Read Quechua Cuzco Bible 1988 JOSÚE 7 Bible Online

JOSÚE 7 - Quechua Cuzco Bible 1988 bible

JOSÚE 7

¹Judá ayllumantan huk qhari karqan Ahán sutiyoq, taytanmi karqan Karmi, machulantaq Zabdi, tunu machulantaq Zara. Paymi Señor Diospa sutinpi thuninapaq kaqmanta imaymanata hoqarikurqan. Chayraykun llapa Israel runakunaqa huchachasqa rikukurqanku, Señor Diostaq nina hinaraq paykunapaq phiñakurqan.

²Josuemi Jericomanta Hai llaqtaman runakunata kachaspa nirqan: —Wichaychis, hinaspa chay hap'iyta qhawaramuychis, nispa. Paykunataq rispanku Hai llaqtata qhawaramurqanku. Chay llaqtaqa Betelpa inti haykuy ladon Bet-avén llaqta qayllapin karqan.

³Chaymanta kutimuspataq Josueta nirqanku: —Ama yanqaqa llapaykuta kachawaykuchu, iskay waranqa otaq kinsa waranqapas Hai llaqtata hap'iqqa richunku. Ama llaqtantin runataqa kachawaykuchu, pisillan chay llaqtamanta hark'apakamuqqa kasqaku, nispa.

⁴Hinan Hai llaqtaman kinsa waranqa hina qharikunalla seqaykurqanku. Hai runakunataq ichaqa paykunata atiparqospa qatirimurqan.

⁵Llaqta punkumantapacha rumi horqonakama qatishaspan, ura qhatapi kinsa chunka soqtayoq Israel runakunata wañurachirqanku. Chayraykun Israel runakunaq kallpanqa pasaqta laqhoyarqan.

⁶Chaymi Josueqa Israel kurak taytakunantin llakikuymanta p'achankuta llik'ikurqanku, umankumanpas ñut'u hallp'awan hach'ikurqanku. Hinaspataq Señor Diospa cajan qayllapi pampakama k'umuykukuspa, chaypi qhepakurqanku ch'isiyanankama.

⁷Josuetaq nirqan: —¡Ay! Qollana Señor Diosníy, ¿imapaqraqmi Jordán mayutaqa kay llaqtaykita chimpachimuwarqankiku? ¿Amor runakunaq hap'isqan kanaykupaqchu hamurqayku? ¿Paykunaq thunisqan rikukunaykupaqchu hamurqayku? ¡Aswanchá Jordán mayuq chimpallanpiraq kamushaykuman karqan!

⁸¡Ay! Señor Diosníy, ¿kunanri ima nispataq rimarisaq awqanmanta Israel runakuna ayqerikapun chayri?

⁹Canaán suyupi tiyaq runakunaqa ayqerikapusqaykuta lliwchá yacharqonqaku, hinaspachá llapanku huñunarqokuspa ch'usaqta tukurqapuwanqaku. Qanri, chay hina kaqtin, ¿imanankitaq hatun sutiykimanta? nispa.

¹⁰Señor Diostaq nirqan: —¡Sayariy! ¿Imatan k'umurayashanki?

¹¹Israel runakunan huchallikunku, paykunawan rimanakusqayta p'akispanku. Thuninapaq kaqmantan hoqarimunku, llullakunkuraqtaq, suwakusqankutapas kaqninku ukhumanmi pakarqonku.

¹²Chayraykun Israel runakunaqa awqankuwan churanakuyta mana atipunkuchu, aswanpas ayqerikapunku. Qankunapas thuninallapaqtaqmi kapushankichis, manachus thuninapaq kaqta kunan thuninkichis chayqa, manan ñoqaqa hayk'aqpas qankunawan kasaqchu.

