Read Quechua Cuzco Bible 1988 2 TESALONICENSES 1 Bible Online

2 TESALONICENSES 1 - Quechua Cuzco Bible 1988 bible

2 TESALONICENSES 1

¹Ñoqa Pablon Silvanopiwan Timoteopiwan kay cartata Tesalónica llaqtapi kashaq iñiq t'aqaman qelqamuni. Qankunaqa Dios Yayanchiswan Señor Jesucristopiwan hukllachasqan kashankichis:

²Dios Yayanchis Señor Jesucristopiwan sumaqta qhawarisunkichis thak-kaytapas qosunkichis.

³Wawqe-panaykuna, qankunamantaqa Diosmanmi graciasta qonallaykupuni, chaninmi graciasta qonaykuqa, iñiyniykichis allintapuni wiñashasqanrayku, sapankaq munanakuyniykichispas llimp'arishasqanraykupiwan.

⁴Chaymi ñoqaykupas Diospa iñiq t'aqankuna ukhupi alabakushayku, tukuy qatiykachaykunatapas sinchi llakikunatapas ancha pacienciawan allin iñiywan muchushasqaykichismanta.

⁵Chaykunan sut'inchan Diosqa chaninninpi juzgaqpuni kasqanta, ahinapin Diosqa allinpaq hap'isunkichis kamachikushasqanpi kanaykichispaq, chayraykutaqmi muchushankichispas.

⁶Diosqa chaninmi, paymi muchuchiqniykichiskunataqa muchuchillanqataq,

⁷hinaspa qankunata llakikuyniykichismanta samarichisunkichis, ñoqaykutapas samarichiwankun. Chaymi kanqa Señor Jesús hanaq pachamanta atiyniyoq angelninkunawan nina rawray chawpipi kutimusqan p'unchay.

⁸Payqa Diosta mana reqsiqkunatan, Señorninchis Jesucristomanta allin willakuykunata mana kasukuqkunatawanmi muchuchinqa.

⁹Paykunaqa wiñaypaqmi ñak'arinqaku, Señorpa qayllanmantapas qhapaq atiyninmantapas wikch'usqa kaspanku.

¹⁰Chay kutimunan p'unchaymi Señorpa llaqtanqa payta hatunchanqaku, paypi iñispa llapallanku musphanqaku. Chaypin qankunapas kankichis willasqaykuta iñisqaykichisrayku.

¹¹Chaymi ñoqaykupas qankunapaq Diosmanta mañakullaykupuni, waqyasqankunata hinapuni Diosninchis rikunasuykichispaq, allin yuyaywan lliw munasqaykichistapas, iñiywan lliw ruwasqaykichistapas atiyninwan qankunapi pay hunt'ananpaq.

¹²Ahinapin Señorninchis Jesucristoq sutin kawsayniykichispi hatunchasqa kanqa, paytaq qankunata hatunchasunkichis, Diosninchispas Señorninchis Jesucristopas sumaqta qhawarisqasunkichisrayku.