Read Quechua Cuzco Bible 1988 2 TESALONICENSES 3 Bible Online

2 TESALONICENSES 3 - Quechua Cuzco Bible 1988 bible

2 TESALONICENSES 3

¹Chaymantapas, wawqe-panaykuna, ñoqaykupaq Diosmanta mañapuwayku, Señorpa simin mast'arikunanpaq, sumaq chaskisqa kananpaqwan, imaynan qankuna chaskirqankichis chay hina chaskisqa kananpaq.

²Mañakullaychistaq waqllisqa millay runakunamanta qespichisqa kanaykupaq, willasqataqa manan llapachu iñinku.

³Ichaqa hunt'aqmi Señorqa, paymi kallpachasunkichis, Satanasmantapas waqaychasunkichis.

⁴Señorpin confiashayku qankunaman kamachisqaykuta ruwashasqaykichista ruwashanaykichistawanpas.

⁵Señor yanapasunkichis Diospa munakusqanta hina munakunaykichispaq Cristoq pacienciasqanta hina paciencianaykichispaqwan.

⁶Wawqe-panaykuna, Señorninchis Jesucristoq sutinpin kamachiykiku, llapa mana llank'ay munaq wawqe-panakunamanta t'aqakuychis, paykunaqa manan yachachisqaykuman hinachu kawsanku.

⁷Qankunaqa ñoqaykumantan yachaqakurqankichis imaynatachus kawsanaykichista. Ñoqaykuqa manan qankuna ukhupi mana llank'aspachu kawsarqayku,

⁸manataqmi piqpa mikhunantapas yanqallaqa mikhurqaykuchu. Aswanpas sasawanmi sayk'uywanmi tuta p'unchay makiykuwan llank'arqayku, ama mayqenniykichistapas gastachinaykupaq.

⁹Qankunamanta yanapayta mañakunaykuqa atikunmi, chaywanpas ñoqaykuqa llank'arqayku qankuna ñoqaykumanta yachaqakunaykichispaqmi.

¹⁰Qankunawan kashaspaykuraqmi kay hinata kamachirqaykiku: Pipas mana llank'ayta munanchu chayqa, amallataq mikhuchunpaschu, nispa.

¹¹Uyariykun qankuna ukhupi wakin mana imata llank'aspa purisqankuta, aswanpas hukpa kaqninman chapukuspalla kawsasqankuta.

¹²Chay hina kaq runakunatan Señorninchis Jesucristoq sutinpi kamachispa anyayku sumaqta llank'aspanku mikhunankuta tarinankupaq.

¹³Qankuna, wawqe-panaykuna, allinkaqta ruwaspaykichisqa ama pisipaychischu.

¹⁴Pipas kay cartapi nisqaykuta mana kasunqachu chayqa, allinta reparaychis pichus kasqanta, hinaspa ama paywan huñukuychischu, ahinapin payqa p'enqakunqa.

¹⁵Ichaqa ama awqaykichista hinachu paytaqa rikuychis, aswanpas iñiq-masiykichista hina sumaqta anyaykuychis.

¹⁶Kunanqa thak-kayta qoq kikin Señorpuni tukuy tiempopipas imaña-hayk'aña kaqtinpas thak-nisqata kawsachisunkichis. Llapallaykichiswan Señorqa kachun.

¹⁷Ñoqa Pablon makiywanpuni qelqaspa napaykamuykichis, cartaypuni kasqanta yachanaykichispaq, ahinatapunin tukuy cartaykunapipas qelqani.

¹⁸Señorninchis Jesucristo llapallaykichista sumaqta qhawarisunkichis.