¹³Sayariyyá, runakunata ch'uyanchamuy. Paykunata nimuy: —Israelpa Señor Diosninmi nin: Israel runakuna, qankunan pasaq thuninapaq kaqkunata hoqarimurqankichis. Chaytachus qankunamanta mana llapantachu thuninkichis chayqa, manapunin awqaykichiswan churanakuytaqa atinkichischu, nispa. Chayrayku paqarinpaq ch'uyanchakamuychis, nispayki.

¹⁴Paqarinmi llapalla ayllu-ayllu hamunkichis, akllasqay ayllutaqmi chimpamuwanqa mirayninkuman hina t'aqa-t'aqa, akllasqay t'aqataqmi chimpamuwanqa familia-familia, akllasqay familiataqmi chimpamuwanqa ch'ulla-ch'ullamanta qharikuna.

¹⁵Chay qharikunamanta mayqentachus huchachasaq chaymi kanasqa kapunqa llapan kaqninkunantin, ñoqawan rimanakusqata mana hunt'aspa Israelpi millay p'enqayta ruwasqanmanta, nispa.

¹⁶Qhepantin paqartaq tutallamanta sayarispa, Josueqa runakunata huñuchimurqan ayllu-ayllu t'aqasqata, chaymantataqmi Señor Diosqa Judá aylluta akllarqan.

¹⁷Hinan Josueqa Judá ayllu runakunata kamachirqan mirayninkuman hina t'aqa-t'aqata reqsichinanpaq, chaymantataqmi Zara nisqa t'aqa akllasqa karqan, chay t'aqamantataq Zabdi nisqa familia akllasqa karqan.

¹⁸Zabdiq wawankunañataq ch'ulla-ch'ullamanta chimparqanku, chaypitaq Karmiq churin Ahán hap'isqa karqan. Machulanqa karqan Zabdi, tunu machulanñataq Judá ayllumanta Zara.

¹⁹Hinaqtinmi Josueqa Ahanta nirqan: —Wawalláy, Israelpa Diosnin Señorta hatunchay, ama pakaykuwaspa sut'illanta ima ruwasqaykitapas willaykuway, nispa.

²⁰Chaymi Ahanqa willakurqan: —Arí, cheqaqtapunin Israelpa Diosnin Señor contra huchallikurqani.

²¹Jericó llaqtamanta hoqarimusqaykupin rikurqani Babiloniamanta huk sumaq llaqollata, iskay kilo kurak qolqeta, kuskan kilo kurak wask'a qoritawan. Chaykunan sonqoyta suwarqowarqan, chaymi aparikamurqani, chaykunatan karpay ukhuman p'ampaykurqani, qolqetaqmi chaykunaq pachanpiraq kashan, nispa.

²²Josuetaq Ahanpa karpanman runakunata kacharqorqan, chaykunataq tarirqamurqanku llapan pakasqa kaqkunata, qolqetataq aswan ukhunpi.

²³Hoqarispataq Josueman Israel runakunamanwan aparqanku, chaytataq Señor Diospa ñawpaqenman churaykurqanku.

²⁴Ahantataq Llakikuy Wayq'oman pusarqanku, llapan wawankunantinta, hinallataq wakankunantinta, asnonkunantinta, ovejankunantinta, karpantapas, lliw kaqninkunatapas, kaqllataq chay qolqeta, llaqollata, wask'a qoritapas apallarqankutaq.

²⁵Hinan Josueqa nirqan: —¿Imanaqtinmi kay hatun llakiman churaykuwankiku? Kunanmi Señor Diosqa hatun llakiwan muchuchisunki, nispa. Chayta niykuqtinmi llapan Israel runakunaqa rumiwan ch'aqespa Ahanta sipipurqanku tukuy imaymanankunatawan, chaymantataq kanaykurqanku.

²⁶Chay patamantaq askha rumiwan tawqaykurqanku, chaymantapachan chay rumi tawqasqa hinalla kapurqan. chayraykutaqmi chay cheqasta suticharqanku Llakikuy Wayq'o nispa. Chayraqmi Señor Diosqa Israel contra manaña phiñakurqanchu.