Read Quechua Cuzco Bible 1988 1 TIMOTEO 1 Bible Online

1 TIMOTEO 1 - Quechua Cuzco Bible 1988 bible

1 TIMOTEO 1

¹Ñoqa Pablon Jesucristoq apostolnin*f** kani, chaypaqmi qespichiqninchis Diosqa suyakunanchis Señor Jesucristopiwan churawarqan.

²Kay cartatan iñiypi cheqaq churiy qan Timoteoman qelqamuyki: Dios Yayanchismi Señorninchis Jesucristopiwan sumaqta qhawarisunki, khuyapayasunki, thak-kaytapas qosunki.

³Macedonia provinciaman rishaspaymi Efeso llaqtapi qhepakunaykipaq valekurqaykiña. Chay hinaqa, qhepakuy chaypi, wakin runakunata kamachinaykipaq, ama q'ewisqa yachachikuykunata yachachinankupaq,

⁴amallataq cuentokunatapas machulakunaq mana tukukuq suti qelqankutapas t'aqwishanankupaq. Chaykunaqa churanakuykunallatan hatarichin, manan Diospa yuyaykusqanpiqa imapaqpas valenchu, iñiyllawanmi Diospa yuyaykusqantaqa reqsinchis.

⁵Chaytan kamachikuni ch'uya sonqowan, allin concienciawan, cheqaq iñiywan munanakunankupaq.

⁶Wakinmi chaykunamanta t'aqakurqanku, hinaspa yanqa ch'aqwaykunaman chapukuspa waqllipurqanku.

⁷Paykunaqa Diospa kamachikuy simin yachachiq kaytan munanku, ichaqa manan paykuna kikinkuq rimasqankutapas entiendenkuchu, paykunaqa allin yachaqman tukuspan yachachinku, ichaqa manan kikinkupas entiendenkuchu.

⁸Yachanchismi kamachikuy simi allin usasqa kaqtinqa allin kasqanta.

⁹Yachallanchistaqmi, kamachikuy simiqa manapunin chanin runakunapaqchu churasqa karqan, aswanpas mana chaninkunapaq, mana kasukuqkunapaq, Diosta mana manchakuqkunapaq, huchasapakunapaq, Diostapas, Dios yupaychaytapas pisichaqkunapaq, tayta-mamanta wañuchiqkunapaq, llapa runa wañuchiqkunapaq,

¹⁰qhellipi puriqkunapaq, qhari pura t'inkikuqkunapaq, runa suwakuqkunapaq, llullakuqkunapaq, yanqa-qasi juraqkunapaq, chanin yachachikuypa contranpi llapa sayariqkunapaqwan.

¹¹Chay chanin yachachikuyqa yupaychananchis Diospa qhapaq atiyninmanta allin willakuykunaman hinapunin. Chay allin willakuykunata willanaypaqmi Diosqa churawarqan.

¹²Señorninchis Jesucriston hunt'aqpaq qhawariwaspa kamachin kanaypaq akllakuwarqan, hinaspan kallpachawarqan, chaymi anchatapuni graciasta qoni.

¹³Manan ñoqaqa chaypaq hinachu karqani, ñawpaqqa Jesucristotan pisichaspa millaytapuni k'amirqani, paypi iñiqkunatapas ñak'arichispan qatiykacharqani. Ichaqa Diosmi khuyapayawarqan, mana yachaspa mana iñispa chaykunata ruwasqayrayku.

¹⁴Señorninchisqa anchatapunin saminchawarqan, hinaspan iñiyta, munakuyta Jesucristowan qowarqan.

¹⁵Kay rimayqa cheqaqmi, chayraykun llapa runapas iñinanpuni. Chay rimaymi nin: Jesucriston kay pachaman hamurqan huchasapakunata qespichinanpaq, nispa. Chaykuna ukhupin ñoqaqa aswan huchasapa kani.

¹⁶Diosmi ichaqa khuyapayawarqan, mana tukukuq paciencianta Jesucristo rikuchinanpaq. Chay hinapin ñoqaqa aswan huchasapa kaspa wiñay kawsayniyoq kanankupaq Jesucristopi iñinqaku chaykunaq yachaqakunan kasaq.

¹⁷Kunanqa wiñay-wiñay Reyta, mana wañuq, mana rikuna, sapallan Diosta wiñay-wiñaypaq yupaychasun hatunchasun. Ahinapuni kachun.

¹⁸Churíy Timoteo, ñawpaqmantaña Diospa sutinpi wawqekunaq qanmanta profetizasqankuman hinan kaykunata kamachiyki, chay profetizasqa simikunapi yuyaymanaspa allintapuni soldado hina maqanakunaykipaq,

¹⁹iñiypi qaqata sayaspa allin concienciaman hina purispa. Wakinqa concienciankuta mana kasuspan iñiyninkupi waqllipurqanku.

²⁰Chay waqllipuqkunamantan kanku Himeneowan Alejandrowan. Paykunatan Satanasman hap'ichirqani, Diospa contranpi amaña millayta rimanankupaq.