Read Quechua Cuzco Bible 1988 JOSÚE 9 Bible Online

JOSÚE 9 - Quechua Cuzco Bible 1988 bible

JOSÚE 9

¹Het runakunaq, Amor runakunaq, Canaán runakunaq, Hiv runakunaq, Jebus runakunaq reyninkunataq imachus pasasqanta uyarirqanku. Chay reykunan Jordán mayu inti haykuy lado orqo-orqopi, Shefela nisqa moqo-moqopi, Mama Qocha patapi Líbano orqokuna cheqaskama tiyarqanku.

²Hinaspan paykunaqa huk nisqalla huñukurqanku Josuewan Israel runakunapiwan maqanakunankupaq.

³Gabaonpi tiyaq Hiv runakunataq yacharqanku Josuepa Jericó llaqtata Hai llaqtatawan imayna ruwasqanta,

⁴chaymi sumaqllata q'oturqoyta yuyaykurqanku. Qoqawankutan asnokunaman t'iri-t'iri costalkunapi cargaykurqanku, kaqllataq vinotapas thanta qara p'uyñukunapi cargaykurqanku, hinaspan puririmurqanku.

⁵Hinallataq thanta p'achakunawan churakurqanku, mawk'a usut'akunawan usut'akurqanku. Ch'aki qhoqasqa t'antan qoqawankupas karqan.

⁶Gilgalpi karpa-karpaman chayaspataq Josueta Israel runakunatawan nirqanku: —Karu llaqtamantan hamushayku sumaqpi qankunawan rimanakuq, nispa.

⁷Israel runakunataq chay Hiv runakunata nirqanku: —Kay qayllakunallapipaschá qankunaqa tiyashankichis. ¿Imaynataq qankunawanri rimanakuykuman? nispa.

⁸Paykunataq Josueta nirqanku: —Ñoqaykuqa kamachiykichismi kapusaqku, nispa. Chaymi Josueqa tapuykurqan: —Qankunari, ¿pipunitaq kankichis? ¿Maymantapunitaq hamushankichis? nispa.

⁹Hinan paykunaqa kutichirqanku: —Karu llaqtamantan hamushayku, Apu Señor Diosniykichis allin mentasqa kasqanta yachaspayku. Yachallaykutaqmi Egipto suyupi imaymana ruwasqanta,

¹⁰Astarot llaqtapi tiyaq Hesbón suyu rey Sehonta Basán suyu rey Ogta ruwasqantapas. Paykunan Jordán mayuq chimpanpi Amor runakunaq reynin kasqaku.

¹¹Chayraykun kurak taytakuna llaqtamasiykupiwan niwarqanku: —Ñanniykichispaq qoqawata apakuychis, hinaspa riychis paykunaq kasqankama. Ninkichistaq: Qankunawan sumaqpi rimanakuqmi hamushayku, kamachiykichistaq kapusaqku, nispaykichis, nispa.

¹²Qankuna maskhaq hamushaspaykun, q'oñishaqllataraq kay t'antaykuta apakamurqayku, kunantaq purimushaqtiyku hina qhoqarqapun.

¹³Kaqllataq kay vino apamusqayku qara p'uyñukunapas mosoqlla karqan, kunantaq t'oqo-t'oqollaña kapun, hinallataqmi ñanta sinchi karuta purimusqaykupi p'achaykupas usut'aykupas thantakamun, nispa.

¹⁴Chaymi Israel runakunaqa Gabaón runakunaq qoqawankuta malliykurqanku, ichaqa manan Señor Diosta tapuykurqankuchu.

¹⁵Hinan Josueqa paykunawan rimanakurqan sumaqpi kawsanankupaq, paykunata mana hayk'aqpas wañuchinanpaq. Israelpi uma runakunapas Señor Diospa sutinpi juraspan: —Ahinapuni kachun, nirqanku.

¹⁶Kinsa p'unchay qhepatataq Israel runakunaqa yacharqorqanku Gabaón runakunaqa sispallankupi tiyasqankuta.

¹⁷Hinaspan Gabaón runakuna maskhaq rirqanku, kinsa p'unchaymantataq llaqtankuman chayarqanku. Llaqtankun kaykuna karqan: Gabaón, Kafira, Beerot, Kiriat-jearim.

¹⁸Israel runakunataq ichaqa paykunata mana wañuchirqankuchu, Israelpi llapan uma runakuna Israelpa Diosnin Señorpa sutinpi jurasqankurayku. Chay ruwasqanku hawan Israel runakunaqa uma runakunapaq millayta rimarqanku.

¹⁹Uma runakunataq ichaqa nirqanku: —Ñoqaykun Israelpa Diosnin Señorpa sutinpi jurarqayku mana wañuchinanchispaq, chayraykun mana imanaytapas atisunmanchu.

²⁰Hinallapunin kawsanqaku, juramento ruwasqatachus p'akisunman chayqa, Diosmi ñoqanchispaq phiñakunman, nispa.

²¹Chay hinatan Israelpi uma runakunaqa kamachikurqanku mana wañuchinapaq, Gabaón runakunatan ichaqa churakurqanku llaqtantinpaq llant'a-llant'aqta unu aysaqtawan. Chay hinapin juramento ruwasqankuta hunt'arqanku.

²²Chaymantataq Josueqa Gabaón runakunata waqyarispa tapuykurqan: —¿Imanaqtinmi qankuna: Karumantan kayku, nispa, q'otuwarqankiku qayllallaykupi tiyashaspaykichis?

²³Kunanqa ñakasqan kankichis, wiñaypaqtaq kamachillapuni kankichis. Diosniypa wasinpaqmi llant'ata ch'eqtankichis, unuta aysamunkichis, nispa.

²⁴Hinan paykunaqa Josueta nirqanku: —Willawarqankun Apu Señor Diosniykichispa kamachin Moisesta kamachisqanta, paymi nisqa kay llapan suyuta qonasuykichista, hinaspa lliw kaypi tiyaqkunata wañuchinanta. Chaymi ñoqaykuqa wañuchiwanaykikuta manchakuspa chayta ruwarqayku.

²⁵Kunanqa makiykichispin kayku, ima munasqaykichista ruwawayku, nispa.

²⁶Ahinapin Josueqa Gabaón runakunata Israel runakunawan mana wañuchirqanchu,

²⁷ichaqa churaykapurqan llant'a-llant'aqta unu aysaqta Señor Diospa altarninpaq llapan Israel runapaqwan. Chay p'unchaymantapachan maypichus Señor Diospa akllakusqan cheqaspi chayta ruwananku karqan.