis, niqtiyraqmi kallpawanpuni qaparinkichis, nispa.

¹¹Hinaspan Josueqa Señor Diospa cajanta huk kutillata llaqtata muyurichimurqan, chaymantataq karpankuq kasqanman kutimpurqanku chaypi puñunankupaq.

¹²Qhepantin p'unchaypas tutallamantan Josueqa hatarirqan. Sacerdotekunupas Señor Diospa cajan apaykusqan puririrqanku.

¹³Qanchis sacerdotekunataq cajaq ñawpaqenta rirqanku, mana thaniyta tocaspa. Maqanayoq qharikunataq sacerdotekunaq ñawpaqenta rirqanku, wakin qharikunataq cajaq qhepanta rirqanku.

¹⁴Iskaykaq p'unchaypas wakmanta llaqtata muyurimurqanku, chaymantataq karpankuq kasqanman kutimpullarqankutaq. Soqta p'unchaynintinmi chay hinatakama ruwarqanku.

¹⁵Qanchiskaq p'unchaymi illarimuyllataraq sayarispa, llaqtata muyurimurqanku imaynan ñawpaq p'unchaykunapas ruwarqanku hinata, chay p'unchaymi ichaqa qanchis kutita muyurirqanku.

¹⁶Qanchis kutitaña sacerdotekuna pututunkuta tocaqtinmi, Josueqa runakunata kamachirqan: —¡Qapariychis! Señor Diosmi llaqtata hap'iykuchiwanchis.

¹⁷Llaqtaqa lliw kaqninkunapiwanmi Señor Diospa sutinpi llapan thunisqa kanqa. Rabona Rahabwan wasinpi llapan pakakuqkunallapiwanmi mana wañuchisqachu kanqa kachasqanchis qhamiyaqkunata pakaykusqanrayku.

¹⁸Qankunataqmi ichaqa chay llaqtapi kaqkunata amapuni hoqarinkichischu llamiykullankichispaschu, Señor Diospa sutinpi llapantapuni thuninkichis. Manataqchus kasukunkichis chayqa, qankunapas karpaykichispas ñakasqan kankichis, hatun llakipitaqmi rikukunkichispas.

¹⁹Llapan qoriwan, qolqewan, broncemanta tukuy imakunawanpas, fierromanta kaqkunawanpas Señor Diospaq sutichasqa kanqa, qhapaq-kay waqaychananmantaqmi churanqaku, nispa.

²⁰Sacerdotekunan pututunkuta tocarqanku, Israel runakunataq chayta uyarispa hina qaparirqanku, chaymi llaqta muyuriq perqaqa thunikamurqan. Llapallankutaq llaqta ukhuman cheqanta phawaykuspa hunt'aykurqanku.

²¹Hinaspan llapan qharikunata, warmikunata, waynakunata, machukunatapas espadawan wañuchirqanku, hinallataq wakakunata, ovejakunata, asnokunatapas wañuchirqanku. Llapallantan Señor Diospa sutinpi wañuchirqanku.

²²Josuetaq iskaynin qhamiyaq riq qharikunata nirqan: —Phawaychis chay rabona warmiq wasinta, hinaspa pusarqamuychis wasinpi llapan kaqkunatawan, imaynan simi kacharisqaykichisman hina, nispa.

²³Chaymi paykunaqa haykurqospa Rahabta, tayta-mamanta, turankunata, ñañankunata, wakin aylluntawan pusarqamurqanku, hinaspataq Israel runakunaq karpan qayllaman pusarqanku.

²⁴Chaymantataq Jericó llaqtata lliw chaypi kaqkunatawan ninawan kanaykurqanku. Qorita, qolqeta, broncemanta kaqkunata, fierromanta kaqkunallatawanmi horqomuspa, Señor Diospa qhapaq-kay waqaychananman churarqanku.

²⁵Josueqa Rahabta aylluntawanmi mana wañuchirqanchu, Jericó qhamiyaq kachasqankunata pakaykusqanmanta. Chay p'unchaymantan Rahabqa miraynintin Israel runakunawan tiyapurqan.

²⁶Chaymantataq Josueqa runakunata jurachirqan: —Jericó thunisqata wakmanta sayarichiqqa Señor Diospa ñakasqan kachun. Teqsita sayarichiqtinmi kurak churin wañunqa, punkukunata churaqtinmi sullk'a churin wañunqa, nispa.

²⁷Chay hinatan Señor Diosqa Josueta yanaparqan. Josuemi hinantin llaqtapi mentasqa kapurqan.