Read Quechua Cuzco Bible 1988 2 TESALONICENSES 2 Bible Online

2 TESALONICENSES 2 - Quechua Cuzco Bible 1988 bible

2 TESALONICENSES 2

¹Wawqe-panaykuna, Señorninchis Jesucristoq kutimunanmanta, paywan kuska huñukunanchismantawan

²valekuykiku, ama yuyayniykichista usqhaylla hukman t'ikranaykichispaq, amataq llaksakunaykichispaq “Señorpa kutimunan p'unchayqa chayamunñan” nisqata uyarispa. Yaqapaschá chayta uyariwaqchis karqan profetizasqa simipipas, willasqa simipipas, otaq chayta leewaqchis karqan ñoqaykuq cartaykupas kanman hinata.

³Amapuni imaynamantapas q'otuchikuychischu. Manaraq Señorpa kutimunan p'unchay chayamushaqtinqa, Diospa contranpi sayariyraqmi kanqa, hinan millay-millay awqa sonqo runa rikhurimunqa, chay runaqa infiernopi muchunanpaq t'aqasqañan.

⁴Chay runan sayarimunqa Dios contra, llapa dios nisqakuna contra, llapa yupaychanapaq kaqkuna contrapiwan, chaykunamanta aswan munayniyoqman tukuspa. Dios yupaychana wasimanraqmi haykunqapas, hinaspan tiyaykuspa ninqa: Ñoqaqa Diosmi kani, nispa.

⁵¿Manachu yuyarinkichis qankunawan kashaspayraq chayta qankunaman nisqayta?

⁶Kunanqa yachankichismi imachus chay runata hark'ashasqanta, chay hinapin chay runaqa rikhurimunan tiempollapi rikhurimunqa.

⁷Chay millay-millaypa pakasqa atiyninqa ruwashanñan, ichaqa chay hark'aqqa hark'ashallanqapunin Dios payta apakapunankama.

⁸Chaypachan chay millay-millay awqa sonqo runaqa rikuchikunqa, paytan Señorqa hamuspa samayninwan wañurqachinqa, lliphlli-kayninwantaq ch'usaqyachinqa.

⁹Chay awqa sonqo runaqa Satanaspa atiyninwanmi rikhurimunqa, hinaspan imaymana llulla milagrokunata, señalkunata, musphanakunatawan ruwanqa.

¹⁰Hinallataq tukuy rikch'aq mana chanin ruwaykunata ruwaspa q'otunqa ñak'ariyman ripuqkunata. Paykunaqa ñak'ariyman ripunku qespichisqa-kayta mana munaspa, cheqaq-kayta pisichaspa mana chaskisqankurayku.

¹¹Chaymi Diosqa paykunaman chayachimun sinchi pantachiq yuyayta llullakaqta chaskinankupaq,

¹²ahinapi cheqaq-kayta mana chaskiy munaqkuna llapallanku muchuchisqa kanankupaq. Paykunaqa mana chaninkaqpin qhosparqanku.

¹³Señorpa munakusqan wawqe-panaykuna, ñoqaykuqa qankunamanta Diosman graciasta qonaykupunin, qallariymantapacha qespichisqa kanaykichispaq Diospa akllakusqasuykichismanta. Qankunataqa Diosmi qespichisunkichis Santo Espirituq paypaq t'aqasqasuykichisrayku, cheqaq-kaypi iñisqaykichisraykupiwan.

¹⁴Chaypaqmi Diosqa waqyarqasunkichis Jesucristomanta allin willakuykunata willasqaykuwan, Señorninchis Jesucristoq hatunchasqa-kayninpi paywan kuska kanaykichispaq.

¹⁵Chay hinaqa, wawqe-panaykuna, allintapuni sayashaychis, simipipas cartapipas qankunaman yachachisqaykuta ama qonqaspa.

¹⁶Kikin Señorninchis Jesucriston Dios Yayanchispiwan, munakuwaspanchis sumaqta qhawariwanchis, wiñaypaq sonqochawanchis, allin suyakuyta qowanchis.

¹⁷Paypuni sonqoykichista kallpachasunkichis, hinallataq tukuy allin rimaypipas ruwaypipas allinta takyachisunkichis.